លទ្ធផលសរុបរួមរបស់ក្រុមកីឡាកម្ពុជានៅ Asian Games គិតត្រឹមព្រឹកនេះ

2014-09-26 18:38:19
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមថ្ងៃទី៦នៃព្រឹត្តិការណ៍ Asian Games ក្រុមកីឡាជម្រើសជាតិកម្ពុជាបានប្រកួត៣ប្រភេទកីឡាហើយក្នុងចំណោមកីឡា៨ប្រភេទដែលបញ្ជូនទៅចូលរួមការប្រកួត ប៉ុន្តែមិនទាន់ទទួលបានមេដាយណាមួយឡើយ។

កីឡាវាយកូនបាល់

កីឡាវាយកូនបាល់កម្ពុជាបានប្រកួតវិញ្ញាសាវាយទោលបុរស នារី និងគូបុរសហើយ។ ការវាយទោលបុរស ឡុង សំនៀងចាញ់ដៃគូទួរមេនីស្ថាន ២-០ (៦-១, ៦-០) ប៉ុន្តែម៉ម ផល្គុនឈ្នះដៃគូទួរមេនីស្ថាន ២-១ (៤-៦, ៦-៣ និង ៧-៥)។ ចំណែកការវាយទោលនារី កីឡាការិនីខ្មែរ-បារាំង Andrea Ka ចាញ់អ៊ូបេគីស្ថាន២-០ (៦-២, ៦-២)។

ការប្រកួតបន្ទាប់ ម៉ម ផល្គុន ផ្តួលកីឡាករអារ៉ាប៊ីសាអ៊ូឌីត Omar Fahmi ២-០ (៦-១, ៦-៣) ខណៈឡុង សំនៀងចាញ់គីហ្ស៊ីគីស្ថានដោយលទ្ធផល២-០ (៦-១, ៦-១) ហើយម៉ម ផល្គុនចាញ់កីឡាករលេខ១ចិន ២-០ (៦-០, ៦-១)។

ចំពោះការវាយគូបុរស-នារី កីឡាករ ម៉ម ផល្គុន និង Andrea Ka បានផ្តួលជើងខ្លាំងនេប៉ាល់ Mehernissa និង Sakchyam ដោយលទ្ធផល ២-០ (៦-០,៦-១)។ ការប្រកួតបន្ទាប់ ផល្គុន និង Andrea ត្រូវប្រឈមនឹងជើងខ្លាំងចិន Zheng Jie និង Zhang Ze នៅថ្ងៃនេះ។

កីឡាបាល់ទះលើឆ្នេរខ្សាច់

ចំពោះការប្រកួតកីឡាបាល់ទះលើឆ្នេរខ្សាច់វិញ ក្រុមកម្ពុជាបានបញ្ចប់ការប្រកួតរបស់ខ្លួនហើយ បន្ទាប់ពីទទួលបានជ័យជម្នះ១ និងចាញ់២។ បើកឆាកដំបូងក្រុមបាល់ទះឆ្នេរខ្សាច់កម្ពុជាចាញ់ក្រុមប្រទេសស្រីលង្កាដោយលទ្ធផល ២-១ (២៣-២១, ១៨-២១ និង ១៥-១២)។

បន្ទាប់មកក្រុមកម្ពុជាទទួលបានជ័យជម្នះលើក្រុមបង់ក្លាដេសដោយលទ្ធផល ២-០ (២១-១៣, ២១-១៨) ប៉ុន្តែអស់ឱកាសឡើងទៅជុំបន្ទាប់ក្រោយចាញ់ប្រទេសកាតារដោយលទ្ធផល ២-១ (២៣-២១, ១២-១៩ និង ២១-១៥)។

កីឡាហែលទឹក

និយាយពីកីឡាហែលទឹកវិញកីឡាករត្រកូលហែមធ្វើបានល្អគួរសម ប៉ុន្តែមិនអាចឡើងទៅជុំបន្ទាប់បានទេ បន្ទាប់ពីប្រៀបនឹងនឹងកីឡាករផ្សេង។

