៤ ចំណុចរឹតចំណងស្នេហ៍តាំងពីរៀនវិទ្យាល័យរហូតបានសម្រេចជាគូអនាគត

2015-01-15 18:39:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាគរយតិចណាស់ ដែលស្នេហារបស់យុវវ័យក្នុងវ័យសិក្សា ទទួលបានជោគជ័យដូចបំណងប្រាថ្នា បើមិនបែកគ្នាដោយមូលហេតុនេះ ក៏មានហេតុផលផ្សេងដែរ។ តើអ្នកណាមិនចង់រស់នៅជាមួយមនុស្ស ដែលខ្លួនស្រលាញ់នោះ? បើអញ្ចឹងសូមមិត្តយុវវ័យ ងាកមកចាប់អារម្មណ៍ជាមួយនឹងគន្លឹះសំខាន់ៗ ៤ ចំណុច ពីបុគ្គលដែលជោគជ័យក្នុងរឿងស្នេហា តាំងពីពួកគាត់រៀនថ្នាក់វិទ្យាល័យជាមួយគ្នា រហូតបានគ្នាជាគូអនាគតដល់សព្វថ្ងៃនេះ។

រូបតំណាង

លើកឡើងពីប្រធានបទនេះដែរ លោក ម៉ែន សំអាត អាយុ ២៨ ឆ្នាំ សព្វថ្ងៃជាមន្ត្រីឥណទាននៃគ្រឹះស្ថានមីក្រូហិរញ្ញវត្ថុមួយនៅខេត្តតាកែវ បានប្រាប់ថា រូបលោក និង ភរិយា ស្រលាញ់គ្នាស្មោះស្ម័គ្រតាំងពីនៅរៀនជាមួយគ្នាម្ល៉េះ។ គិតមកទល់ពេលនេះ ពួកគាត់បានរៀបការជាមួយគ្នាបានជិត៥ឆ្នាំហើយ។

"ចង់មានស្នេហាមួយដែលឋិតថេរ គង់វង្ស ជាមួយមនុស្សដែលខ្លួនស្រលាញ់ គ្មានអ្វីសំខាន់ជាងចិត្តស្មោះហ្នឹងទេ រឿងនេះសំខាន់ជាងគេ ស្រលាញ់ស្មោះមិនប្រែប្រួល ទោះទៅដល់ណា យូរប៉ុណ្ណាក៏មិនខ្លាចបែកចិត្តពីគ្នាដែរ"។លោក សំអាត បញ្ជាក់។

ការស្រលាញ់គ្នាស្មោះជារឿងល្អម្យ៉ាងដើម្បី ស្រលាញ់គ្នាសមដូចបំណង ចុះនៅមានចំណុចអ្វីផ្សេងទៀតអត់ហ្ន៎?

"រឿងមួយដែលខ្ញុំអាចប្រាប់បានពីបញ្ហា ស្នេហាយុវវ័យក្នុងវ័យសិក្សា គឺថា សង្សារស្រលាញ់គ្នា ជៀសមិនផុតពីមានបញ្ហាឈ្លោះប្រកែកគ្នាទេ តែកុំឧស្សាហ៍ឈ្លោះគ្នាពេក អាចធ្វើឲ្យឆាប់ធុញទ្រាន់គ្នា ហើយបើមានបញ្ហាទាស់ពាក្យសម្ដីគ្នាបន្តិចបន្តួច ត្រូវចេះដោះស្រាយជម្លោះ ដោយសន្តិវិធី ចេះសូមទោស និងលើកលែងឲ្យគ្នា។"។ នេះជាការលើកឡើងរបស់ លោក ហេង សំអឿន វ័យ ២៩ ឆ្នាំ ដែលពីមុនលោក និង ភរិយា ធ្លាប់រៀនជាមួយគ្នាតាំងពីថ្នាក់វិទ្យាល័យដែរ។

"ចំណុចមួយទៀត ត្រូវចេះរក្សារឿងសម្ងាត់ និងទុកចិត្តគ្នាទៅវិញទៅមក មិនត្រូវឲ្យមានអ្នកផ្សេងដឹងរឿងផ្ទៃក្នុងរវាងអ្នកទាំងពីរច្រើនពេកទេ ព្រោះស្នេហាជារឿងរបស់មនុស្សតែពីរនាក់ រឿងអ្វីដែលសង្សារអ្នកនិយាយប្រាប់ មានន័យថាគេទុកចិត្តយើង ទើបគេប្រាប់។ គាត់ចាត់ទុកគាត់ជាមនុស្សសំខាន់ ទើបប្រាប់អាថ៌កំបាំង ឬផ្ទៃក្នុងប្រាប់អីចឹង"។ នេះជាការបញ្ជាក់ឲ្យដឹងពី យុវជន ឡុង មករា អាយុ២៥ឆ្នាំ អតីតនិស្សិតសកលវិទ្យាល័យចំរើនពហុបច្ចេកវិទ្យា។

លោក វិចិត្រ អាយុ ៣០ ឆ្នាំ ជាបុគ្គលិកផ្នែកទីផ្សារ ក្នុងក្រុមហ៊ុនចែកចាយចំណីអាហារមួយ នៅភ្នំពេញ ប្រាប់ឲ្យដឹងថា ត្រូវមានការគាំទ្រ ពីគ្រួសារទាំងសងខាងបន្ថែមទៀតទើបល្អប្រសើរ។

"ចំណុចនេះខ្ញុំចង់បញ្ជាក់បន្ថែមថា បើចង់ឲ្យគ្រួសារទាំងសងខាងគ្រាំទ្រ ម្នាក់ៗត្រូវតែបញ្ជាក់ឲ្យពួកគាត់ឃើញថា យើងមានសមត្ថភាពគ្រប់គ្រាន់ មានការងារធ្វើ ហេតុដូច្នេះ បន្ទាប់ពីរៀនចប់ថ្នាក់វិទ្យាល័យ ចូលដល់សកលវិទ្យាល័យ គួរតែរកការងារធ្វើបណ្ដើរ រៀនបណ្ដើរ"។ លោក វិចិត្រ ថ្លែងបន្ថែមដូចនេះ៕

ចុះមិត្តយុវវ័យវិញ យល់ម៉េចដែរ ចំពោះការលើកឡើងនេះ?

អត្ថបទ៖ យិន សំបូរ