កំពូលអ្នកមាន! ចំណាយប្រាក់រាប់ម៉ឺនដុល្លារ បាញ់ដំរីកម្សាន្តអារម្មណ៍

2014-11-28 00:14:05
ចំនួនមតិ 0 | ចំនួនចែករំលែក 0

ចន្លោះមិនឃើញ

មហាសេដ្ឋីកសិកម្ម Ioan Niculae ដែលគេជឿថាជាអ្នកមានជាងគេបំផុតនៅក្នុងប្រទេសរ៉ូម៉ានី បានចំណាយប្រាក់ជាច្រើនម៉ឺនដុល្លារ ដើម្បីបាញ់ដំរីជាការកម្សាន្តអារម្មណ៍នៅទីក្រុងមួយ ស្ថិតក្នុងខេត្តLimpopo របស់ប្រទេសអាហ្វ្រិកខាងត្បូង។

បន្ទាប់ពីបាញ់រួច មហាសេដ្ឋីទឹកប្រាក់ពាន់លាននេះ បានកុម្ម៉ង់ឲ្យអ្នកជំនាញព្រលះយកស្បែកដំរី ពាសលើសំឡីជារូបសិប្បនិម្មិតយកទៅប្រទេសរបស់ខ្លួនវិញ។ អ្នកជំនាញខាងសូនរូប បានចំណាយពេល ៧ខែ ព្រលះយកស្បែក ដើម្បីទុកឲ្យស្ងួត ងាយស្រួលយកទៅពាសជារូបសិប្បនិម្មិតនោះ។

ការបាញ់ដំរី ត្រូវចំណាយអស់ ២០០០០ផោន (ជាង ៣ម៉ឺនដុល្លារ) ហើយថ្លៃឈ្នួលលើការព្រលះ និងសូនចេញជារូបសិប្បនិម្មិតត្រូវចំណាយអស់ ៣០០០០ផោនទៀត (ជិត ៥ម៉ឺនដុល្លារ)។ សរុបទាំងអស់ លោកត្រូវចំណាយអស់ប្រាក់ប្រហែល ៨ម៉ឺនដុល្លារ ក្នុងការនាំយកដំរីសិប្បនិម្មិត និងរូបសត្វ ១៩ផ្សេងទៀត ទៅកាន់ប្រទេសរ៉ូម៉ានីវិញ។

បុរសវ័យ ៥១ឆ្នាំ លោក Deiter Ochsenbein ដែលជាម្ចាស់ក្រុមហ៊ុនពាសស្បែកសត្វ និងជាអ្នកទទួលការកុម្ម៉ង់របស់មហាសេដ្ឋីរ៉ូម៉ានី បាននិយាយថា "ពាសស្បែកដំរីយូរខ្លាំងណាស់...... ពេលនៅរស់ ដំរីមានទម្ងន់ប្រហែល ៤តោនកន្លះ.... តែពេលព្រលះយកសាច់ចេញ ដាក់សំឡីជំនួសចូលក្នុងស្បែកវិញ វានៅសល់ត្រឹមតែកន្លះតោនទេ"។

ការងារនេះត្រូវចំណាយកម្លាំងមនុស្ស ៦នាក់ ដើម្បីបំពេញគ្រោងដំរីទាំងមូល ដែលធ្វើឡើងពីបំណែក ៤៧ផ្នែក។ លោក Deiter បានឲ្យដឹងទៀតថា ភ្លុកក៏ដាក់ជំនួសដោយរបស់សិប្បនិម្មិតដែរ ចំណែកឯភ្លុកដើមអាចត្រូវដាក់នៅក្នុងកេះដាច់ដោយឡែក។

រូបដំរីសិប្បនិម្មិតដែលអ្នកជំនាញធ្វើរួច និងពាសដោយស្បែកដំរី

លោក Ioan Niculae គឺជាអ្នកមានជាងគេក្នុងប្រទេសរ៉ូម៉ានី និងជាមហាសេដ្ឋីលំដាប់ថ្នាក់ទី ១៣៧២ របស់ពិភពលោក ជាមួយទ្រព្យសម្បត្តិ ១,១ពាន់លានដុល្លារ។ នេះបើតាមការចាត់ថ្នាក់របស់ទស្សនាវដ្ដី Forbes នៃសហរដ្ឋអាមេរិក។

ចុចអាន៖ ជីវិតកូនអ្នកមានចិនរៀននៅអាមេរិក ជិះសុទ្ធតែឡានកប់ស៊េរី

ប្រែសម្រួល៖ គង់ វិសាល

ប្រភព៖ dailymail