ក្នុង​ថ្ងៃ​ណូអែល​ Sabay សូម​ណែ​នាំ​ប្រិយមិត្ត​ប្រើប្រាស់​បណ្ដាញ​សង្គម Gift ​ដែល​ជា​ស្នា​ដៃ​របស់​កូន​ខ្មែរ​ឲ្យ​បាន​យល់​កាន់​តែ​ច្បាស់​នឹង​កម្សាន្ត​រីករាយ​លើ​ប្រព័ន្ធ​ប្រតិបត្តិការ​ iOS ។​​​

http://youtu.be/HxP0r6cE-Q4

លោក​ សុខ សុភ័ក្រ្ត អ្នក​គ្រប់​គ្រង​ការិយាល័យ​នៃ​ក្រុម​ហ៊ុន Rise Up Cambodia បាន​ឲ្យ​ដឹង​ថា ​មូលហេតុ​ដែល​ក្រុមហ៊ុន​​​បង្កើត​កម្មវិធី Gift នេះ​ឡើង ​ព្រោះ​យល់​ថា​ប្រិយមិត្ត​ប្រើប្រាស់​បណ្ដាញ​សង្គម​ភាគច្រើន​នៅ​ពេល​ពួក​គេ​​ទទួល​បាន​កាដូ​ឬ​វត្ថុ​អនុស្សាវរីយ​អ្វី​មួយ​គឺ​ប្រហែល​ជា​ចង់​និយាយ​ថា​អរគុណ​ឬ​បង្ហាញ​ពី​អារម្មណ៍​សប្បាយ​រីករាយ​ទៅ​កាន់​ម្ចាស់​កាដូ។ តែ​បើ​និយាយ​ពី​បណ្ដាញ​សង្គម​គឺ​មាន​ច្រើន​ ប៉ុន្តែ​បញ្ហា​សំខាន់​ប្រិយមិត្ត​មិន​ដឹង​ថា​តើ​គួរ​ជ្រើសរើស​បណ្ដាញ​សង្គម​មួយ​ណា​ដើម្បី​បង្ហាញ​ ពី​អារម្មណ៍​ទាំង​នោះ​ព្រោះ​បណ្ដាញ​សង្គម​មួយ​ចំនួន​គឺ​ឡូកឡំ​ទៅ​ដោយ​រូបភាព ​រំខាន​អារម្មណ៍​ជាច្រើន​ដូចជា​រូបភាព​អាសអាភាស​ឬ​ក៏​រូបភាព​គ្រោះថ្នាក់​ ចរាចរណ៍​ជា​ដើម។ ដូច្នេះ​ហើយ​ទើប​លោក​ផ្ដើម​គំនិត​បង្កើត​កម្មវិធី​មួយ​នេះ​ឡើង​ដែល​អាច​ឲ្យ​ ​ប្រិយមិត្ត​ចូលចិត្ត​ប្រើប្រាស់​បណ្ដាញ​សង្គម​អាច​ចែក​រំលែក​ភាព​សប្បាយ​ រីករាយ​ទៅ​កាន់​មិត្តភ័ក្ដិ​បង​ប្អូន​ និង​ក្រុម​គ្រួសារ​តាម​រយះ​ការ​ផុស​រូបភាព​កាដូ​អនុស្សាវរីយ៍​ដែល​ទទួល​បាន​ នៅ​ថ្ងៃ​ខួប​កំណើត​ឬ​ក៏​ថ្ងៃ​ខួប​អាពាហ៍ពិពាហ៍​របស់​ពួក​គេ​ជា​ដើម។

លោក​បន្ត​ថា ប្រិយមិត្ត​ដែល​បាន​ចូល​រួម​លេង​ប្រើប្រាស់​ផ្សេង​ទៀត​ក៏​អាច​ចូល​មក Like , Comment បាន។ ក្រៅ​ពី​នេះ​នៅ​មាន​មុខងារ​សំខាន់​មួយ​ផ្សេង​ទៀត​ដែល​អាច​អោយ​រក្សា​ទំនាក់ទំនង​នឹង​មិត្តភ័ក្ដិ​ ក្រុម​គ្រួសារ​របស់​ពួកគេ​អោយ​កាន់​តែ​ស្និទ្ធស្នាល​ថែម​ទៀត​ទោះ​បី​ជា​ពួកគេ​នៅ​ទី​ណា​ក៏​ដោយ​នោះ​គឺ​ការ​ផ្ញើ​កាត​ជូនពរ​ក្នុង​ព្រឹត្តិការណ៍​អ្វី​មួយ។ កាន់​តែ​ពិសេស​ជាង​នេះ​ទៅ​ទៀត​គឺ​កម្មវិធី​ Gift អាច​ជួយ​ដល់​ប្រិយមិត្ត​ប្រើប្រាស់​ណា​ដែល​មិន​ដឹង​ថា​គួរ​ទិញ​កាដូ​បែប​ណា​ជូន​មិត្តភ័ក្ដិ​ដោយ​​គ្រាន់​តែ​ចូល​មក​មើល​ក្នុង​ទំព័រ​ប្រជាប្រិយ​របស់​កម្មវិធី​ប្រិយមិត្ត​ទាំង​នោះ​នឹង​អាច​ដឹង​ថា​មនុស្ស​វ័យ​ណា​ចូលចិត្ត​កាដូ​បែប​ណា​ហើយ​អាច​ទិញ​តម្រូវ​តាម​ចិត្ត​ពួក​គាត់​បាន។ មួយ​វិញ​ទៀត ប្រិយមិត្ត​ក៏​អាច​ចូល​ទៅ​ក្នុង​ទំព័រ​ប្រតិទិន​ដើម្បី​កត់​ត្រា​ព្រឹត្តិការណ៍​ផ្សេងៗ​ដែល​ធ្វើ​អោយ​ពួក​គាត់​មាន​អារម្មណ​ថា​មាន​សៀវភៅ​កំណត់​ហេតុ​មួយ​ក្បាល​នៅ​ជាប់​នឹង​ខ្លួន​ផង​ដែរ។

