Miley Cyrus ត្រៀមចំណាយជិត ១ម៉ឺនដុល្លារជប់លៀងឲ្យជនអនាថា

2014-11-22 18:22:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងអាមេរិក Miley Cyrus បានត្រៀមប្រាក់ចំនួន ៦០០០ផោន (ប្រហែល ៩៤០០ដុល្លារ) ដើម្បីរៀបចំពិធីជប់លៀងមួយសម្រាប់ជនអនាថាគ្មានផ្ទះសម្បែង ក្នុងរដូវកាលបុណ្យណូអែលខាងមុខនេះ។

ប្រភពមួយបានប្រាប់សារព័ត៌មាន Daily Star ថាតារាចម្រៀងវ័យ ២១ឆ្នាំ ដែលធ្លាប់តែមានរឿងចម្រូងចម្រាសមិនចេះចប់ដោយសារកាយវិការអាសអាភាសនៅលើឆាក កំពុងព្យាយាមបង្ហាញពីការយកចិត្តទុកដាក់របស់ខ្លួនចំពោះជនក្រីក្រ ដោយបានជួលចុងភៅម្នាក់ និងអ្នកបម្រើជាច្រើននាក់ទៀត ដើម្បីរៀបចំពិធីជប់លៀងឲ្យពួកគេ។

ប្រភពមួយនេះបាននិយាយថា "មនុស្សភាគច្រើនធ្លាប់តែឃើញ Miley មានកាយវិការប្លែកៗពេលសម្ដែង។ ប៉ុន្តែតាមពិតនាងគឺជាមនុស្សម្នាក់ដែលចេះយកអាសាអ្នកដទៃ ជាពិសេសចំពោះជនអនាថា"។

ក្រៅពីការបម្រើអាហារ តារាចម្រៀង ដែលកំពុងសាងស្នេហ៍ជាមួយមិត្តប្រុសវ័យ ២១ឆ្នាំ Patrick Schwarzenegger ក៏នឹងរៀបចំឲ្យមានការលេងល្បែងកម្សាន្តសម្រាប់ភ្ញៀវចូលរួម ព្រមទាំងការសម្ដែងរបស់នាងផងដែរ។

នេះមិនមែនជាលើកទីមួយទេដែល Miley Cyrus បានបង្ហាញទឹកចិត្តចំពោះជនអនាថា ដោយកាលពីខែសីហា កន្លងទៅនេះនាងបាននាំជនអនាថាម្នាក់ឈ្មោះ Jesse Helt មកទទួលពានរង្វាន់ជំនួសនាងលើឆាកកម្មវិធី MTV Video Music Awards។ នៅពេលនោះ Miley បាននិយាយថា "មនុស្សដែលគ្មានផ្ទះសម្បែង សុទ្ធតែរស់នៅក្នុងជីវិតលំបាកវេទនា ដូចជា Jesse អីចឹង។ ខ្ញុំសង្ឃឹមថានេះគឺជាការចាប់ផ្ដើមនៃការពិភាក្សាអំពីទុក្ខលំបាករបស់យុវជនដែលគ្មានផ្ទះរស់នៅ និងការស្វែងរកវិធីដើម្បីបញ្ចប់បញ្ហានេះ" ៕