Angelina Jolie ចុះជួបជនរងគ្រោះដោយសារក្រុម ISIS ដល់ជំរំនៅអ៊ីរ៉ាក់

2015-01-26 22:35:37
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលតារាសម្ដែងអាមេរិក Angelina Jolie បានធ្វើដំណើរទៅភាគខាងជើងនៃប្រទេសអ៊ីរ៉ាក់ កាលពីថ្ងៃអាទិត្យ ទី២៥ ខែមករា ដើម្បីចុះសួរសុខទុក្ខជនរងគ្រោះដោយក្រុមឥស្លាមជ្រុលនិយម (ISIS) ដែលកំពុងរស់នៅក្នុងជំរំជនភៀសខ្លួន។

ក្នុងនាមជាគណៈកម្មការជាន់ខ្ពស់នៃអង្គការសហប្រជាជាតិសម្រាប់ជនភៀសខ្លួន Jolie បានទៅដល់ជំរំ Khanke ដែលបច្ចុប្បន្នមានជនភៀសខ្លួនចំនួន ១ម៉ឺនគ្រួសាររស់នៅ ដែលប្រជាជនទាំងនោះត្រូវបានបង្ខំឲ្យបោះបង់ផ្ទះសម្បែងរបស់ខ្លួន បន្ទាប់ក្រុមរដ្ឋឥស្លាម ISIS ចូលឈ្លានពាន។

បន្ទាប់ពីសម្ដែងការគួរសមដល់ប្រជាជននៅទីនោះ តារាវ័យ ៣៩ឆ្នាំរូបនេះ បានថ្លែងសុន្ទរកថាមួយ ជំរុញឲ្យមេដឹកនាំនានាលើពិភពលោកចូលរួមទាំងអស់គ្នាដើម្បីបញ្ចប់សង្គ្រាមនៅស៊ីរី និងអ៊ីរ៉ាក់។

Jolie បាននិយាយប្រាប់សារព័ត៌មាន Daily Mail ថា “ប្រជាជនស្លូតត្រង់ជាច្រើននាក់ កំពុងរងគ្រោះដោយសារតែជម្លោះនៅស៊ីរី និងការរីករាលដាលរបស់ក្រុមបះបោរ។ យើងមិនអាចសម្ងំយកសុខតែម្នាក់ឯងឡើយ យើងត្រូវតែជួយការពារអ្នកនៅក្នុងជំរំ និងទីក្រុងជាច្រើនទៀតនៅអ៊ីរ៉ាក់ និងស៊ីរី រងការបំផ្លាញដោយសារសង្គ្រាម"។

កន្លងមកតារាសម្ដែងម្ចាស់ពាន Oscar រូបនេះ ធ្លាប់បានមកដល់តំបន់មជ្ឈិមបូព៌ាជាច្រើនលើករួចមកហើយ ក្នុងនាមជាអ្នកតំណាងអង្គការសហប្រជាជាតិ ហើយនៅឆ្នាំ២០១២ នាងបានទៅដល់តំបន់ឧទ្ទាម Kurdistan នៃប្រទេសអ៊ីរ៉ាក់ និងជំរំជនភៀសខ្លួន នៅទីក្រុង Erbil។

មិនតែប៉ុណ្ណោះ Angelina Jolie គឺជាសកម្មជនមួយរូបដែលតែងតែចុះផ្ទាល់ដល់តំបន់អាហ្វ្រិក ដែលរងគ្រោះដោយសារសង្គ្រាម សម្រាប់យុទ្ធនាការបញ្ចប់អំពើរំលោភផ្លូវភេទក្នុងសង្គ្រាម ដែលនាងបានសហការជាមួយអតីតរដ្ឋមន្ត្រីក្រសួងការបរទេសអង់គ្លេស William Hague ៕

ចុចអាន៖Angelina Jolie បង្ហាញមហិច្ឆតា ចង់ប្រឡូកក្នុងនយោបាយ