ចេញ​មក​អស់​ហើយ​ លក្ខណៈ​សម្បត្តិ Galaxy Note10 និង Note10+

  • 2019-07-23 02:00:08
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ការ​ប្រកាស​ចេញ Galaxy Note ជំនាន់​ថ្មី កាន់​តែ​ខិត​ចូល​មក​ដល់​ហើយ​ គឺ​នៅ​ថ្ងៃ​ទី ៧ ខែ​សីហា។ ពេល​នេះ​ដំណឹង​​ជុំវិញ​លក្ខណៈ​សម្បត្តិ​របស់​ត្រកូល Note ថ្មី បាន​លេច​ចេញ​ទៀត​ហើយ។

ដំបូង​គឺ​ទាក់ទង​នឹង​ Galaxy Note10 ធម្មតា វា​មាន​អេក្រង់​ ទំហំ ៦,៣ អ៊ីញ ​បង្ហាញ​រូបភាព​ក្នុង​កម្រិត FHD+ ដែល​ទាប​ជាង​ Galaxy Note9 ​អាច​បង្ហាញ​រូបភាព​ក្នុង​កម្រិត QHD+។ Note10 ក៏​នឹង​មាន​បំពាក់​ថ្ម​ទំហំ ៣៥០០ mAh តូច​ជាង​ Galaxy Note9 មាន​ថ្ម​ទំហំ ៤០០០ mAh។

ដោយ​ឡែក​ Note10+ ​វិញ មាន​បំពាក់​អេក្រង់​ទំហំ ៦,៨ អ៊ីញ អាច​បង្ហាញ​រូបភាព​ក្នុង​កម្រិត QHD+ មាន​ថ្ម​ទំហំ ៤៣០០ mAh។ ម៉ូដែល​នេះ​ក៏​មាន​ RAM ទំហំ ១២ GB និង​អង្គ​ផ្ទុក​ទំហំ​ចាប់​ពី ២៥៦ GB ឡើង​ទៅ។ Note10+ ខុស​ពី Note10 ត្រង់​ថា​វា​មាន​បន្ថែម​ Sensor ToF នៅ​ក្បែរ​កាមេរ៉ា​ខាង​ក្រោយ​ទាំង​បី​គ្រាប់។

ដូច​ពាក្យ​ចចាមអារ៉ាម​ផ្សាយ​កន្លង​ទៅ​ដែរ គឺ Note10 អាច​សាក​ថ្ម​ក្នុង​កម្លាំង ២៥ វ៉ាត់ ចំណែក​ឯ Note10+ អាច​ទ្រាំទ្រ​ដល់​ការ​សាក​ថ្ម​កម្លាំង ៤៥ វ៉ាត់ ប៉ុន្តែ​ឆ្នាំង​សាក​ក្នុង​ប្រអប់​នឹង​មិន​អាច​សាក​ដល់​កម្លាំង​ប៉ុណ្ណេះ​ឡើយ។ ដូច​នេះ​អ្នក​ប្រើ​ប្រាស់​ត្រូវ​ទិញ​ឆ្នាំង​សាក​បន្ថែម ​ប្រសិន​ចង់​សាក​បាន​លឿន។

ទោះ​យ៉ាងណា​កុំ​ទាន់​ជឿជាក់​លើ​ដំណឹង​នេះ​ទាំង​ស្រុង រង់ចាំ​ដល់​ការ​ប្រកាស​ចេញ​ជា​ផ្លូវ​ការ​ពី Samsung នា​ដើម​ខែ​សីហា​ខាង​មុខ ទើប​អាច​ទុក​ចិត្ត​បាន​ ១០០%៕​​​

ចុចអាន៖

ប្រភព៖ GSMarena   ប្រែ​សម្រួល៖ សុខហេង