ប៉ែន សុខអាន៖ ស្ដាយមិនឈ្នះពាន តែបានទាញពិភពលោកឲ្យស្គាល់ខ្មែរ

2014-12-05 17:47:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ែន សុខអាន យុវតីដំបូងគេដែលឡើងទៅប្រកួតវោហារសព្ទពានរង្វាន់ពិភពលោក សោកស្ដាយដែលមិនអាចយកជយលាភីមកប្រទេសបាន តែថាហោចណាស់វត្តមានកញ្ញាក្នុងឆាកថ្វីមាត់ជាភាសាអង់គ្លេសកម្រិតកំពូលនេះ បានលាតត្រដាងប្រាប់ពិភពលោក និងប្រជាជនខ្មែរថា យុវជនខ្មែរឥឡូវក៏មានសមត្ថភាពនិងចំណេះដឹងមិនអន់ដែរ។

«ខ្ញុំមានមោទនភាព និងរីករាយខ្លាំង ប៉ុន្តែវាគួរឲ្យស្ដាយនិងអន់ចិត្តដែលខ្ញុំមិនអាចឈ្នះពានពិភពលោកនោះ»។ សុខអាន វ័យ១៨ឆ្នាំដែលបានផ្ដួលយុវជនឆ្នើមពីប្រទេសនានានៅ អាស៊ីប៉ាស៊ីហ្វិក ដើម្បីយកកៅអីវគ្គពានពិភពលោកធ្វើឡើងនៅក្រុង Leipzig ប្រទេស អាឡឺម៉ង់ កាលចុងខែមុនដែលការប្រកួតនេះ ជាផ្នែកមួយនៃសមាជពិភពលោករបស់បណ្ដាញសភាយុវពាណិជ្ជករអន្តរជាតិ (JCI) ជាង១០០ប្រទេស (2014 JCI World Congress) រៀបរាប់ប្រាប់ Sabay ក្រោយវិលវិញបានជាង១អាទិត្យមកនេះ។

ការប្រជែងពានពិភពលោក ប៉ែន សុខអាន ជើងឯក អាស៊ីប៉ាស៊ីហ្វិក បានតស៊ូជាមួយបេក្ខជន៣នាក់ទៀតដែលជាជើងឯកមកពី អឺរ៉ុប អាមេរិក និងអាហ្វ្រិក លើប្រធានប្រធានបទ « The greatest global movements have been ignited by one visionary individual» ឬ «ចលនាសកលដ៏អស្ចារ្យ កើតឡើងពីសកម្មភាពនៃចក្ខុវិស័យរបស់បុគ្គលម្នាក់ៗ»។

មុនពេលប្រកួតបេក្ខជនម្នាក់ៗមានពេលមួយខែ ដើម្បីស្រាវជ្រាវ និងហ្វឹកហ្វឺនការបកស្រាយប្រធានបទនេះ។ ឯ សុខអាន វិញប្រាប់ថា ដំបូងកញ្ញាប្រមូលគំនិតថាត្រូវនិយាយអ្វី? រួចរៀបចំសរសេរគម្រោងពង្រាងឡើងឲ្យមានបែបបទល្អ។ បន្ទាប់ទៀត ចាប់ផ្ដើមហាត់សមនិយាយ ការប្រើកាយវិការ ឥរិយាបថ ដែលទាក់ទាញ ម្ដងហើយម្ដងទៀតៗ។

