Henry រិះគន់ Arsenal ថាដើរថយក្រោយ

2015-01-19 19:14:09
ចំនួនមតិ 0 | ចំនួនចែករំលែក 0

ចន្លោះមិនឃើញ

Thierry Henry អតីតខ្សែប្រយុទ្ធក្រុមកាំភ្លើងធំ បាននិយាយថា Arsenal បានដើរថយក្រោយក្នុងរយៈពេល២ទៅ៣ឆ្នាំចុងក្រោយ។ ការនិយាយនេះគឺនៅក្នុងពេលលោកធ្វើជាអ្នកវិភាគឲ្យទូរទស្សន៍ Sky Sports នៅមុនការប្រកួតដែលក្រុមចាស់របស់លោក យកឈ្នះក្រុម Manchester City ២-០ យប់មិញ។

អតីតកីឡាករជម្រើសជាតិបារាំងជឿថា ក្លិបនេះកំពុងតែខ្វះខាតខ្សែបម្រើស្នូលកណ្ដាលលំដាប់ពិភពលោក (world class players) ដើម្បីជាជំនួយដល់ខ្សែការពារ Per Mertesacker និង Laurent Koscielny។ ជាក់ស្តែងកាលពីរដូវកាល ២០០៣-២០០៤ ដែលកាំភ្លើងធំប្រកួតមិនដែលចាញ់សោះនោះ គឺដោយសារមានខ្សែបម្រើសំខាន់ៗដូចជា Patrick Vieira និង Gilberto Silva ជាដើម។

បុរសវ័យ៣៧ឆ្នាំ ក៏បានលើកឡើងផងដែរថា អតីតមិត្តរួមក្រុមរបស់លោក កីឡាករ Alex Song ដែលបច្ចុប្បន្នលេងឲ្យក្រុម West Ham ក៏មានសមត្ថភាពអស្ចារ្យ និងល្អគ្រប់គ្រាន់ក្នុងតំណែងនេះដែរ។

វីរបុរស Arsenal រូបនេះដដែលបាននិយាយថា៖ «ពិតណាស់ ពួកគេគឺកំពុងតែដើរថយក្រោយ មើលទៅពួកគេលេងដើម្បីតែបានតំណែង Top 4 តែប៉ុណ្ណោះ។ បើយើងនិយាយពី Arsenal ពួកគេគួរតែជាក្រុមដែលព្យាយាមប្រជែងយកជើងឯក។ ខ្ញុំជឿថាលោក Arsene Wenger រួមទាំងអ្នកគាំទ្រ និងអ្នកដឹកនាំគ្រប់ជាន់ថ្នាក់ទាំងអស់ ក៏ចង់បានលទ្ធផលប្រសើរជាងនេះដែរ»។

Henry បន្តថា៖ «Song អាចនឹងជួយឲ្យ Arsenal ប្រសើរជាងមុន។ គាត់ជាកីឡាករដែលគ្រប់គ្នាចង់បានឲ្យលេងនៅពីមុខខ្សែការពារទាំង៤នាក់។ គាត់អាចជួយដល់ខ្សែការពារ ហើយក៏អាចបម្រើដល់តំបន់ប្រយុទ្ធបានដូចគ្នា»។