ស្ដាប់ធាតុស្នូលនេះ បើអ្នកប្រាថ្នាចាប់ផ្ដើមអាជីវកម្មផ្ទាល់ខ្លួន

2014-12-11 15:54:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ការសម្រេចជោគជ័យក្នុងជំនួញរបស់សហគ្រិនម្នាក់ៗ មិនប្រាកដថា ពឹងផ្អែកទាំងស្រុងលើរបៀបរកស៊ី ដែលមានកត់ត្រាស្រាប់ក្នុងសៀវភៅណាមួយទេ។ សម្ភាសមក Sabay កន្លងមកក្រុមសហគ្រិននិយាយថាភាពជោគជ័យគឺទាមទាឲ្យពួកគេមានវិធីសាស្ត្ររៀងៗខ្លួន។ អីចឹង តើសហគ្រិនកម្ពុជាមានវិធីសាស្ត្រយ៉ាងណារុញច្រានជំនួញខ្លួនឆ្ពោះទៅដល់គោលដៅដូចសព្វថ្ងៃនេះ?

អ្នកស្រី ស្រ៊ាត មុំសុភា អាយុ៣១ឆ្នាំ មានក្រុមហ៊ុនរហូតដល់ទៅ៣ក្នុងដៃ

«ដើម្បី អាចក្លាយជាអ្នករកស៊ីជោគជ័យ យុវជនគួរតែគិតគូរ និងរៀបចំផែនការធ្វើអាជីវកម្មនោះឲ្យបានហ្មត់ចត់ និងច្បាស់លាស់។ មិនមែនធ្វើដោយប្រថុយប្រថាននោះទេ។ ដូចពាក្យថា “ប្រថុយខ្លាំង ចំណេញខ្ពស់” ឬ “High Risk; High Return” គឺ អាចជាពាក្យត្រឹមត្រូវ។ ប៉ុន្តែខ្ញុំមិនអនុវត្តតាមទេ។ មុនចាប់ផ្ដើមអាជីវកម្ម អ្នកគួរតែវិភាគថា មុខរបរមួយនោះមានឧបសគ្គអ្វីខ្លះ? យើងមានជំនាញដែរឬអត់? គួរតែចាប់ផ្ដើមពីពេលណាទើបប្រសើរ? តើគូប្រជែងរបស់យើងជាអ្នកណា? សំខាន់មួយទៀត តើមុខរបរនោះស័ក្ដិសមសមត្ថភាពយើងដែរឬទេ? តើយើងអាចទៅរួចដែរ ឬអត់?»។

លោក លឹម ហុកឆាយ នាយកប្រតិបត្តិរបស់ភោជនីយដ្ឋាន The Asian Kitchen

«កុំ គិតថា ទាល់តែកូនអ្នកមានទើបអាចទទួលបានជោគជ័យ។ កូនអ្នកក្រក៏អាចទទួលបានជោគជ័យដែរ ឲ្យតែប្រឹងប្រែង ហើយគិតនូវអ្វីដែលជាក្ដីសង្ឃឹមប្រកបដោយភាពវិជ្ជមាន។ មនុស្សម្នាក់បើគិតពីភាពអវិជ្ជមាន នោះគឺគ្មានសង្ឃឹមអ្វីទាំងអស់។ ត្រូវចងចាំថា មានបញ្ហាទើបមានដំណោះស្រាយ មានឧបសគ្គទើបមានជ័យជម្នះ»។

អានអត្ថបទពាក់ព័ន្ធ៖ ឈាមជ័រកូនខ្មែរ ជាប់ជាតំណាងរាស្ត្រនៅអាមេរិកជាប្រវត្តិសាស្ត្រ

លោក សាំង តារារស្មី នាយកប្រតិបត្តិនៃក្រុមហ៊ុន វ័យ២២ឆ្នាំ

«យុវជនគួរតែឈរលើកត្តាបីដើម្បីជីវិតទទួលបានជោគជ័យ។ ទី មួយ គឺត្រូវមានផែនការប្រចាំជីវិតច្បាស់លាស់ នោះទើបអាចដើរទៅដល់គោលបំណងដែលខ្លួនចង់បាន។ មានតែខ្លួនយើងផ្ទាល់ទេទើបដឹងថា ចង់បានអ្វី ហើយដើម្បីសម្រេចមហិច្ឆតានោះ ត្រូវព្យាយាមធ្វើឲ្យបាន។ ទីពីរ ត្រូវរកបុគ្គលណាម្នាក់ដែលជាបុគ្គលឆ្នើមមកធ្វើជាមនុស្សគំរូ របស់ខ្លួន។ កាលណាយើងមាននរណាម្នាក់ដែលខ្លាំង ហើយអាចទទួលជោគជ័យក្នុងជីវិត យើងនឹងអាចដើរតាមផ្លូវមួយដែលល្អដូចគាត់បាន។