លោក​បាន​បន្ថែម​ថា​ បច្ចុប្បន្ន​កម្ម​វិធី Gift ទើប​តែ​ចេញ version ដំបូង1.0.0 ហើយ​ខាង​លោក​ក៏​គ្រោង update version បន្ទាប់ 1.0.1 នៅ​មុន​ថ្ងៃ​ណូអែល។ ប៉ុន្តែ​ការងារ​បញ្ចូល​មុខងារ​ថ្មីៗ​មាន​ច្រើន​ទើប​មិន​អាច​ធ្វើ​ទាន់​ពេល​ដូច្នោះ​​ក៏​លើក​ទៅ​អំឡុង​ខែ​មករា​ឆ្នាំ​ ២០១៥ វិញ។ យ៉ាង​ណា​​ប្រិយមិត្ត​នៅ​តែ​អាច​ប្រើប្រាស់ ​ចែក​រំលែក​រូបភាព​កាដូ​ក៏​ដូចជា​ផ្ញើ​កាត​ជូនពរ​ទៅកាន់​ក្រុម​គ្រួសារ​ឬ​មិត្តភ័ក្ដិ​បងប្អូន​នៅ​ថ្ងៃ​ណូអែល​នេះ​ផង​ដែរ។

ជា​ចុង​ក្រោយលោក​ក៏​ស្នើ​សុំ​ដល់​ប្រិយមិត្ត​ប្រើប្រាស់​កម្មវិធី ​Gift ទាំងអស់​យោគ​យល់​នឹង​ជួយ​គាំ​ទ្រ​ស្នាដៃ​ក្រុម​លោក​ តាម​រយះ​ការ​ចែក​រំលែក​រូប​កាដូ​ស្អាតៗ​ ​ចៀសវាង​ការ​ចែក​រំលែក​រូបភាព​ដែល​មិនមែន​ជា​កាដូ​ដូច​ជា​រូបភាព​មនុស្ស Selfie  ឬ​រូបភាព​គ្រោះថ្នាក់​ផ្សេងៗ​ជាដើម។ ជា​ពិសេស​សូម​ស្វែង​យល់​ឲ្យ​​បាន​ច្បាស់​ពី​គោល​បំណង​ចម្បង​របស់​កម្មវិធី​ ចៀសវាង​ការ​ប្រើ​ខុស​គោលដៅ​នាំ​​ឲ្យ​ស្នាដៃ​កូន​ខ្មែរ​មិន​មាន​ភាព​ល្បីល្បាញ​ដូច​គេ ព្រោះ​លោក​ចង់​អោយ​កម្មវិធី Gift នេះ​ក្លាយ​ទៅ​ជា​កម្មវិធី​មួយ​អាច​ជួយ​មនុស្ស​គ្រប់​ជាតិ​សាសន៍​ប្រើប្រាស់​វា​ដើម្បី​ចែក​រំលែក​ភាព​សប្បាយ​រីករាយ​របស់​ពួកគេ​ទៅ​កាន់​ពិភពលោក។ ហើយ​វា​ក៏​ជួយ​លើកស្ទួយ​កិត្តិយស​ជាតិ​យើង​ផង​ដែរ​ប៉ុន្តែ​បេសកកម្ម​នេះ​ត្រូវ​ការ​ការ​ចូលរួម​ពី​ប្រជាពលរដ្ឋ​ខ្មែរ​គ្រប់​រូប។បើ​គ្មាន​ការ​សហការ​នឹង​គាំទ្រ​ពី​ប្រជាពលរដ្ឋ​ខ្មែរ​គ្រប់​រូប​ទេ​ពួក​យើង​នឹង​មិន​អាច​បំពេញ​បេសកកម្ម​នេះ​អោយ​បាន​ជោគជ័យ​ឡើយ។

ប្រិយមិត្ត​ទាំង​អស់​​អាច​សាក​ល្បង​លេង​ដោយ ​​ចុច​ត្រង់​នេះ​…  ដើម្បី​ Download ឬ ចូល​ទៅ​កាន់​ AppStore ដោយ​ផ្ទាល់​រួច​វាយ​ពាក្យ Gift. Full of”Thanks” ជា​ការ​ស្រេច ហើយ​សម្រាប់​ការ​ទាញ​យក​មិន​គិត​ថ្លៃ​។

ចុច​អាន៖ យុវជន​មួយ​ក្រុម​ច្នៃ​ខ្មោច​ម៉ូតូ​ បង្កើត​ម៉ូដ​ថ្មី​សម្រស់​ម៉ាអេម

ចុច​អាន៖ Apple កំពុង​កែ​កំហុស​ឆ្គង​ពុម្ព​អក្សរ​ខ្មែរ​នៅលើ​ iOS 8 បន្ទាប់​ពី 4KhmeriPhone ស្នើ​សុំ

ចុ​ចអាន៖ សៀវភៅ​គតិលោក​​​អ្នក​ប្រាជ្ញ​ខ្មែរ​ជំនាន់​ដើម​ប្រើ​លើ Android មាន​គ្រប់​វគ្គ​ហើយ​ អត្ថបទ៖ ដារ៉ាឆានី