ក្មេងសោះឈ្នះអាហារូបករណ៍រៀនដល់បារាំង រើសបានជំនាញត្រូវប៉ាន់ទៀត!

2014-09-26 22:21:07
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតកម្ពុជាដែលបានជាប់អាហារូបករណ៍ទៅសិក្សានៅក្រៅប្រទេសភាគច្រើន គឺរៀនតែជំនាញណាដែលសម្បូរហើយនៅក្នុងស្រុកខ្មែរ ដូចជាសេដ្ឋកិច្ច ភាសាបរទេស ច្បាប់ វិស្វកម្ម ឬពេទ្យជាដើម។ គេកម្រឃើញនិស្សិតខ្មែរដែលជាប់អាហារូបករណ៍ មានឱកាសបានរៀនមុខវិជ្ជាដ៏កម្រ។

ទើបតែយុវជន ចាន់ បញ្ញា បានទទួលអាហារូបករណ៍សិក្សាជំនាញផលិតគំនូរជីវចល ឬតុក្កតា រហូតដល់បួនឆ្នាំ នៅប្រទេសបារាំង។ តាមពិតទៅ មុខវិជ្ជាផលិតតុក្កតានេះក៏មានបង្រៀនដែរតាមអង្គការ ឬវិទ្យាស្ថានក្នុងស្រុក តែពុំសូវផុលផុសនៅឡើយទេ ខណៈជំនាញនេះត្រូវប៉ាន់ណាស់សម្រាប់ផលិតស្ពតពាណិជ្ជកម្ម ឬភាពយន្តតុក្កតា។

-អានអត្ថបទ៖ យុវតីជាប់អាហារូបករណ៍រៀននៅបីប្រទេស ត្រៀមចាប់យកតំណែងនៅUN!

យុវជនដែលមានវ័យទើប២៣ឆ្នាំរូបនេះបានឲ្យដឹងពីស្រុកបារាំងមកថា មុននឹងទទួលបានអាហារូបករណ៍នេះ រូបគេបានចូលរៀនពីការគូររូបក្នុងអង្គការហ្វារពន្លឺសិល្បៈ ឯស្រុកកំណើតរបស់ខ្លួន នាខេត្តបាត់ដំបង ក្នុងឆ្នាំ២០០២។

បញ្ញាបន្តថា៖ “គំនូរគឺជាមូលដ្ឋានគ្រឹះនៃគំនូរជីវចល។ នៅឆ្នាំ២០០៨ នៅពេលគេត្រូវការអ្នកចេះគំនូរឲ្យចូលធ្វើការក្នុងស្ទូដ្យូផលិតតុក្កតារបស់អង្គការហ្វារ ខ្ញុំក៏បានចូលធ្វើការនៅទីនោះតែម្ដង”។

យុវជនរូបនេះបានចូលរួមជាមួយនឹងយុវជនខ្មែរផ្សេងទៀត ធ្វើការក្នុងស្ទូដ្យូនោះ ដោយផលិតបានស្ពតពាណិជ្ជកម្ម និងស្ពតអប់រំច្រើនគួរសមដែរ ឲ្យអង្គការ ឬស្ថាប័នផ្សេងៗក្នុងស្រុក។ លុះឆ្នាំ២០១០ រូបគេក៏បានក្លាយជាគ្រូបង្រៀននៅក្នុងស្ទូដ្យូតុក្កតានោះ ផ្នែករចនារូបភាពខាងក្រោយ (Background Designer of Animation)។

ជារឿយៗ ស្ទូដ្យូនេះតែងមានបរទេសដែលមានជំនាញផ្នែកគំនូរ ឬតុក្កតា ចុះទៅចែករំលែកបទពិសោធន៍ផ្សេងៗដល់យុវជនខ្មែរ។ យុវជនដែលចេះទាំងភាសាអង់គ្លេស និងបារាំងរូបនេះ ទទូលបានការទាក់ទាញជាខ្លាំងពីភ្ញៀវបរទេសដែលចុះទៅទស្សនកិច្ចនៅអង្គការរបស់ខ្លួន។

