នៅថៃក៏ផ្អើលទិញពងមាន់ទុកដែរ តែមកពីមូលហេតុផ្សេង

  • 2020-03-27 01:05:32
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងពាណិជ្ជកម្មថៃ បានគំរាមចាត់វិធានការស្របច្បាប់ប្រឆាំងនឹងការកេងចំណេញ ស្របពេលដែលពលរដ្ឋថៃជាច្រើន កំពុងភ័យស្លន់ស្លោទិញពងមាន់ទុក ខណៈអ្នកលក់មួយចំនួនក៏បានឆ្លៀតឱកាសឡើងថ្លៃទៀតផង។

លោក Manote Chuthapthim ប្រធានសមាគម Layer Chickens Association បានឲ្យដឹងថា តម្រូវការស៊ុតក្នុងរយៈពេល ១០ថ្ងៃកន្លងមកនេះ បានកើនឡើងខ្លាំង ដោយសារតែពលរដ្ឋភ័យខ្លាចការរីករាលដាលនៃឆ្លងជំងឺកូវីដ១៩ និងការដាក់ប្រទេសក្នុងភាពអាសន្ន។ ជាមួយគ្នានេះ ពលរដ្ឋថៃបានទិញស៊ុតទុក បន្ទាប់ពីមានការយល់ច្រឡំថា ពួកគេនឹងត្រូវហាមឃាត់មិនឲ្យចាកចេញពីផ្ទះ។

លោក Manote បាននិយាយថា តម្លៃភាគច្រើនបានកើនឡើងនៅតាមកន្លែងលក់រាយ ខណៈស៊ុតនៅតែដាក់លក់ក្នុងតម្លៃធម្មតា គឺ ២,៨០បាតក្នុងមួយគ្រាប់ ដែលជាតម្លៃចេញពីកសិដ្ឋាន។ លើសពីនេះទៅទៀត កសិករក៏មិនបានស្តុកទុកផលិតផលរបស់ពួកគេដែរ។

ក្រសួងពាណិជ្ជកម្មថៃបានឲ្យដឹងថា ទិន្នផលស៊ុតប្រចាំថ្ងៃនៅតែមានស្ថេរភាព គឺ ៤១លានគ្រាប់ក្នុងមួយថ្ងៃ។ ដោយឡែក ស៊ុតត្រូវបានដាក់លក់ក្នុងតម្លៃ ៣,៥០ ទៅ ៣,៦០បាតក្នុងមួយគ្រាប់ នៅផ្សារកណ្តាលមួយ ក្នុងទីក្រុងបាងកក៕

ប្រភព៖ Bangkokpost   ប្រែ​សម្រួល៖ សេង ឡុង