ចម្រៀង១បទ ធ្វើឲ្យតារាសម្ដែងស្រីម្នាក់ត្រូវកាត់ទោសឲ្យជាប់គុក ២៦ឆ្នាំ
- 2014-11-27 17:15:23
- ចំនួនមតិ 0 | ចំនួនចែករំលែក 0
ចម្រៀង១បទ ធ្វើឲ្យតារាសម្ដែងស្រីម្នាក់ត្រូវកាត់ទោសឲ្យជាប់គុក ២៦ឆ្នាំ
ចន្លោះមិនឃើញ
តារាសម្ដែង Bollywood ម្នាក់មកពីប្រទេសប៉ាគីស្ថានគឺនាង Veena Malik ត្រូវកាត់ទោសឲ្យជាប់ពន្ធនាគាររយៈពេល ២៦ឆ្នាំ ពីបទចូលរួមអំពើ "ប្រមាថព្រះ" តាមរយៈកម្មវិធីទូរទស្សន៍។
តារាសម្ដែងវ័យ ៣០ឆ្នាំ Malik រួមជាមួយស្វាមី Asad Bashir Khan Khattak, អ្នកគ្រប់គ្រងក្រុមហ៊ុនផលិតកម្មវិធី លោក Mir Shakil-ur-Rahman និងពិធីករកម្មវិធី Shaista Wahidi ត្រូវបានតុលាការប្រឆាំងអំពើភេរវកម្មនៅប្រទេសប៉ាគីស្ថាន កាត់ទោសឲ្យជាប់ពន្ធនាគារម្នាក់ ២៦ឆ្នាំ និងពិន័យជាទឹកប្រាក់ម្នាក់ ១,៣លានរូពីប៉ាគីស្ថាន (ប្រហែល ១២៧០០ដុល្លារអាមេរិក) ហើយបើសិនជាពួកគេមិនមានលទ្ធភាពបង់ ទ្រព្យសម្បត្តិរបស់ពួកគេនឹងត្រូវដាក់លក់ដើម្បីបង់។ នេះបើតាមរបាយការណ៍របស់សារព័ត៌មាន Times of India។
កម្មវិធីទូរទស្សន៍មួយនេះបានចាក់ផ្សាយកាលពីខែឧសភា ដែលក្នុងនោះ Veena Malik និងស្វាមី បានសម្ដែងឈុតរៀបការមួយ ដោយបានចាក់បទភ្លេងសាសនាឥស្លាម ដែលតុលាការចាត់ទុកថាជាអំពើប្រមាថធ្ងន់ធ្ងរមិនអាចលើកលែងបាន។
ក្រោយពីទទួលបានព័ត៌មាននេះតារាសម្ដែងMalik ដែលបច្ចុប្បន្នកំពុងស្ថិតនៅទីក្រុងឌុយបៃ បាននិយាយប្រាប់សារព័ត៌មាន India Today ថានាងមានជំនឿលើតុលាការប្រទេសប៉ាគីស្ថាន ហើយនាងជឿជាក់ថាសេចក្ដីសម្រេចចុងក្រោយនឹងផ្ដល់យុត្តិធម៌ឲ្យនាង។ នាងនឹងត្រលប់មកប្រទេសប៉ាគីស្ថាននៅខែធ្នូ ដើម្បីប្ដឹងតវ៉ាចំពោះករណីនេះ។
ក្រៅពីអាជីពជាតារាសម្ដែង Malik គឺជាតារាម៉ូដែល និងពិធីការិនីម្នាក់។ នាងបានរៀបការជាមួយស្វាមីកាលពីឆ្នាំ២០១៣ និងទើបតែសម្រាលបានកូនប្រុសមួយកាលពីខែកញ្ញាកន្លងទៅ ៕
ទស្សនាវីដេអូសម្ដែងដែលធ្វើឲ្យ Malik រងការចោទប្រកាន់៖ http://youtu.be/o9TR6j-jTnY