បញ្ញាថ្លែងថា៖ "នៅពេលនាយកសាលា Pivaut school នាទីក្រុងNantes ប្រទេសបារាំង មកលេងកម្ពុជារយៈពេលពីរសប្តាហ៍ គាត់បានផ្ដល់អាហារូបករណ៍ឲ្យខ្ញុំមកសិក្សានៅប្រទេសបារាំងរហូតដល់៤ឆ្នាំឯណោះ។ ខ្ញុំបានចាកចេញមកស្រុកបារាំងនេះ កាលពីខែសីហា ឆ្នាំ២០១២កន្លងទៅ"។

ប៉ុន្តែមុននឹងចាកចេញទៅកាន់ស្រុកបារាំង យុវជនរូបនេះបានហ្វឹកហាត់ភាសាអង់គ្លេស និងភាសាបារាំងរបស់ខ្លួនថែមទៀត។ យុវជនរូបនេះបញ្ជាក់ថា៖ “តាមពិតទៅ ខ្ញុំមិនមានគម្រោងចង់មកសិក្សានៅប្រទេសបារាំងទេ តែទោះបីយ៉ាងណា ខ្ញុំហាក់ដូចជាបានត្រៀមខ្លួនជាមុន ដូចជាបានរៀនភាសាបារាំងអស់រយៈពេល២ឆ្នាំ និងភាសាអង់គ្លេសពីរបីឆ្នាំដែរ"។

បច្ចុប្បន្ន បញ្ញា កំពុងសិក្សានៅសាលាដ៏ល្បីមួយរបស់បារាំងឈ្មោះថា Ecole Pivaut ដោយរៀនជំនាញផលិតតុក្កតា។ គេស្នាក់នៅក្នុងអន្តេវាសិកដ្ឋានរបស់សាលានោះផ្ទាល់ និងត្រូវចម្អិនអាហារដោយខ្លួនឯង។ ចំណែកការប្រាស្រ័យទាក់ទងជាមួយនិស្សិត ឬប្រជាជននៅទីនោះវិញ គឺពុំចោទជាបញ្ហាទេ ដោយសារយុវជនរូបនេះចេះភាសាបារាំងស្រាប់។ ចំណែកភាសាអង់គ្លេសរបស់គេវិញ ក៏អាចប្រើប្រាស់បានទៀត។

-អានអត្ថបទ៖ ស្អាតហើយពូកែទៀតយកបានអាហារូបករណ៍ទៅអាមេរិក បារាំង និងកូរ៉េ!

តែទោះបីជាយ៉ាងណា ការសិក្សាក្នុងសាកលវិទ្យាល័យមួយ ដែលមានសុទ្ធតែនិស្សិតបរទេស បញ្ហារមេងតែងកើតមានឡើង តែយុវជនរូបនេះបានត្រៀមខ្លួនជាស្រេចក្នុងការប្រឈមមុខចំពោះឧបសគ្គទាំងនោះ។ គេរំពឹងថា នឹងក្រេបយកចំណេះដឹងផ្នែកមុខវិជ្ជាដ៏កម្រនេះមកប្រើប្រាស់ និងចែករំលែកដល់យុវជនខ្មែរផ្សេងទៀត ពេលគេត្រឡប់មកកាន់មាតុភូមិរបស់ខ្លួនវិញ ក្នុងឆ្នាំ២០១៦ខាងមុខ។

យុវជនរូបនេះយល់ថា៖ "ប្រសិនបើយុវជនខ្មែរចង់សិក្សាជំនាញផលិតតុក្កតានេះដែរ ខ្ញុំឲ្យយោបល់ថា គេគួរតែចាប់ផ្ដើមរៀនគូរគំនូរ ដោយសារវាជាមូលដ្ឋានគ្រឹះនៃការផលិតភាពយន្តតុក្កតា"៕

អត្ថបទ៖ មាស រ័ត្ន