ជយលាភី "ស្ដាប់ចម្រៀងរបស់ខ្ញុំ" ត្រៀមចូលរួមច្រៀងរកលុយជួយអង្គការ PSE

2015-01-13 21:15:40
ចំនួនមតិ 0 | ចំនួនចែករំលែក 0

ចន្លោះមិនឃើញ

បេក្ខភាពជយលាភី "ស្ដាប់ចម្រៀងរបស់ខ្ញុំ" ឬ "Hear My Song" លោក យឹង យន និង កញ្ញា រុន ស៊ីរ៉ា កំពុងត្រៀមខ្លួនចូលរួមច្រៀង ដើម្បីស្វែងរកមូលនិធិជួយកុមារកំពុងរស់នៅ និង សិក្សារៀនសូត្រក្នុងអង្គការដើម្បីភាពញញឹមនៃកុមារ ហៅកាត់ថា PSE ។

លោក យឹង យន បាននិយាយថា តន្ត្រីយុវជនសប្បុរសធម៌ គ្រោងរៀបចំឡើងនៅថ្ងៃទី ២៥ ខែ មករា ២០១៥ នាមជ្ឈមណ្ឌលសហប្រតិបត្តិការកម្ពុជា-កូរ៉េ ចាប់ពីម៉ោង១រសៀលតទៅ។ ជយលាភីលេខ ២ ខាងលើបន្តថា មានបទចម្រៀងមួយចំនួន ដើម្បីបកស្រាយក្នុងឱកាសនោះរួមជាមួយដៃគូ កញ្ញា រុន ស៊ីរ៉ា តាមការស្នើពីអ្នករៀបចំកម្មវិធី។

នៅក្នុងកម្មវិធីខាងលើនេះ ក៏មានការលក់ស៊ីឌីចម្រៀង "Hear My Song" ដើម្បីស្វែងរកប្រាក់ជួយដល់អង្គការ PSE ដែលមានកុមារប្រមាណ ៧០០០ នាក់ កំពុងស្នាក់នៅ និង សិក្សារៀនសូត្រក្នុងអង្គការ។ លោកអះអាងថា ក្រៅពីស្ដាប់បទចម្រៀងពីរោះៗ ជាស្នាដៃកូនខ្មែរសុទ្ធសាធហើយនោះ ទស្សនិកជនក៏បានជួយដល់ក្មេងៗផងដែរ ដែលជាផ្នែកមួយនៃការកសាងធនធានមនុស្សនៅកម្ពុជា។

យឹង យន បានសម្ដែងភាពសប្បាយរីករាយចំពោះការចូលរួមសម្ដែងក្នុងការប្រគំតន្ត្រីយុវជនសប្បុរសធម៌មួយនេះ និង អំពាវនាវដល់សប្បុរសជននានា ទិញសំបុត្រចូលរួមទស្សនាឲ្យបានច្រើន។ ជាមួយគ្នានោះ លោកអំពាវនាវដល់សិល្បករ-សិល្បការិនីល្បីទាំងអស់ ធ្វើយ៉ាងណា ចំណាយពេលវេលាចូលរួមសកម្មភាពជួយសង្គមឲ្យបានច្រើនតាមរយៈរូបភាពសិល្បៈ៕