Toyota ផលិតរថយន្តដើរដោយថាមពលអ៊ីដ្រូហ្សែនមិនប៉ះពាល់ដល់បរិស្ថាន

2014-11-19 22:14:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្តល្បីឈ្មោះរបស់ជប៉ុន Toyota នឹងបញ្ចេញរថយន្តស៊េរីថ្មីរបស់ខ្លួនដែលដំណើរការដោយថាមពលអ៊ីដ្រូហ្សែននៅឆ្នាំក្រោយ។ រថយន្ត Toyota Mirai Sedan អាចនឹងដាក់លក់ក្នុងតម្លៃ ៥៧ ៥០០ ដុល្លារនៅឆ្នាំ ២០១៥ ខាងមុខ តែក្រុមហ៊ុនដដែលអះអាងថា តម្លៃអាចធ្លាក់ចុះមកក្រោម ៤៥០០០ ដុល្លារ បើមានកម្មវិធីឧបត្ថម្ភពីរដ្ឋាភិបាលសហព័ន្ធ។

Toyota បញ្ជាក់ទៀតថា រថយន្តស៊េរីថ្មីរបស់ខ្លួនប្រើពេល ៥ នាទីដើម្បីបញ្ចូលអ៊ីដ្រូហ្សែនឲ្យពេញ និងអាចបើកបានចម្ងាយផ្លូវ ៣០០ ម៉ាយ (៤៨២ គីឡូម៉ែត្រ)។ បើនិយាយពីសមត្ថភាពរថយន្តដើរដោយថាមពលអ៊ីដ្រូហ្សែននេះល្អសម្រាប់ការធ្វើដំណើរលើរយៈចម្ងាយផ្លូវឆ្ងាយដូចប្រើសាំងដែរ ហើយជាជម្រើសល្អជាងរថយន្តអគ្គិសនីដែលពិបាកក្នុងធ្វើដំណើរឆ្ងាយបែបនេះ។ មិនតែប៉ុណ្ណោះវាក៏ល្អចំពោះបរិស្ថានផងដែរ ព្រោះមិនរំភាយជាតិពុលចេញមកក្រៅទាល់តែសោះ។ តែអ្វីដែលជាបញ្ហាចោទគឺ មិនមានស្ថានីយបញ្ចូលជាតិអ៊ីដ្រូហ្សែនច្រើននៅឡើយ។

ដូច្នេះ Toyota គ្រោងលក់ដំបូងតែនៅរដ្ឋ California ប៉ុណ្ណោះ ព្រោះបច្ចុប្បន្នក្រុមហ៊ុនកំពុងសាងសង់ស្ថានីយបញ្ចូលអ៊ីដ្រូហ្សែនហើយ។ ក្រុមហ៊ុនផលិតរថយន្តល្បីមួយនេះបន្ថែមថា នៅឆ្នាំ ២០១៥ ខាងមុខស្ថានីយចាក់បញ្ចូលអ៊ីដ្រូហ្សែនចំនួន ២០ កន្លែងទៀតនឹងត្រូវដាក់ឲ្យដំណើរការ ហើយ ២៨ កន្លែងផ្សេងទៀតនឹងត្រូវសាងសង់ក្នុងឆ្នាំ ២០១៦ក្នុងរដ្ឋចំនួន ៥ គឺ New York, New Jersey, Massachusetts, Connecticut និង Rhode Island។

បើទោះជាពេលនេះ មិនទាន់មានស្ថានីយអ៊ីដ្រូហ្សែនច្រើនអំណោយផលដល់រថយន្តប្រភេទនេះ គេរំពឹងថា ទៅថ្ងៃអនាគតវានឹងក្លាយជាមធ្យោបាយធ្វើដំណើរថ្មីដ៏មានសក្ដានុពល ត្បិតមិនផ្ដល់ផលប៉ះពាល់ដល់បរិស្ថានដូចរថយន្តប្រើប្រេងសាំងសព្វថ្ងៃ៕

អាន៖ iOS និង Android មួយណាខ្លាំងជាងមួយណា?

ប្រែសម្រួល៖ សីហា ប្រភព៖ theverge