ហាងនានាទប់មិនឈ្នះ iPhone តម្លៃទាបលក់ពីក្រុមហ៊ុន

2014-11-26 19:00:48
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីក្រុមហ៊ុន Smart និង iOne បាននាំ iPhone 6/6Plus មកលក់ជាផ្លូវការនៅទីផ្សារប្រទេសកម្ពុជា បានធ្វើឲ្យបណ្ដាហាងនានាមានការព្រួយបារម្ភ ដោយសារតែតម្លៃលក់ចេញពីក្រុមហ៊ុនទាបជាងតម្លៃលក់នៅតាមហាងនានា ដែលធ្វើឲ្យប៉ះពាល់ទីផ្សារទិញប្រើប្រាស់របស់អតិថិជន។

លោក សុខ លី ម្ចាស់ហាងលក់ទូរសព្ទសុខ លី បានឲ្យដឹងថា ការលក់របស់លោកកំពុងរងផលប៉ះពាល់ជាខ្លាំង បន្ទាប់ពីក្រុមហ៊ុនបាននាំចូល iPhone 6/6Plus មកលក់ជាផ្លូវការ និងលក់ក្នុងតម្លៃទាបជាងទីផ្សារខាងក្រៅ។

“គេលក់ទាបជាងយើង យើងប្រាកដជាស្លាប់ហើយពេលនេះ ដោយសារតែយើងមិនអាចប្រកួតប្រជែងតម្លៃគេបាន"។

ម្ចាស់ហាងរូបនេះបញ្ជាក់ថា លោកមិនអាចបន្ទាបតម្លៃបានទេដោយសារការទិញចូលមកថ្លៃ ហើយបើលក់ថោកជាងនេះ នឹងឡុងចុងជាមិនខាន។

អាជីវករលក់ទូរសព្ទមួយរូបទៀតក៏បង្ហាញការព្រួយបារម្ភដូចគ្នា។ លោក ផេង ម្ចាស់ហាងលក់ទូរសព្ទមួយរូបនៅម្តុំផ្សារដើមគរប្រាប់ថា ការលក់នៅហាងរបស់លោកក៏មានការធ្លាក់ចុះជាខ្លាំងនៅមួយរយៈចុងក្រោយនេះ។

“ចាប់តាំងពីក្រុមហ៊ុនប្រកាសនាំ iPhone មកលក់ និងអះអាងពីតម្លៃទាបជាងទីផ្សារខាងក្រៅ ធ្វើឲ្យការលក់របស់យើងចាប់ផ្ដើមថយចុះ"។

Smart បានប្រកាសលក់ iPhone 6 ចាប់ពីតម្លៃ ៧២៨ ដុល្លារ ដោយភ្ជាប់ជាមួយការធានាពី Apple រួមទាំងការផ្តល់អត្ថប្រយោជន៍ជាច្រើនទៀត ខណៈដែលក្រុមហ៊ុន iOne ដែលជាក្រុមហ៊ុនទទួលបានសិទ្ធិក្នុងការនាំ iPhone មួយទៀតមកលក់លើទីផ្សារប្រទេសកម្ពុជា ក៏ដាក់លក់ក្នុងតម្លៃទាបជាងទីផ្សារខាងក្រៅនិងផ្តល់ការធានាផងដែរ។

ម្ចាស់ហាងរូបនេះថា តម្លៃរបស់ក្រុមហ៊ុនទាបជាងទីផ្សារនៅតាមហាង ជាពិសេសគេថែមទាំងផ្តល់អត្ថប្រយោជន៍ជាច្រើនទៀត ទើបធ្វើឲ្យអតិថិជនងាកទៅទិញប្រើប្រាស់ iPhone ពីក្រុមហ៊ុនច្រើន។

អាន៖ Smart អះអាងតម្លៃលក់ iPhone របស់ខ្លួនស្តង់ដាចេញពី Apple

អាន៖ Samsung អះអាងពីកាន់កាប់ទីផ្សារទូរទឹកកកនៅកម្ពុជា

អត្ថបទ៖ ប៊ុណ្ណារ៉ា