ធន់ សុភា អរគុណអ្នករៀបចំសង្វៀនឯកភ្នំ ដែលទុកចិត្តលើសមត្ថភាពខ្លួន

2019-07-29 08:36:21
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាកណ្ដាល និងចៅក្រម លោក ធន់ សុភា អរគុណដល់អ្នករៀបចំប្រដាល់សង្វៀនឯកភ្នំ ដែលបានទុកចិត្ត និងមើលឃើញពីសមត្ថភាពរបស់ខ្លួន ហើយស្នើសុំទៅជួយចាប់ការប្រកួតរវាងជើងខ្លាំងគុនខ្មែរ កែវ រំចង់ និង IQUEZANG ម្សិលមិញនេះនៅបាត់ដំបង។

អាជ្ញាកណ្ដាលលោក ធន់ សុភា

លោក ធន់ សុភា បានឲ្យដឹងថា ដោយសារតែមានការស្នើសុំពីអ្នករៀបចំសង្វៀនឯកភ្នំ ទៅដល់ខាងស្ថានីយផ្ទាល់របស់លោកដែលធ្វើការរាល់ថ្ងៃនេះ ទើបបានជាមានវត្តមានរូបលោកទៅជួយចាប់គូពិសេសរវាង កែវ រំចង់ និងអ្នកលេងគុនថៃម្សិលមិញ។ អាជ្ញាកណ្ដាលប្រចាំសង្វៀនបាយ័នរូបនេះបានឲ្យដឹងទៀតថា ខាងអ្នករៀបចំប្រដាល់នៅឯកភ្នំបញ្ជាក់មកលោកថា ដោយសារតែកីឡាករទាំងពីរនាក់ចេះតែមានថែមថយគ្នា និងមានការឌឺដងនាពេលកន្លងទៅ ដូច្នេះតំណាងអ្នករៀបចំកម្មវិធីនៅទីនោះខ្លាចមានបញ្ហាណាមួយកើតឡើងពេលប្រកួត ទើបស្នើសុំឲ្យទៅជួយបែបនេះ។

លោកគ្រូ ធន់ សុភា កណ្ដាល

គ្រូប្រចាំសមាគមកីឡាក្រសួងការពារជាតិ រូបនេះក៏ថ្លែងអំណរគុណ ដល់អ្នករៀបចំកម្មវិធីក៏ដូចជាលោកឧកញ៉ាម្ចាស់សង្វៀនប្រដាល់ឯកភ្នំតែម្ដង ដែលបានទុកចិត្តពីសមត្ថភាពការងារ និងផ្ដល់តម្លៃដល់រូបលោក។

រំលឹកដែរថា ការប្រកួតរវាង កែវ រំចង់ និង IQUEZANG នៅសង្វៀនប្រដាល់ឯកភ្នំ ក្នុងខេត្តបាត់ដំបង កាលពីម្សិលមិញនេះគឺអាជ្ញាកណ្ដាលចាប់គូនេះដោយលោកគ្រូ ធន់ សុភា។ ការប្រកួតមួយនេះ កែវ រំចង់ ឈ្នះពិន្ទុកីឡាករថៃ IQUEZANG៕

អត្ថបទ៖ នួន ស៊ីណា