ប៊ុត សីហា ទម្លាយរឿងក្នុងចិត្តពី Coach ឆន សុវណ្ណរាជ

2014-11-19 18:13:22
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការលើកឡើងរិះគន់បន្តបន្ទាប់ ខណៈមិនឃើញម្ចាស់ជយលាភី The Voice Cambodia ពោលពាក្យគួរសម ឬអរគុណចំពោះ Coach ឆន សុវណ្ណរាជ ដែលខិតខំបង្ហាត់បង្ហាញតាំងចំណុចចាប់ផ្ដើម រហូតបានជោគជ័យលើការប្រកួតប្រជែង ដោយទទួលបានទាំងប្រាក់ ឱកាស និងកិត្តិយស ជាដើម។

ទោះបីជាយ៉ាងណា ពាក់ព័ន្ធទៅនឹងចំណុចនេះ យុវជនខាងលើបានអះអាងថា ដោយសារតែមានអារម្មណ៍សប្បាយរីករាយខ្លាំងពេក លាយឡំដោយការនឹករលឹក ដល់ឪពុកទើបចែកឋានទៅថ្មីៗផងនោះ ធ្វើឲ្យរូបគេរកពាក្យអ្វីមកនិយាយគ្មានទេ។ ប្រការនេះហើយ ធ្វើឲ្យយុវជន ប៊ុត សីហា ហាក់គ្មានសន្តិភាពផ្លូវចិត្ត ព្រោះមិនបានធ្វើរឿងសំខាន់មួយ ក្រោយកម្មវិធីបញ្ចប់ទៅ។

ប៊ុត សីហា និយាយថា៖ “ការពិតទៅ ខ្ញុំបានចាត់ទុកបង រាជ ជាអ្នកមានគុណម្នាក់បាត់ទៅហើយ ជាពិសេសពេលអស់សង្ឃឹម ក្រោយពេលឪពុកលាចាកលោកទៅ"។ យុវជនរូបនេះបន្តថា Coach ឆន សុវណ្ណរាជ តែងផ្ដល់កម្លាំងចិត្តដល់រូបគេ ឲ្យបន្តការខិតខំប្រឹងប្រែងហាត់រៀនច្រៀង ដោយសម្លឹងមើលទៅគោលដៅខាងមុខ គឺក្លាយជាម្ចាស់ជយលាភី The Voice Cambodia រដូវកាលទី១។

ដោយសារសំដីរបស់ Coach រូបនេះហើយ ធ្វើឲ្យយុវជនមានប្រភពពីខេត្តកំពង់ស្ពឺខាងលើ មានស្មារតីឡើងវិញ ហើយខិតខំហាត់រៀនរហូត មានការរីកចម្រើនគួរកត់សម្គាល់ ទាំងរបៀបប្រើប្រាស់សំឡេង និង កាយវិការជាដើម ស្របពេលមានទេពកោសល្យចម្រៀងស្រាប់។ សីហា មិនមានការងារផ្សេងទេ ក្រៅពីហាត់ច្រៀង ទើបមានពេលវេលាគ្រប់គ្រាន់ ហ្វឹកហាត់គ្រប់ពេលវេលា រហូតបានទទួលជោគជ័យក្នុងចំណោមបេក្ខភាពជាច្រើននាក់។

“ ខ្ញុំបានក្លាយជាមនុស្សម្នាក់ផ្សេងទៀត បន្ទាប់ពីទទួលការបណ្ដុះបណ្ដាលយ៉ាងយកចិត្តទុកដាក់។ ខ្ញុំមានថ្ងៃនេះ ក៏ជាចំណែកមួយដ៏ធំរបស់បង សុវណ្ណរាជ និង Coach ផ្សេងទៀតដែរ"។ សីហា អះអាងថា គ្មានថ្ងៃបំភ្លេចគុណCoach ទាំងអស់បានទេ។

ជាមួយគ្នានោះ ប៊ុត សីហា បន្តថា កំពុងត្រៀមខ្លួន ដើម្បីចុះកុងត្រាផ្លូវការ ជាមួយផលិតកម្មហង្សមាស សម្រាប់ឱកាសក្លាយជាតារាចម្រៀងនៅក្នុងផលិតកម្មចម្រៀងល្បីឈ្មោះខាងលើ ដោយកំពុងស្នាក់នៅរាជធានីភ្នំពេញនៅឡើយ៕

អានអត្ថបទ៖ ច្រៀងតែបទ ព្រាប សុវត្ថិ-ខេមរៈ សិរីមន្ត តែ ប៊ុត សីហា មានតារាក្នុងដួងចិត្តផ្សេង

អានអត្ថបទ៖ តើ Coach ឆន សុវណ្ណរាជ និយាយអ្វីខ្លះពី ប៊ុត សីហា?

អត្ថបទ៖ សំ ជំនាញ