តោះសប្ដាហ៍នេះ រៀនធ្វើម្ហូបតុំយ៉ាំបង្គាម្ដងមើល៍!
- 2015-01-10 17:41:33
- ចំនួនមតិ 0 | ចំនួនចែករំលែក 0
តោះសប្ដាហ៍នេះ រៀនធ្វើម្ហូបតុំយ៉ាំបង្គាម្ដងមើល៍!
ចន្លោះមិនឃើញ
សម្រាប់ម្ហូបពិសេសប្រចាំសប្ដាហ៍ថ្ងៃនេះ Sabay នឹងបង្ហាញជូនប្រិយមិត្តពីរបៀបធ្វើម្ហូបតុំយ៉ាំបង្គាម្ដងមើល៍!
តុំយ៉ាំ ជាសម្លម្ជូរបែបថៃ មានរសជាតិជូរហឹរៗ ដ៏ពេញនិយម ដែលផ្សំឡើងពីគ្រឿងផ្សំមិនក្រោម១០មុខទេ តែបើនិយាយពីរសជាតិ និងការពេញនិយមរបស់សម្លម្ជូរនេះវិញ មិនចាញ់មុខម្ហូបដ៏ទៃទៀតប៉ុន្មានទេ។ ជាពិសេស គេតែងឃើញវត្តមានសម្លរសជាតិជូរហឹរនេះ នៅក្នុងកម្មវិធីផ្សេងៗ មិនសូវខានឡើយ។
តោះកុំឲ្យខាតពេល ចង់ដឹងថាគ្រឿងផ្សំ និងវិធីធ្វើសម្លម្ជូរតុំយ៉ាំនេះ មានអ្វីខ្លះ សូមតាមដានទាំងអស់គ្នា!
គ្រឿងផ្សំ ៖
បង្គាស្រស់ ៣-៤ខាំ គល់ស្លឹកគ្រៃ២ដើម ផ្សិតចំបើង ១ខាំ ក្រូចឆ្មារ ១ផ្លែ ស្លឹកក្រូចសើច ៤ សន្លឹក គ្រឿងតុំយ៉ាំ ១កញ្ចប់ ទឹកស៊ុប ៤ ចានចង្កឹះ ម្ទេសស្រស់ ៥គ្រាប់ ទឹកត្រី កន្លះស្លាបព្រាបាយ អំបិល កន្លះស្លាបព្រាបាយ ស្ករស កន្លះស្លាបព្រាបាយ ម្សៅស៊ុប កន្លះស្លាបព្រាបាយ។
វិធីធ្វើ ៖
១. យកបង្គាស្រស់ធ្វើឲ្យស្អាត គល់ស្លឹកគ្រៃហាន់បញ្ជិតក្រាស់ៗបន្តិច ២. ដាំទឹកស៊ុបឲ្យពុះ រួចដាក់គ្រឿងផ្សំខាងលើចូល មានគល់ស្លឹកគ្រៃ ស្លឹកក្រូចសើច ក្រូចឆ្មារ គ្រឿងតុំយ៉ាំ ទឹកត្រី អំបិល ស្ករស ម្សៅស៊ុប ផ្សិតចំបើង បង្គា ម្ទេសស្រស់ ទុកឲ្យទឹកពុះ ឆ្អិនសាច់បង្គាល្មម។ បើឆ្អិនអស់ហើយ ប្រិយមិត្តអាចភ្លក់រសជាតិជូរ ហឹរៗ និងប្រៃបន្តិច សម្លម្ជូរពណ៌ក្រហមឆ្អិនឆ្អៅមួយនេះបានជាការស្រេច ដូចរូបខាងក្រោមនេះអញ្ចឹង។
សម្លម្ជូរតុំយ៉ាំបង្គា ស្រួលធ្វើសោះហ្នឹង មានអ្វីពិបាក ប្រិយមិត្តក៏អាចសាកល្បងធ្វើខ្លួនឯងនៅផ្ទះបានដែរ៕
អត្ថបទ៖ យិន សំបូរ