ទួលគោកត្រូវបានចាត់បញ្ចូលជាតំបន់គួរឲ្យចង់រស់នៅជាងគេនៅភ្នំពេញ
- 2014-12-26 16:29:18
- ចំនួនមតិ 0 | ចំនួនចែករំលែក 0
ទួលគោកត្រូវបានចាត់បញ្ចូលជាតំបន់គួរឲ្យចង់រស់នៅជាងគេនៅភ្នំពេញ
ចន្លោះមិនឃើញ
ទួលគោកត្រូវបានចាត់បញ្ចូលជាតំបន់លំនៅដ្ឋាន ដែលគួរឲ្យចង់រស់នៅជាងគេនៅរាជធានីភ្នំពេញ។ នេះបើតាម ការសិក្សាទីផ្សារខុនដូឆ្នាំ២០១៤ របស់ក្រុមហ៊ុន Century 21 Cambodia ដែលបានដាក់បង្ហាញកាលពីម្សិលមិញ។
ការសិក្សាបានរកឃើញថា ការអភិវឌ្ឍអគារខុនដូ ប្រមូលផ្តុំនៅប៉ែកខាងលិច ក្នុងរយៈពេល៦ឆ្នាំកន្លងមកនេះ ជាពិសេសតំបន់ទួលគោកបានស្រូបទាញគម្រោងអភិវឌ្ឍន៍ខុនដូ De Castle ដំបូងបង្អស់នៅទីក្រុងភ្នំពេញ។ នៅតំបន់ទួលគោក ទទួលបានការចាប់អារម្មណ៍ពីក្រុមហ៊ុនអភិវឌ្ឍន៍នានា ដោយសារទីនេះមានលក្ខណៈល្អប្រសើរ សម្រាប់ការរស់នៅរបស់ជនបរទេស អ្នកមានជីវភាពធូរធារ និងអភិជន។
បន្ថែមលើនេះភាគរយការប្រមូលផ្តុំគម្រោងអភិវឌ្ឍន៍ខុនដូ តាមខណ្ឌនីមួយៗ ឆ្នាំ២០១៤ បានបង្ហាញថា ខណ្ឌទួលគោកមាន ៣៨% ឫស្សីកែវ២៣% ចំការមន២៣% ដូនពេញ៨% ពោធិ៍សែនជ័យ៨%។ យ៉ាងណាមិញទិសដៅនៃការអភិវឌ្ឍខុនដូក៏បានផ្លាស់ប្តូរទៅប៉ែកពាយ័ព្យនៃទីក្រុងភ្នំពេញ ជាទីដែលក្រុមហ៊ុនអភិវឌ្ឍន៍របស់កូរ៉េ Word City Co.,Ltd បានចាប់ផ្តើមធ្វើការសាងសង់ ទីក្រុងរណប ដែលមានឈ្មោះថា Camko City នៅតំបន់ទួលសង្កែនៃខណ្ឌឫស្សីកែវ ដែលនាំមកនូវលំនៅដ្ឋានរាប់ពាន់ខ្នងចូលទៅតំបន់នេះ ដែលមានទីតាំងជិតខណ្ឌទួលគោក។
ចាប់តាំងពីឆ្នាំ២០០៨ រហូតដល់ឆ្នាំ២០១៤ មានគម្រោងខុនដូសរុបចំនួន៣០ ដែលក្នុងនោះមានគម្រោងចំនួន ១៣ ត្រូវបានបញ្ចប់រួចរាល់ ហើយនាំមកការផ្គត់ផ្គង់យូនិតខុនដូចំនួន ៣.០៩០ ក្នុងអត្រាកំណើនប្រចាំឆ្នាំ២០%។
អត្រាកំណើននៃការផ្គត់ផ្គង់យូនិតខុនដូត្រូវបានគេរំពឹងថា នឹងស្ទុះឡើងខ្លាំងចាប់ពីឆ្នាំ២០១៤តទៅ ដោយសារតែគម្រោងអភិវឌ្ឍន៍ខុនដូធំៗ នៅខាងកើតទីក្រុងភ្នំពេញដូចជា Bali Scenery,Casa Meridian, D.I Rivera និង The Bridge ជាដើមដែលអាចឈានដល់ការផ្គត់ផ្គង់រហូតដល់ ១០.០០០ យូនិតខុនដូនៅឆ្នាំ២០១៨។
លោក ខេវិន ហ្គូស អគ្គនាយកក្រុមហ៊ុន Century 21 ប្រចាំនៅកម្ពុជា បានលើកឡើងក្នុងសន្និសីទថា ទីផ្សារខុនដូនឹងបន្តលូតលាស់ច្រើនទៀត ដែលបែបនេះវាជាការតបទៅនឹងការកើនឡើងនៃតម្លៃដី ភាពខ្វះដីដើម្បីអភិវឌ្ឍន៍ និងការកើនឡើងឥតឈប់ឈរនៃអត្រាប្រជាជននៅក្នុងទីក្រុងភ្នំពេញ។ "អ្វីដែលយើងបានឃើញអំពីទីផ្សារខុនដូនៅទីនេះ គឺមិនខុសគ្នាពីអ្វីដែលបានកើតឡើងនៅប្រទេសថៃកាលពី២០ឆ្នាំមុននោះទេ។ គឺថាពីមុនអ្នកអភិវឌ្ឍន៍បានរំពឹងថា ទីផ្សារខុនដូនឹងអាចទាញកន្ត្រាក់ ដោយជនបរទេសដែលមកធ្វើការក្នុងស្រុក ប៉ុន្តែក្រោយមកមាននិន្នាការប្រែប្រួលយ៉ាងខ្លាំង ក្នុងការមករស់នៅក្នុងខុនដូ ក្នុងចំណោមប្រជាជនថៃ”។ លោក ខេវិន ហ្គូស បន្ថែម៕
អត្ថបទ៖មៃ សុខលីម
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
