Wenger ៖ ពីអ្នកសេដ្ឋកិច្ច ក្លាយជាគ្រូបាល់ទាត់ ចេះចាយលុយក្លឹបដ៏មានប្រសិទ្ធភាព
- 2019-08-04 00:45:00
- ចំនួនមតិ 0 | ចំនួនចែករំលែក 0
Wenger ៖ ពីអ្នកសេដ្ឋកិច្ច ក្លាយជាគ្រូបាល់ទាត់ ចេះចាយលុយក្លឹបដ៏មានប្រសិទ្ធភាព
ចន្លោះមិនឃើញ
Arsene Wenger ចប់ថ្នាក់អនុបណ្ឌិតផ្នែកសេដ្ឋកិច្ច តែចាប់អាជីពបាល់ទាត់។ Wenger កើតនៅ Duttlenheim ដែលជាភូមិតូចមួយនៅក្រុង Strasbourg ស្ថិតនៅភាគខាងកើតប្រទេសបារាំង។
ពីអនុបណ្ឌិតសេដ្ឋកិច្ច ក្លាយជាខ្សែការពារលេងនៅលីគកំពូលរបស់បារាំង
លោកបញ្ចប់បរិញ្ញាបត្រផ្នែកវិស្វកម្ម និង បញ្ចប់ថ្នាក់អនុបណ្ឌិតផ្នែកសេដ្ឋកិច្ចនៅឆ្នាំ ១៩៧១ ត្រឹមអាយុ២២ឆ្នាំ ហើយអំឡុងពេលកំពុងរៀនថ្នាក់អនុបណ្ឌិតបណ្ដើរ លោកលេងបាល់ឲ្យក្លឹប Mutzig បណ្ដើរ។ ទីបំផុត Wenger បានក្លាយជាកីឡាករបាល់ទាត់អាជីពជាលើកដំបូងក្នុងឆ្នាំ ១៩៧៨ ជាខ្សែការពារ លេងឲ្យក្រុម Strasbourg នៅលីគកំពូលរបស់បារាំង។
Wenger មិនបានចំណាយពេលយូរដើម្បីសម្របខ្លួនក្នុងជីវិតបាល់ទាត់អង់គ្លេសឡើយ។ ក្រោយដឹកនាំ Arsenal បាន១ឆ្នាំ លោកបានដឹកនាំក្រុមឱ្យឈ្នះពានរង្វាន់ Premier League ជាលើកដំបូងនៅក្នុងរដូវកាល ១៩៩៧/៩៨ និងបានបង្កើតប្រវត្តិសាស្ត្រឲ្យក្លឹបលើកពានមាស Premier League ដោយមិនដែលស្គាល់ពាក្យចាញ់សោះពេញ១រដូវកាល ២០០៣/០៤។
Wenger ជំនាញក្នុងការទិញយុវជនថោកៗ និង លក់វិញបានថ្លៃខ្ពស់
គ្រូបង្វឹកដែលមានខួរក្បាលបែបសេដ្ឋកិច្ច ថែមពីលើយុទ្ធសាស្ត្រដ៏ប៉ិនប្រសប់លើទីលាន Wenger មានចំណុចពិសេសមួយទៀត គឺយុទ្ធសាស្ត្របែបសេដ្ឋកិច្ច។ Wenger ល្បីខាងពូកែបណ្ដុះយុវជន ឬទិញកីឡាករចូលមកធូរៗថ្លៃ តែបញ្ចេញទៅវិញតម្លៃហក់ឡើងកប់ពពក។
ឧទាហរណ៍ជាក់ស្តែង Nicolas Anelka ដែល Wenger បាននាំយកមកពីក្លឹប Paris St Germain ជាមួយតម្លៃត្រឹមតែ ៥០ ម៉ឺនផោន (ប្រហែល ៧០ ម៉ឺនដុល្លារ)។ ២ឆ្នាំក្រោយមក គ្រូបង្វឹកមានសញ្ញាប័ត្រអនុបណ្ឌិតសេដ្ឋកិច្ចមួយនេះ បានលក់ Anelka ទៅឲ្យ Real Madrid ក្នុងតម្លៃ ជាង ៣១ លានដុល្លារ កាលពីឆ្នាំ ២០០០ ហើយវាគឺជាតម្លៃខ្ពស់បំផុតមួយក្នុងជំនាន់នោះ។
របាយការណ៍មួយទៀតរបស់ Transfermarket ស្តីពីការចំណាយសម្រាប់ទីផ្សារដោះដូរកីឡាកររបស់ក្លឹបនៅអង់គ្លេសរយៈពេល២០ឆ្នាំចុងក្រោយដោយគិតចាប់ពីឆ្នាំ ១៩៩៧ ដល់ ២០១៦ បានបង្ហាញថា Wenger មិនដែលចាយលើសពី ២០០ លានផោនក្នុង១ឆ្នាំឡើយ ខណៈដែលគូប្រជែងរបស់ខ្លួន ដូចជា Man City, Chelsea, Man Utd, Liverpool និង Tottenham ជាដើម អ្នកខ្លះហ៊ានចាយលុយទិញកីឡាករថ្លៃៗក្នុង១ឆ្នាំៗដល់ទៅប្រមាណ ៨០០ លានផោន (ប្រហែល ១ ១២២ លានដុល្លារ)។
អាចថា នេះក៏ជាមូលហេតុមួយដែល Wenger អាចនៅ Arsenal ជាង២ទសវត្ស ព្រោះថា មិនងាយឡើយដែលក្លឹបទទួលបានគ្រូបង្វឹកដ៏ល្អដូចលោក ដែលពូកែទាំងយុទ្ធសាស្ត្រលើសមរភូមិវាលស្មៅ ទាំងយុទ្ធសាស្ត្រហិរញ្ញវត្ថុ សម្រាប់ជួយអភិវឌ្ឍក្លឹប។
ប៉ុន្តែ ការចាញ់ផ្ទួនៗ ស្របពេលដែលក្រុមអ្នកគាំទ្របានលើកបដា "Wenger Out” ទំនងជាមូលហេតុចម្បងដែលបង្ខំឲ្យម្ចាស់ក្លឹប និង គ្រូបង្វឹកចាស់វស្សាត្រូវតែទទួលយកទោះចង់ ឬមិនចង់ក៏ដោយ។
បច្ចុប្បន្ន អតីតគ្រូបង្វឹកវ័យ៦៩ឆ្នាំរបស់ Arsenal មិនទាន់វិលត្រលប់ទៅធ្វើជាគ្រូបង្វឹកវិញនៅឡើយ ប៉ុន្តែគេឃើញ Wenger និងលោក Jose Mourinho ធ្វើជាអ្នកវិភាគឲ្យទូរទស្សន៍កីឡា beIN Sports៕