បើអាច! ដាច់ខាតកុំនិយាយពាក្យទាំងនេះ ដាក់ហ្វេនៗរបស់ K-Pop ឲ្យសោះ

2019-12-24 05:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

K-Pop ពិតជាមានឥទ្ធិពលនៅលើសាកលលោក វិស័យនេះកាន់តែរីកស្គុះស្គាយខ្លាំង និងនាំចិត្តយុវវ័យឲ្យរាំច្រៀងតាម និងគាំទ្រជាបន្តបន្ទាប់។ ជាក់ស្ដែងទម្លាប់អ្នកដែលចូលចិត្ត K-Pop អាចនឹងស្រដៀងគ្នាភាគច្រើន និងឆាប់យល់ពីគ្នា ស្របពេលដែលអ្នកដែលមិនមែនជាអ្នកគាំទ្រ K-Pop មិនយល់ និងមិនខ្វល់ឡើយ។ ប៉ុន្តែទោះជាយ៉ាងណា បើអាច ដាច់ខាតសូមកុំនិយាយពាក្យទាំងនេះចំពោះហ្វេន K-Pop ឲ្យសោះ៖

១. មិនគួរសួរថា៖ «ហេតុអ្វីអ្នកស្ដាប់បទ K-Pop ទាំងមិនចេះភាសាកូរ៉េមួយម៉ាត់ផង?»

មនុស្សភាគច្រើនពិតជាមិនយល់សោះ ថាតើអ្នកដែលមិនចេះភាសាកូរ៉េអាចរីករាយនឹងបទ K-Pop ដោយរបៀបណា? ប៉ុន្តែចំណុចនេះមានតែអ្នកចូលចិត្តទេដែលអាចយល់បាន ព្រោះគេជឿជាក់ថា តន្ត្រីគឺជាភាសាសាកល មានន័យថាទោះបីមិនចេះភាសារបស់គេ ក៏នៅតែអាចយល់ខ្លះៗបាន។

២. មិនគួរនិយាយថា៖ «តារាប្រុសម្នាក់នោះដូចស្រី" / "តារាស្រីម្នាក់នោះដូចប្រុស»

ការលាន់មាត់បែបនេះ ដោយសារភាគច្រើនគេសង្កេតឃើញតារា K-Pop តែងខ្លួន Cute ដូចនេះវាពិតជាខុសពីសិល្បៈអឺរ៉ុបដែលម៉ឺងម៉ាត់។ ឧទាហរណ៍ជាក់ស្ដែងតារាប្រុសក្នុងពិភព K-Pop មិនមានពុកមាត់ទេ ហើយពេលខ្លះប្ដូរពណ៌សក់ទៅជាពណ៌ផ្កាឈូក ផ្ទៃមេឃ -ល-។

ចំណែកតារាស្រីខ្លះមិនមែនត្រូវតែតែងខ្លួនដូចស្រីដែរ ដូច Amber (សមាជិកក្រុម f(x)) ជាដើម តាំងពីចូលសិល្បៈនាងតែងខ្លួនបែបប្រុសជានិច្ច តែមិនមែនបានន័យថានាងជាប្រុសទេ។

៣. មិនគួរសន្មតថា៖ «តារាៗទាំងអស់សុទ្ធតែវះកាត់កែសម្ផស្ស»

ពិតហើយ តារាមួយចំនួនសុទ្ធតែមានជំនួយពីការកែសម្រស់ តែវាគ្មានអ្វីខុសឡើយ ព្រោះពួកគេជាតារាប្រាកដជាត្រូវការភាពស្រស់ស្អាតផ្ទាល់ខ្លួនដូចមនុស្សទូទៅដែរ។ ប៉ុន្តែមិនមែនបានន័យថា គ្រប់ Idol ទាំងអស់សុទ្ធតែកែសម្ផស្សទេ ព្រោះថាអ្នកផ្សេងទៀតមានមុខមាត់ និងរូបរាងស្រស់ស្អាតធម្មជាតិតាំងពីកំណើតមកម្ល៉េះ និងផ្អែកលើការតុបតែងបន្ថែម ឧទាហរណ៍ជាក់ស្ដែងដូច V ជាដើម។

៤. មិនគួរនិយាយថា៖ «មិនគួរចាយលុយលើអាល់ប៊ុម ឬសំបុត្រទៅមើល Concert សោះ»

ហ្វេនមួយចំនួនធំតែងចំណាយលុយទិញវត្ថុអនុស្សាវរីយ៍ អាល់ប៊ុម និងសំបុត្រចូលមើលការប្រគំតន្ត្រី K-Pop ហើយនេះគឺជាក្ដីសុខរបស់ពួកគេ ប៉ុន្តែមិនមែនគ្រប់គ្នាសុទ្ធតែយល់អារម្មណ៍នេះទេ តែគេបែរជាគិតថាវាជារឿងអត់ប្រយោជន៍ទៅវិញ។

៥. មិនគួរសន្មតថា៖ «តារាទាំងអស់មុខដូចៗគ្នា»

វាជាការពិតមែនដែលតារាភាគច្រើនតែងខ្លួនស្រដៀងគ្នា មើលមួយភ្លែតអាចច្រឡំ ប៉ុន្តែក៏មិនមែនមានន័យថាពួកគេមានមុខដូចគ្នា ១០០ភាគរយដែរ លើកលែងគេជាបងប្អូនភ្លោះនឹងគ្នាដូច Kwangmin និង Youngmin (ក្រុម Boyfriend)។

៦. មិនគួរសួរថា៖ «ទិញអាល់ប៊ុមធ្វើអី បើបទចម្រៀងអាច Download បានសេរីពេញអ៊ីនធើណិត?»

វាមិនខុសអីពីពាក្យថា «ទិញអាល់ប៊ុមធ្វើអី បើគង់តែអាចលួចបទគេបានងាយៗហ្នឹង?»។ តាមពិតការដែលហ្វេនចំណាយលុយខំសន្សំទិញអាល់ប៊ុម ក៏ដោយសារកើតចេញ ពីទឹកចិត្តគាំទ្រផលិតផលពិត។ មួយទៀតកាដូផ្សេងទៀតដែលពួកគេទទួលបានក្នុងអាល់ប៊ុមនោះ ក៏មានតាំងពីសៀវភៅរូបភាព និង Photocard ផងដែរ។

៧. មិនគួរសួរថា៖ «តើតារាទាំងនោះជាភេទទី ៣មែនទេ?»

ជាសំណួរដែលតែងលេចឮដូចគ្នា ពិសេសនៅពេលដែលមនុស្សមួយចំនួនឃើញតារា K-Pop មិនថាប្រុស មិនថាស្រីឱបតារាៗភេទដូចគ្នា ប៉ុន្តែមិនមែនពួកគេជាភេទទី៣ទេ។ ផ្ទុយទៅវិញ វាគ្រាន់តែបង្ហាញពីក្ដីស្រឡាញ់ ការរាប់អានប្រៀបដូចបងប្អូនដែលពួកគេមានចំពោះគ្នាប៉ុណ្ណោះ៕