សុគន្ធ ធារ៉ាត់ សារភាពថា ជ្រុលលង់ស្នេហ៍ជាមួយ យ៉ា ដាវ ម្ដងម្កាល

2015-01-05 23:28:29
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងថ្មី លោក សុគន្ធ ធារ៉ាត់ បានសារភាពថា កាលថតខារ៉ាអូខេជាមួយ កញ្ញា អេន យ៉ាដាវ កន្លងទៅ លោកសឹងតែលង់ស្នេហ៍ជាមួយនាង ដោយសារតែភាពសិចស៊ី។

លោក ធារ៉ាត់ បានលើកឡើងថា កញ្ញា យ៉ាដាវ ពិតជាសិចស៊ីខ្លាំងមែន ដែលជាហេតុធ្វើឲ្យផលិតកម្ម Spider Production ជ្រើសរើសនាងសម្ដែងនៅក្នុងបទចម្រៀង “Sexy អីយ៉ាងនេះ?” ដែលជាស្នាដៃដំបូងរបស់លោក។ លោក សុគន្ធ ធារ៉ាត់ និយាយថា កាលពេលសម្ដែងជាមួយគ្នានោះលោក ស្ទើរតែទ្រាំមិនបានទៅនឹងភាពសិចស៊ីរបស់យ៉ា ដាវ ព្រោះតារាស្រីម្នាក់នេះមិនត្រឹមតែសិចស៊ីទេ ថែមទាំងពូកែសម្ដែងថែមទៀតផង។

លោក សុគន្ធ ធារ៉ាត់ ទើបតែបោះជំហានចូលផលិតកម្ម Spider Production ជិត១ឆ្នាំមកហើយ បច្ចុប្បន្នមានបទផ្ទាល់ខ្លួនចំនួន៣បទក្នុងនោះមាន បទ “Sexy អីយ៉ាងនេះ?” “ខ្ញុំទើបតែមានស្នេហា” និង បទ” Lover 4 ever” ។ មានតែ បទ “Sexy អីយ៉ាងនេះ?” ប៉ុណ្ណោះបានចេញជា MV (វីដេអូចម្រៀង) ក្រៅពីនេះ នៅជា CD នៅឡើយ។

តារាវ័យ ២១ ឆ្នាំ និង កំពុងសិក្សារហូតដល់ទៅ ២ មហាវិទ្យាល័យម្នាក់នេះ ក្រៅពីជាតារាចម្រៀង ក៏ជាអ្នកនិពន្ធបទចម្រៀង។ បទចម្រៀងរបស់លោក សុទ្ធតែជាការតែងនិពន្ធដោយខ្លួនឯងទាំងអស់។ មុនបោះជំហានចូលក្នុងផលិតកម្មខាងលើលោកធ្លាប់បង្កើតក្រុមចម្រៀងផ្ទាល់ខ្លួនមួយដែលមានឈ្មោះថា “My Lover” ជាមួយកូនប្រុសនាយកុយ ប៉ុន្តែក្រោយមកបានឈប់ទៅវិញ ដោយសារតែកូននាយកុយ បានស្លាប់ក្នុងគ្រោះថ្នាក់ចរាចរណ៍ជាមួយតារាចម្រៀង ខេមរៈ សិរីមន្ត កាលពីដើមឆ្នាំ២០១៣ នៅឯខេត្ត ព្រះសីហនុ។

ទោះបីជា ធ្លាប់លង់ស្នេហ៍ម្ដងម្កាលជាមួយ កញ្ញា អេន យ៉ាដាវ បែបណាក្ដី ក៏មិនអាចទៅរួចដែរ ព្រោះស្រីស្អាតម្នាក់នេះ មានម្ចាស់បេះដូចរួចទៅហើយ។ ចង់ដឹងថា យ៉ាដាវ សិចស៊ីកម្រិតណា សូមទស្សនា វីដេអូខារ៉ាអូខេបទ “Sexy អីយ៉ាងនេះ?” ទាំងអស់គ្នា៕