សួនមេអំបៅធំមួយនៅសៀមរាប កំពុងទាក់ទាញភ្ញៀវទេសចរទស្សនា
- 2019-07-16 08:41:52
- ចំនួនមតិ 0 | ចំនួនចែករំលែក 0
សួនមេអំបៅធំមួយនៅសៀមរាប កំពុងទាក់ទាញភ្ញៀវទេសចរទស្សនា
ចន្លោះមិនឃើញ
សួនមេអំបៅធំមួយទំហំប្រមាណ ១ ហិចតា ដែលមានទីតាំងស្ថិតនៅភូមិកន្រ្តក សង្កាត់ស្វាយដង្គំ ក្រុងសៀមរាប ខេត្តសៀមរាប បាននឹងកំពុងទាក់ទាញភ្ញៀវទេសចរជាតិ និងអន្តរជាតិមកទស្សនាកម្សាន្ត ខណៈសួននេះបានបើកដំណើរការ៧ ខែមកហើយ។
លោក ធីម ម៉ាដុកស៍ ជាជនជាតិអូស្ត្រាលី និងជាប្រធានគ្រប់គ្រងសួនបាត់ថឺផ្លាយ ភែរើដាយ ដែលស្ថិតនៅក្រោមអង្គការមូលនិធិ សេវេនដេយ អាត់វេនទីស្ទ កម្ពុជា (SDAFC) បានឱ្យដឹងថា សួនមេអំបៅនេះទើបតែដំណើរការបានប្រមាណ៧ខែ នៅលើផ្ទៃដីទំហំប្រមាណ១ហិចតា និងមានមេអំបៅជាច្រើនពាន់ក្បាល ក្នុងចំណោម១៨ប្រភេទ ។ សត្វមេអំបៅទាំងនោះ មានកំណើតនៅក្នុងប្រទេសកម្ពុជា មានដូចជានៅតំបន់ភ្នំគូលេន និងក្នុងក្រុងសៀមរាប។
លោកបន្តថា បច្ចុប្បន្នសួនមេអំបៅភែរើដាយ ឬ”សួនបាត់ថឺផ្លាយ ភែរើដាយ” នេះ កំពុងមានប្រជាប្រិយភាព និងទាក់ទាញដល់ភ្ញៀវទេសចរជាតិ និងអន្តរជាតិទៅទស្សនាទីនោះជារៀងរាល់ថ្ងៃ។ សួននេះ បើកឱ្យចូលទស្សនាពីថ្ងៃ អាទិត្យ ដល់ថ្ងៃសុក្រ។ លោកថា ការបើកសួនមេអំបៅនេះគឺដើម្បីរកចំណូលជួយកុមារកម្ពុជាកំព្រាគ្មានទីពឹង និងផ្ទុកមេរោគអេស៍។ សួនមេអំបៅនេះ មានមេអំបៅជាច្រើនពាន់ក្បាល ដែលកំពុងរង់ចាំភ្ញៀវទេសចរទាំងជាតិ និងអន្តរជាតិ។
អ្នកស្រី ការី នាថ ជាអ្នកគ្រប់គ្រងទូទៅបានឱ្យដឹងដែរថា សួនមេអំបៅនេះ មិនត្រឹមតែមានសត្វមេអំបៅប៉ុណ្ណោះទេ គឺមានទាំងសត្វជាច្រើនប្រភេទរស់នៅក្នុងសួននោះផងដែរសម្រាប់ឱ្យភ្ញៀវទស្សនាក្នុងនោះមានដូចជា ពស់ថ្លាន់ អណ្ដើក សត្វស្លាប ទន្សាយ និងមានទឹកធ្លាក់ពីជ្រោះផងដែរ។ បាត់ថឺផ្លាយភែរើដាយ ក៏មានដើមផ្កាជាច្រើនប្រភេទដ៏វិសេសវិសាល សម្រាប់ទស្សនា និងកន្លែងកម្សាន្តបន្ធូរអារម្មណ៍ផងដែរ។
លោក ធីម ម៉ាដុកស៍ ប្រធានគ្រប់គ្រងសួនបាត់ថឺផ្លាយ ភែរើដាយ ដែលស្ថិតនៅក្រោមអង្គការមូលនិធិ សេវេនដេយ អាត់វេនទីស្ទ កម្ពុជា (SDAFC) បានមករស់នៅប្រទេសកម្ពុជាតាំងពីឆ្នាំ១៩៩២ ដែលមកដល់ពេលនេះមានរយៈ ពេលប្រមាណ២០ឆ្នាំមកហើយ។ ការរស់នៅក្នុងស្រុកខ្មែររបស់លោកនេះ ដោយសារតែលោកស្រលាញ់ប្រជាជន និងប្រទេសកម្ពុជា ខណៈដែលលោករស់នៅកម្ពុជាលោកបានជួយប្រជាកសិករនៅតាមជនបទនិងបានបើកអង្គការជួយកុមារក្រីក្រ និងកុមារកំព្រាជាបន្តបន្ទាប់រហូតមកដល់សព្វថ្ងៃ។ ដូច្នេះក្រៅពី ការទស្សនាប្រាសាទបុរាណ ភ្ញៀវទេសចរក៏អាចទស្សនា សួនមេអំបៅបែបធម្មជាតិ នៅលើទឹកដីតំបន់អង្គរខេត្តសៀមរាប ស្ថិតនៅភូមិកន្រ្តក សង្កាត់ស្វាយដង្គំ ក្រុងសៀមរាប ខេត្តសៀមរាប៕