រឿងមួយចំនួនដែលអ្នកគួរដឹងពីមហាបាតុកម្មដ៏កក្រើកនៅហុងកុង
- 2014-09-30 18:43:21
- ចំនួនមតិ 0 | ចំនួនចែករំលែក 0
រឿងមួយចំនួនដែលអ្នកគួរដឹងពីមហាបាតុកម្មដ៏កក្រើកនៅហុងកុង
ចន្លោះមិនឃើញ
មកទល់ពេលនេះ បាតុកម្មនៅហុងកុងកាន់តែរីកដុះដាលខ្លាំងឡើង ក្លាយជាប្រធានបទដ៏ក្ដៅមួយដែលពិភពលោកកំពុងចាប់អារម្មណ៍។ សិស្ស-និស្សិត និងក្រុមអ្នកតវ៉ារាប់ពាន់នាក់ បានធ្វើការទាមទារសិទ្ធិបោះឆ្នោតជ្រើសរើសមេដឹកនាំហុងកុងនៅឆ្នាំ ២០១៧ ដោយផ្ទាល់ ប៉ុន្តែរដ្ឋអំណាចចិនមិនយល់ព្រម។
ក្រុមអ្នកតវ៉ាលើកទូរសព្ទដៃឡើងព្រមគ្នា ដើម្បីបង្ហាញពីសាមគ្គីភាពប្រឆាំងនឹងប្រទេសចិន
ដើម្បីឲ្យដឹងច្បាស់ពីមហាបាតុកម្មនេះ Sabay បានលើកយករឿងរ៉ាវមួយចំនួនមកបង្ហាញ៖
ហុងកុង គឺជាដែនដីមួយរបស់ប្រទេសចិន ដែលទទួលបានឯករាជ្យពីអង់គ្លេសនៅថ្ងៃទី០១ ខែកក្កដា ឆ្នាំ១៩៩៧។ ទីក្រុងដ៏ស៊ីវិល័យមួយនេះ មានផ្ទៃដីសរុប១១០៤គីឡូម៉ែត្រការ៉េ និងមានប្រជាជនកំពុងរស់នៅប្រហែលជាង ៧លាននាក់។
ក្នុងឆ្នាំ១៨៤២ ហុងកុងបានធ្លាក់ក្រោមអាណានិគមរបស់អង់គ្លេស តាមរយៈសន្ធិសញ្ញាមួយ។ រហូតដល់ឆ្នាំ១៨៩៨ អង់គ្លេសបានចុះអនុសញ្ញាថ្មីមួយទៀត ដោយជួលយកហុងកុងពីចិនក្នុងរយៈពេល ៩៩ឆ្នាំ។ ក្នុងចន្លោះពេលនោះ នាសម័យសង្គ្រាមលោកលើកទី២ ហុងកុងក៏ធ្លាប់ត្រូវបានគ្រប់គ្រងដោយជប៉ុនដែរ។ ទោះយ៉ាងណា អង់គ្លេសបានវិលត្រលប់មកគ្រប់គ្រងហុងកុងវិញក្នុងឆ្នាំ១៩៤៥ បន្ទាប់ពីជប៉ុនចាញ់សង្គ្រាម។
ឆ្នាំ១៩៩៧ ទីក្រុងហុងកុងដែលជាដែនដីអាណានិគមរបស់អង់គ្លេស ត្រូវបានប្រគល់ឲ្យចិនវិញតាមរយៈកិច្ចព្រមព្រៀងដែលធ្វើឡើងតាំងពីឆ្នាំ១៩៨៤។ ពេលនោះ អង់គ្លេសបានប្រគល់ស្វ័យគ្រប់គ្រងស្ទើរទាំងអស់ទៅឲ្យចិន លើកលែងតែកិច្ចការបរទេស និងកិច្ចការពារដែនដី ដែលនឹងប្រគល់ឲ្យក្នុងរយៈពេល ៥០ឆ្នាំបន្ទាប់ទៀត។ ឆ្នាំ២០០៤ ចិនបានសម្រេចថា ត្រូវតែមានការផ្លាស់ប្ដូរចំពោះច្បាប់បោះឆ្នោតរបស់ហុងកុង។
ក្រុមអ្នកគាំទ្រលទ្ធិប្រជាធិបតេយ្យប្រមូលផ្ដុំគ្នានៅជិតវិមានរដ្ឋាភិបាលកាលពីថ្ងៃម្សិលមិញ
ពីខែឧសភា ដល់ខែកក្កដា ឆ្នាំ២០១៤ សកម្មជនគាំទ្រលទ្ធិប្រជាធិបតេយ្យបានធ្វើប្រជាមតិក្រៅផ្លូវការលើកំណែទម្រង់នយោបាយហុងកុង និងមានការប្រមូលផ្ដុំគ្នាដ៏ធំមួយ។ ប៉ុន្តែសកម្មភាពទាំងនោះ ត្រូវបានប្រឆាំងដោយក្រុមសកម្មជនគាំទ្ររដ្ឋាភិបាលក្រុងប៉េកាំង។
ថ្ងៃទី ៣១ ខែសីហា ឆ្នាំ២០១៤ ប្រទេសចិនបានបញ្ជាក់ថា នឹងអនុញ្ញាតឲ្យមានការបោះឆ្នោតដោយផ្ទាល់នៅហុងកុងក្នុងឆ្នាំ២០១៧ ប៉ុន្តែបេក្ខជនដែលឈរឈ្មោះគឺរដ្ឋអំណាចចិនជាអ្នកជ្រើសតាំងទុកជាមុន។ ចាប់ពីពេលនោះមក សកម្មជនគាំទ្រប្រជាធិបតេយ្យនានាបានចាប់ផ្ដើមប្រឆាំងជាបន្តបន្ទាប់។
ថ្ងៃទី ២២ ខែកញ្ញា ឆ្នាំ២០១៤ ក្រុមសិស្ស-និស្សិត បានចាប់ផ្ដើមធ្វើពហិកាមិនចូលរៀនមួយសប្ដាហ៍ ដើម្បីចូលរួមធ្វើបាតុកម្ម។ រហូតមកដល់ពេលនេះ ការតវ៉ាកាន់តែឡើងកម្ដៅ ខណៈសមត្ថកិច្ចឈានដល់ការប្រើឧស្ម័នបង្ហូរទឹកភ្នែកបំបែកហ្វូងបាតុករដែលមានការកើនឡើងជាលំដាប់។
ចំណែកឯការបោះឆ្នោតជ្រើសរើសមេដឹកនាំក្រុងហុងកុងនឹងត្រូវធ្វើឡើងក្នុងឆ្នាំ ២០១៧ ហើយឆ្នាំ ២០៤៧ ខាងមុខ កិច្ចព្រមព្រៀងបច្ចុប្បន្នជាមួយអង់គ្លេសនឹងត្រូវផុតសុពលភាព។
អ្នកតវ៉ាម្នាក់កំពុងជូនផ្កាដល់ប៉ូលិសបង្ក្រាបកុប្បកម្ម
ដោយ៖ គង់ វិសាល
ប្រភព៖ bbc, channelnewsasia