ទីបី យុវជនគ្រប់រូបត្រូវហ៊ានប្រឈមមុខចំពោះបញ្ហា និងទទួលស្គាល់ការពិត។ បុគ្គលមួយចំនួនខឹងច្រឡោត និងប្រតិកម្មតបទៅវិញភ្លាម នៅពេលដែលឮគេនិយាយពីចំណុចខ្សោយ ឬចំណុចមិនល្អរបស់ខ្លួន តែសម្រាប់លោកវិញ មិនដែលគិតដូច្នោះទេ។ ផ្ទុយទៅវិញ ខ្ញុំកាន់តែខិតខំកែតម្រូវចំណុចខ្វះខាតទាំងនោះឲ្យបានល្អ ប្រសើរ»។

លោក សំ ទេត្រា មានអាយុ៣៨ឆ្នាំ ម្ចាស់ក្រុមហ៊ុន២

«ធ្វើការងារអ្វីត្រូវតែធ្វើឲ្យអស់ពីសមត្ថភាព ទើបអាចសម្រេចកិច្ចការគ្រប់ប្រភេទបានដោយជោគជ័យ។ ខ្ញុំមើលឃើញ យុវជនជាច្រើនដែលមកធ្វើការងារហាក់មិនសូវប្រឹងអស់ពីសមត្ថភាពនោះ ទេ។ មានខ្លះធ្វើការខ្លាចថៅកែចំណេញ ពេលញ៉ាំខ្លាចថៅកែខាត ផ្ទុយពីខ្ញុំពេលធ្វើការឲ្យគេដំបូង មានថ្ងៃខ្លះធ្វើលង់រហូតដល់ម៉ោង១យប់ក៏មាន ហើយធ្វើការ គឺខ្ញុំធ្វើឲ្យបានស្អាតបំផុត គុណភាពល្អបំផុត ធ្វើឲ្យអស់ពីសមត្ថភាព។

ធ្វើយ៉ាងនេះយូរទៅគឺមិនខ្វះឱកាសក្នុងការរកចំណូលនោះទេ ដូច្នេះខ្ញុំសង្ឃឹមថា ប្អូនៗ ពេលធ្វើការគួរតែតាំងចិត្តឲ្យបានមុតមាំ ធ្វើឲ្យអស់សមត្ថភាព ធ្វើឲ្យដូចរបស់ខ្លួនឯង និយាយជារួម គឺធ្វើដោយទទួលខុសត្រូវលើ៤កត្តាសំខាន់ៗ គឺ គុណភាព សន្សំសំចៃ សុវត្ថិភាព និងសោភ័ណភាព ពេលនោះអ្នកនឹងទទួលបានជោគជ័យក្នុងជីវិតមិនខាន“។

លោក ម៉ៅ វុត្ថា វ័យ៣៣ឆ្នាំ នាយកក្រុមហ៊ុននាំចូលត្រីសាលម៉ុន និងត្រីធូណាដ៏ធំនៅកម្ពុជា KS Seastar Co., LTD

«យុវជន ត្រូវមានគោលដៅពិតប្រាកដក្នុងចិត្ត និងប្រកាន់គោលជំហរមិនបោះបង់។ បើប្រកបអាជីវកម្ម ដែលមានគូរប្រជែង ត្រូវដឹងពីចំណុចខ្លាំង និងចំណុចខ្សោយរបស់យើង និងរបស់គេ។ ត្រូវដុសខាត់ព្រលឹង ឆន្ទៈ និងទស្សនៈវិស័យរបស់ខ្លួនតាមរយៈការកំណត់គោលដៅខ្លីៗ ហើយប្រឹងប្រែងឲ្យអស់សមត្ថភាព ដូចសុភាសិតខ្មែរពោលថា ព្យាយាមគង់បានសម្រេច»។