ហង្សមាស សាន់ដេ និង Town ពង្រឹងយុទ្ធសាស្ត្រផ្សេងៗគ្នាសម្រាប់ឆ្នាំ ២០១៥!

2014-12-04 13:01:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម រស្មីហង្សមាស សាន់ដេ និង Town បានពង្រឹងយុទ្ធសាស្ត្រផ្សេងៗពីគ្នានៅចុងឆ្នាំ២០១៤ ក៏ដូចជាឆ្នាំ២០១៥ខាងមុខ ដើម្បីស្រូបយកការគាំទ្រពីមហាជន។

ជាក់ស្ដែងផលិតកម្ម រស្មីហង្សមាសពង្រឹងទៅលើវិស័យទូរទស្សន៍ ច្រើនជាងការផលិតចម្រៀង ព្រោះផលិតកម្មនេះទើបតែបង្កើតទូរទស្សន៍ ហើយបាននាំយកកម្មវិធីល្អជាងច្រើនពីបរទេស ដូចជា The Voice Cambodia និង Cambodia's Got Talent កំពុងចាក់ផ្សាយរៀងរាល់សប្ដាហ៍ជាដើម។ ប្រការនេះធ្វើឱ្យការផលិតបទចម្រៀងក្នុងផលិតកម្ម រស្មីហង្សមាស ហាក់មិនសូវជាទទួលការចាប់អារម្មណ៍ច្រើនដូចមុនពីទស្សនិកជនឡើយ។ រីឯផលិតកម្ម សាន់ដេ បានខិតខំពង្រឹងជាខ្លាំងលើវិស័យភាពយន្ត ដោយមួយឆ្នាំៗផលិតកម្មនេះត្រៀមផលិតភាពយន្តឱ្យបានយ៉ាងតិច ២ ទៅ ៣ រឿង ដើម្បីបំពេញតម្រូវការទីផ្សារ។ ដោយឡែកងាកទៅផលិតកម្ម Town ឯណោះវិញគឺពង្រឹងខ្លាំងតែលើការផលិតចម្រៀងតែប៉ុណ្ណោះ ដើម្បីបំពេញតម្រូវការអ្នកគាំទ្ររបស់ខ្លួន។ ទាក់ទងនឹងការពង្រឹងយុទ្ធសាស្ត្រនេះអ្នកចាត់ការទូទៅប្រចាំផលិតកម្មសាន់ដេលោក ឡាយ សុកចំរើន ទទួលស្គាល់ថាផលិតកម្មរបស់ខ្លួនពិតជាយកចិត្តទុកដាក់ខ្ពស់លើវិស័យភាពយន្តពិតប្រាកដមែន។ យកចិត្តទុកដាក់ខ្ពស់ដោយសារតែឃើញទីផ្សារភាពយន្តក្នុងប្រទេសកម្ពុជាមានភាពរីកចម្រើនខ្លាំង។ ទោះជាយ៉ាងណាក៏ដោយលោកអះអាងថា ការផលិតចម្រៀងនៅតែជាអាទិភាពខ្ពស់ដដែល ក្នុងការបំពេញតម្រូវការប្រិយមិត្ត និងមិត្តៗយុវវ័យ។ លោក ឡាយ សុកចំរើន បញ្ជាក់ថា៖"តាមពិតអាទិភាពខ្ពស់របស់យើងគឺការផលិតចម្រៀងឯណោះទេ តែយើងចង់ឱ្យការផលិតកុននេះដើរខ្លាំងដូចយើងផលិតចម្រៀងដែរ។ ចឹងហើយទើបមួយរយៈចុងក្រោយយើងពង្រឹងកុនខ្លាំងបន្តិច"។ ចំពោះបញ្ហានេះដែរ អ្នកចាត់ការទូទៅផលិតកម្ម Town លោក មាស សុខរតនៈ ក៏ទទួលស្គាល់ថា ផលិតកម្មរបស់ខ្លួនគឺពង្រឹងតែវិស័យចម្រៀងមួយមុខប៉ុណ្ណោះ មិនទាន់ចាប់អារម្មណ៍ វិស័យភាពយន្ត ឬទូរទស្សន៍ដូចផលិតកម្មដទៃទៀតឡើយ។

លោកនិយាយថា៖"អូនឃើញស្រាប់ហើយតើ ពេលនេះយើងមានតែចម្រៀងមួយមុខទេត្រូវពង្រឹងខ្លាំង។ ជំហានបន្ទាប់ទៀតត្រូវមានយុទ្ធសាស្ត្របែបណានោះ បងមិនអាចប្រាប់បានទេ ព្រោះជាផ្ទៃក្នុងក្រុមហ៊ុន"។ ចំណែកឯលោក អ៊ិន ទីតូ អ្នកចាត់ចែង និង ដឹកនាំការផលិតប្រចាំផលិតកម្ម រស្មីហង្សមាស មិនធ្វើអត្ថាធិប្បាយទេ ដោយលោកអះអាងថា កំពុងជាប់ប្រជុំ។ យ៉ាងណាក៏ដោយបើគេមើលទិដ្ឋភាពជាក់ស្ដែងក្នុងផលិតកម្មនេះ ការផលិតចម្រៀងនាពេលបច្ចុប្បន្ន ហាក់មិនសូវមានសន្ទុះ និងការគាំទ្រពីទស្សនិកជនច្រើនដូចមុនទេ។ បញ្ហានេះត្រូវគេមើលឃើញថាដោយសារតែផលិតកម្មកំពុងមមាញឹកខ្លាំងក្នុងការផ្ដោតលើវិស័យទូរទស្សន៍។ ជាពិសេសការនាំយកកម្មវិធីល្បីៗលំដាប់ពិភពលោកមកកម្ពុជា ហើយទទួលបានការគាំទ្រជាខ្លាំងពីទស្សនិកជន។ ទាំង រស្មីហង្សមាស សាន់ដេ និង Town សុទ្ធតែមានអ្នកគាំទ្រ និងតារាចម្រៀងល្បីៗច្រើនរៀងខ្លួន។ តាមរយៈការពង្រឹងយុទ្ធសាស្ត្រផ្សេងៗពីគ្នាធ្វើឱ្យផលិតកម្មទាំង៣ទទួលការគាំទ្រពីទស្សនិកជនច្រើនដូចគ្នានាពេលបច្ចុប្បន្ន៕

សូមចុចអាន៖ គាប់ជួនទៀតតារាខ្មែរពីរដួងសុខចិត្តអត់ខ្លួនឯងយកអាហារជួយជនអនាថាក្នុងថ្ងៃតែមួយ សូមចុចអាន៖ រឿងគាប់ជួននឹកស្មានមិនដល់រវាង Coach និងកូនក្រុម សុវណ្ណរាជ-ប៊ុតសីហា សូមចុចអាន៖ តាប៊ុយ អ្នកគ្រប់គ្រងកម្មវិធីលេចធ្លោម្នាក់នៅ MYTV

អត្ថបទ៖ អ៊ីង សុឡា