អ្នកហែលទឹកបុរសលេខ១កម្ពុជា ហែម ថុនពន្លឺ បើកការប្រកួតដំបូងជាប់លំដាប់លេខ១នៅ Heat 1 សម្រាប់វិញ្ញាសា Free Style ចម្ងាយ៥០ម៉ែត្រ។ ការទទួលបានលេខ១នៅ Heat 1 នេះមិនបានធ្វើឲ្យជើងខ្លាំងកម្ពុជារូបនេះឡើងទៅជុំបន្ទាប់ឡើយដោយសារពន្លឺប្រើថេរៈវេលាបាន២៧.៤៦វិនាទីស្ថិតនៅលេខ ៣៦ ក្នុងចំណោម៤២បេក្ខជន។

វិញ្ញាសាទី២ Breaststroke ចម្ងាយ៥០ម៉ែត្រ ហែម ថុនពន្លឺនៅតែធ្វើបានល្អដូចវិញ្ញាសាទី១ បន្ទាប់ពីជាប់លេខ១នៅ Heat 1 ក្នុងចំណោម៧ប្រទេសផ្សេងទៀត ប៉ុន្តែនៅតែមិនសំណាងល្អដោយស្ថិតនៅលេខ២២ ក្នុងចំណោមបេក្ខជន២៧នាក់។

កីឡាការិនីលេខ១កម្ពុជា ហែមថុន វិទីនី ប្រកួតលើកទី១ស្ថិតនៅលេខរៀងទី៦នៅ Heat ៣ សម្រាប់វិញ្ញាសា Breaststroke ចម្ងាយ៥០ម៉ែត្រ។ កីឡាការិនីរូបស្រស់ម្នាក់នេះធ្វើបានល្អសម្រាប់វិញ្ញាសាទី២ freestyle ចម្ងាយ៥០ម៉ែត្រដោយជាប់ចំណាត់ថ្នាក់លេខ១នៅ Heat 1 ប៉ុន្តែនៅតែគ្មានឱកាសឡើងទៅជុំបន្ត បន្ទាប់ពីប្រៀបធៀបជាមួយបេក្ខនារីផ្សេង កញ្ញាស្ថិតនៅលេខរៀងទី២០ក្នុងចំណោម៣៩ប្រទេសផ្សេងទៀត។

ប្រភេទកីឡាផ្សេងទៀត

ប្រភេទកីឡារបស់កម្ពុជាដែលមិនទាន់ប្រកួត ភាគច្រើនជាកីឡាមានសក្ដានុពល និងសង្ឃឹមទទួលបានមេដាយជូនជាតិមាតុភូមិ។ កីឡាដែលមិនទាន់ប្រកួតរួមមានចំបាប់ តេក្វាន់ដូ យូដូ Soft Tennis និងរត់ប្រណាំង។

កាលស៊ីហ្គេមឆ្នាំ២០១៣នៅប្រទេសមីយ៉ាន់ម៉ា តេក្វាន់ដូ និងចំបាប់ជាអ្នកនាំមេដាយមាស និងប្រាក់ជួនជាតិបានច្រើនជាងគេ។ ចាំមើល ឌន សៅ, ចូវ សុធារ៉ា, ស៊ន ដាវីន និងស៊ន សៀវម៉ី នឹងធ្វើបានល្អដូចកាលនៅស៊ីហ្គេមទេ?

ព្រឹត្តិការណ៍កីឡា Asian Games លើកទី ១៧ ដែលរៀបចំនៅទីក្រុង Incheon ប្រទេសកូរ៉េខាងត្បូង ដែលនឹងចាប់ផ្ដើមនៅថ្ងៃទី ១៩ កញ្ញា ដល់ ៤ តុលា ឆ្នាំ ២០១៤៕

អត្ថបទ៖ ជាន ចាន់រ៉ា

ប្រភព៖ NOCC