ឈាមជ័រកូនខ្មែរ តែបានជាប់ជាតំណាងរាស្ត្រនៅអាមេរិក

2014-11-09 18:18:13
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មុំ រ៉ាឌី (Rady Mom) បានក្លាយជាតំណាងរាស្ត្រជនជាតិខ្មែរ សញ្ជាតិអាមេរិកដំបូងគេ នៅក្នុងសហរដ្ឋអាមេរិក បន្ទាប់ពីឈ្នះការបោះឆ្នោតនៅក្រុង Lowell រដ្ឋ Massachusetts។

តំណាងរាស្ត្រថ្មីវ័យ ៤៥ ឆ្នាំ រូបនេះ គឺជាបេក្ខភាពមកពីគណបក្សប្រជាធិបតេយ្យ ជាមួយប្រធានាធិបតីកំពុងកាន់តំណែង បារ៉ាក់ អូបាម៉ា។ លោកបានទទួលសំឡេងឆ្នោតគាំទ្រ ៦១ ភាគរយ នៃសន្លឹកឆ្នោតទាំងអស់ ដោយយកឈ្នះបេក្ខភាពមកពីគណបក្សសាធារណរដ្ឋ លោក Fred Bahou នៅក្នុងការបោះឆ្នោតពាក់កណ្ដាលអាណត្តិប្រធានាធិបតីកាលពីថ្ងៃអង្គារកន្លងទៅ។

លោក រ៉ាឌី បានចាកចេញពីកម្ពុជាទៅរស់នៅលើទឹកដីសហរដ្ឋអាមេរិកក្នុងវ័យ ១២ ឆ្នាំ នៅពេលដែលប្រទេសកំណើតនេះ ញាំញីទៅដោយភ្លើងសង្គ្រាមក្រោមរបបកម្ពុជាប្រជាធិបតេយ្យ។ មនុស្សជាច្រើននៅក្នុងសហគមន៍របស់បេក្ខភាពវ័យក្មេងនេះ បាននិយាយថា ពួកគេបានទទួលកម្លាំងចិត្តយ៉ាងខ្លាំងពីលោក រ៉ាឌី និង ចូលរួមកាន់តែសកម្មក្នុងកិច្ចការនយោបាយជាងពេលមុនៗ។ បន្ទាប់ពីទទួលជោគជ័យក្នុងការបោះឆ្នោត លោក រ៉ាឌី នឹងក្លាយជាតំណាងរាស្ត្រថ្មីដំបូងគេប្រចាំក្រុង ក្នុងរយៈពេល ១៥ឆ្នាំ ចុងក្រោយនេះ។

នៅក្នុងរដ្ឋធម្មនុញ្ញសហរដ្ឋអាមេរិកផ្នែកទី ២ បានបញ្ជាក់ថា អ្នកដែលមានសិទ្ធិឈរឈ្មោះធ្វើជាតំណាងរាស្ត្រ លុះត្រាតែមានអាយុចាប់ពី ២៥ឆ្នាំឡើង និងចូលសញ្ជាតិអាមេរិករយៈពេល ៧ឆ្នាំរួចមកហើយ។ ចំណែកអាណត្តិតំណាងរាស្ត្រ មានរយៈពេល ២ឆ្នាំ ស្មើនឹងពាក់កណ្ដាលអាណត្តិប្រធានាធិបតី។ ដូចនេះ លោក មុំ រ៉ាឌី មានលក្ខណៈសម្បត្តិគ្រប់គ្រាន់ក្នុងការទទួលបានតំណែងមួយនេះ បើទោះជាលោកមានដើមកំណើតជាខ្មែរក៏ដោយ៕