អានអត្ថបទ៖ ក្រមាបង់កខ្មែរកំពុងឡើងកូដក្លាយជា Fashion ស៊ីវិល័យនៅប៉ារីស

ប៉ែន សុខអាន និងបេក្ខជនជើងឯកមកពី អាមេរិក អាហ្វ្រិក និង អឺរ៉ុប

ថ្ងៃប្រកួត ប៉ែន សុខអាន និង បេក្ខជន៣ទៀត មានពេលមិនក្រោម៥នាទី និងមិនឲ្យលើស៧នាទី ដើម្បីបកស្រាយប្រធានបទ ដែលមានគណៈកម្មការវាយតម្លៃបីនាក់។ គ្មានការតម្រូវឲ្យបេក្ខជនណាម្នាក់មើលនិងស្ដាប់ការបកស្រាយដៃគូបានទេ ក្រែងច្បិចយកគំនិតល្អៗ។ គឺទាល់តែបេក្ខជនណាមួយនិយាយចប់ ទើបអាចទៅអង្គុយស្ដាប់អ្នកបន្ទាប់បាន។ សុខអាន បរិយាយពីអារម្មណ៍លើឆាកប្រកួតកម្រិតពិភពលោកនិងតំបន់៖ «ខ្ញុំរងសម្ពាធ និងភ័យខ្លាំង បើធៀបកាលជាប់ជើងឯក អាស៊ីប៉ាស៊ីហ្វិក នៅ ជប៉ុន ព្រោះមើលទៅគូប្រជែង៣នាក់ទៀត សុទ្ធតែចាស់ៗនិងមានបទពិសោធន៍ការងារច្រើន ដឹងច្រើន»។

ជាលទ្ធផលក្រោយការបកស្រាយយ៉ាងប្រុងប្រយ័ត្នរៀងៗខ្លួន២ថ្ងៃ លទ្ធផលបានប្រកាស។ តែជាលទ្ធផលសោកស្ដាយសម្រាប់ សុខអាន នៅពេលជយលាភី World Public Speaking Championship នោះ បានធ្លាក់ទៅលោក Paul Akingbola សញ្ជាតិនីហ្សេរីយ៉ា ដែលជាជើងឯកតំណាងឲ្យទ្វីបអាហ្វ្រិក។

ប៉ែន សុអាន ដែលជាប់បាក់និទ្ទេសBកាល២០១៣ រៀបរាប់ថាទោះអន់ចិត្ត ដែលមិនអាចឈ្នះគូប្រជែងបាន តែហោចណាស់វត្តមានជាប្រវត្តិសាស្ត្ររបស់កញ្ញានៅឆាកកំពូលនេះ បានទាញឲ្យពិភពលោក និង អាស៊ី ភ្ញាក់ថា យុវជនខ្មែរក៏មានសមត្ថភាពមិនចាញ់យុវជនខ្លាំងៗលើពិភពលោកឡើយ។ «គឺវាអស្ចារ្យណាស់! មើលទៅគេមិនសូវស្គាល់ខ្មែរយើងសោះ តែពេលហ្នឹងគេចាប់ស្គាល់ ហើយខ្ញុំសង្ឃឹមថាយុវជនខ្មែរយើងដទៃនឹងធ្វើវាបានកាន់តែអស្ចារ្យ»៕

ប៉ែន សុខអាន និងក្រុមថ្នាក់គ្រប់គ្រង JCI កម្ពុជា ដែលដឹកនាំទៅការប្រកួតនៅក្រុង Leipzig

ប៉ែន សុខអាន មុនពេលមានកៅអីប្រកួតពានពិភពលោក កញ្ញាបានជាប់ជើងឯកក្នុងការប្រកួត វោហារសព្ទថ្នាក់ជាតិរៀបចំដោយ JCI កម្ពុជា សាខាចតុមុខ រួចទៅបន្តទៅក្លាយជាជើងឯកប្រចាំតំបន់ គឺពានរង្វាន់ អាស៊ីប៉ាស៊ីហ្វិក នៅប្រទេសជប៉ុន ដោយការផ្ដួលយុវជនពីប្រទេសផ្សេងៗដូចជា ម្ចាស់ផ្ទះជប៉ុន ម៉ុងហ្គោលី ម៉ាឡេស៊ី ហ្វីលីពីន និង ឥណ្ឌា ជាដើម។ សុខ អាន ជាសិស្សភាសាអង់គ្លេសកម្រិតខ្ពស់នៅវិទ្យាស្ថាន AII និងទើបចាប់ផ្ដើមការសិក្សាជំនាញភាសាអង់គ្លេសឆ្នាំដំបូងនៅវិទ្យាស្ថានភាសាបរទេស IFL កាលដើមសប្ដាហ៍នេះ៕

សុខ ដែន តារាក្បាច់គុនខ្មែរ ត្រៀមបង្ហាញឃ្លីបវីដេអូពិសេសដើមឆ្នាំ ២០១៥! ក្រមាបង់កខ្មែរកំពុងឡើងកូដក្លាយជា Fashion ស៊ីវិល័យនៅប៉ារីស

អត្ថបទ៖ ប៉ែន សុផាន់ណា