ក្បួនស្រោចស្រង់ជីវិតយុវវ័យគួរតែដឹងបើបែកឬរបូតស្រោមពេលប្រតិបត្តិការ

2014-09-26 00:33:39
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការស្ទង់មតិកន្លងមកឃើញថា យុវវ័យដែលធ្លាប់ប្រលូកនឹងការរួមភេទ មិនបានដឹងថាត្រូវធ្វើអ្វីខ្លះទេ ក្រៅពីដេកភ័យបន់រកតែពុទ្ធោ និងរង់ចាំមើលលទ្ធផលធ្វើតេស្តឈាម ប្រសិនបើពួកគេថ្លោះធ្លោយធ្វើឲ្យបែកស្រោម ពេលប្រតិបត្តិការសឹកជលើគ្រែ។ យុវវ័យជាច្រើនពុំបានដឹងថា មានថ្នាំអាចសង្គ្រោះពេលភ្លាត់ស្នៀត។

ទាំងការងឿងឆ្ងល់ថា៖ “ខ្ញុំធ្លាប់មានបទពិសោធន៍រួមភេទដែរ ប៉ុន្តែខ្ញុំមិនដែលបានដឹងពីរឿងបង្ការពេលរួមភេទបែកស្រោម ហ្នឹងសោះ។ ប្រសិនបើខ្ញុំប្រឈមនឹងបញ្ហានេះខណៈពេលប្រតិបត្តិការអីចឹងមែន ខ្ញុំប្រហែលជាដេកភ័យ រង់ចាំលទ្ធផលពិនិត្យឈាមហើយមើលទៅ ព្រោះមិនដែលបានដឹងពីព័ត៌មាននេះទេ”។

មានស្រុកកំណើតនៅខេត្ត តាកែវ សម្បុរស រាងខ្ពស់ស្រលះ យុវជនម្នាក់ទៀតមានឈ្មោះថា មករា អាយុ២៤ឆ្នាំ ក៏មិនបានដឹងពីបញ្ហានេះដែរ។ “ប្រសិនបើចៃដន្យ ពេលរួមភេទជាមួយនារីរកស៊ីផ្លូវភេទ ភ្លាត់ស្នៀតបែកស្រោម ខ្ញុំមិនដឹងថាត្រូវធ្វើយ៉ាងម៉េចដែរ មានតែប្រញាប់ប្រញាល់ទៅសំអាតខ្លួនចេញទេ។ ក្រៅពីនេះមានតែរង់ចាំមើលឈាមទេ”។ មករា បញ្ជាក់យ៉ាងដូចនេះ។

អានអត្ថបទ៖ ៤សន្លឹកប្រចាំកាន់បិណ្ឌកុំថាដល់ព្រះសង្ឃសូម្បីឧបាសកក៏ក្ដៅសាច់ដុំភ្នែក

រូបតំណាង (រូបភាពពី៖ wisegeek)

ចំពោះ យុវជន វីរៈ ឯណោះវិញ ក៏មិនបានដឹងពីថ្នាំការពារមេរោគអេដស៍ដែរ បើទោះបីជាកន្លងមក វីរៈ ធ្លាប់មានបទពិសោធន៍នៃការរួមភេទច្រើនដងក៏ដោយ។ វីរៈ បានបន្ថែមឲ្យដឹងទៀតថា៖ “ខ្ញុំធ្លាប់រួមភេទជាមួយនារីរកស៊ីផ្លូវភេទ ហើយរបូតស្រោមពីរបីដងដែរ តែមិនដឹងធ្វើម៉េច មានតែដេកភ័យ រង់ចាំពិនិត្យឈាមប៉ុណ្ណោះ។ សំណាងល្អដែលលទ្ធផលចេញមកអត់មានអ្វីកើតឡើង កុំអីចប់ហើយអនាគតខ្ញុំ”។

អានអត្ថបទ៖ រឿងពិតនៅពីក្រោយវាំងននម៉ាហ្សា

ចំណែកឯ យុវជន កក្កដា ជាបុគ្គលិកផ្នែកលក់នៃក្រុមហ៊ុនឯកជនមួយ បានបញ្ជាក់ឲ្យដឹងផងដែរថា៖ ខ្ញុំធ្លាប់បានឮគេមានលក់ថ្នាំការពារមេរោគអេដស៍នៅតាមឱសថស្ថាន ក៏ដូចជាពេទ្យរដ្ឋមួយចំនួន តាមរយៈមិត្តភ័ក្ដិខ្ញុំ តែមិនច្បាស់ប៉ុន្មានទេ ព្រោះមិនដែលថ្លោះធ្លោយដល់ថ្នាក់បែកស្រោមផង។ រាល់ពេលដំណើរការម្ដងៗ ឃើញថាអត់មានបញ្ហាអ្វីទេ តែបើថ្ងៃណាមួយ រហែកស្រោម ខ្ញុំប្រហែលជាភ័យស្លាប់ហើយ ជាពិសេសគឺខ្លាចមេរោគអេដស៍តែម្ដង”។

ទាក់ទងនឹងបញ្ហាបែក ស្រោមពេលប្រតិបត្តិការនេះ ប្រធានបណ្ដុះបណ្ដាលនៃគ្លីនិករ៉ាក់ លោក ម៉ៅ វណ្ណៈ បានពន្យល់ថា យុវវ័យភាគច្រើននៅមិនទាន់បានទទួលព័ត៌មានទូលំទូលាយនៅឡើយទេ ទាក់ទងនឹងបញ្ហាសុខភាពត្រង់ចំណុចនេះ។

លោកបានបន្តទៀតថា៖ “ប្រសិនបើយុវវ័យមានការថ្លោះធ្លោយ បែកស្រោមខណៈពេលរួមភេទ ហើយពួកគេមិនទុកចិត្តថាដៃគូរបស់គេមានផ្ទុកមេរោគអេដស៍ ឬអត់នោះ ពួកគេអាចមករកសេវាកម្មនៅគ្រប់ទីតាំងគ្លីនិករ៉ាក់ ទូទាំងខេត្តក្រុងបាន តែមិនត្រូវបណ្ដោយឲ្យហួសរយៈពេល៣៦ម៉ោងទេ។ គេមានថ្នាំម្យ៉ាងដែល តម្រូវឲ្យលេបចំនួន២៨ថ្ងៃជាប់គ្នា ក្នុងការបង្ការការឆ្លងមេរោគនេះ។ បើអ្នកបែកស្រោមពេលរួមភេទ មិនគួររង់ចាំដល់៣៦ម៉ោងទេ គួរតែមករកអន្តរាគមន៍ឲ្យលឿនកាន់តែល្អ”។

សម្រាប់អ្នកដែល ប្រទះបញ្ហានេះ អាចទំនាក់ទំនងទៅកាន់គ្លីនិករ៉ាក់តាមទូរសព្ទលេខ ០៨៨ ៧ ១០៧ ១០៧ ឬ ០៨៩ ៣៣៣ ៩៩០ ដើម្បីទទួលបានព័ត៌មានបន្ថែម។

តើមានយុវវ័យណាខ្លះ បានដឹងពីសេវាកម្មថ្នាំការពារមេរោគអេដស៍នេះដែរឬទេ?