ម៉ូប៊ីលែត ជំនាន់ចាស់ផ្លាស់សម័យថ្មី ឡូយអត់?

2015-01-28 17:28:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមអំឡុងទសវត្សឆ្នាំ៩០ប្លាយ ម៉ូតូ ម៉ូប៊ីលែត ដែលមានឈ្នាន់ធាក់ដូចកង់អីចឹង នៅមានមួយៗ តែក្រោយៗមកក៏ចាប់បាត់ខ្លួន ជំនួសវិញដោយម៉ូតូជំនាន់ថ្មី។ អីចឹងហើយក្មេងៗជំនាន់នេះខ្លះមិនស្គាល់ទេ ខ្លះក៏ធ្លាប់ឃើញម្ដងម្ដាល ព្រោះថាអ្នកលេង Fashion សម័យឥលូវមួយចំនួននៅអភិរក្សរបស់បរអស់នេះទុកជិះលេងដែរ។

ប៉ុន្តែ ម៉ូប៊ីលែត ដ៏ថ្មីសន្លាងមួយគ្រឿងខាងក្រោមនេះ ត្រូវបានគេអះអាងថា ច្នៃឡើងដោយបុរសជនជាតិខ្មែររស់នៅសង្កាត់ឃ្មួញ រាជធានី ភ្នំពេញ ដែលស្នាដៃលោកទទួលបានការចាប់អារម្មណ៍ច្រើនពីសាធារណជន។

លោក សុភ័ក្ត្រ ដែលបានថតរូបម៉ូតូនេះ និងតែងជួបអ្នកផលិតថា ម្ចាស់របស់វាច្នៃម៉ូតូនេះឡើងដោយការប្រើប្រាស់គ្រឿងអេតចាយចាស់ៗ កែកុន និងបាញ់ថ្នាំក្រូម៉េឲ្យថ្មី រំលេចឡើងជាម៉ូតូ ក្លាស៊ិច ប្លែកភ្នែកនេះ។

លោកប្រាប់ថា បុរសជាម្ចាស់ម៉ូតូនេះ មានជំនាញសិល្បៈក្នុងការច្នៃរបស់ចាស់ៗឲ្យមានភាពទាក់ទាញ ដូចជាស៊ីក្លូ រ៉ឺម៉កកង់បី ជាដើម ដើម្បីដាក់តាំង។ ម៉ូតូនេះទាញការចាប់អារម្មណ៍ខ្លាំង ហើយមានអ្នកខ្លះសុំទិញ តែអ្នកច្នៃមិនលក់ឡើយ។ លោក សុភ័ក្ត្រ រៀបរាប់ពី ម៉ូប៊ីលែតនេះ៖ «ខ្ញុំសួគាត់ថាបើខ្ញុំសុំចែកលក់អត់? គាត់ថារបស់ខ្លះលក់បាន តែខ្លះមិនអាចលក់បានទេ វាច្នៃឡើងដោយដៃគាត់ ជារបស់គាត់»។

សុភ័ក្ត្រ ថាក្រៅពីម៉ូតូនេះ ម្ចាស់វា បានច្នៃនិងរក្សារបស់ច្នៃប្លែកៗចាស់ៗជាច្រើនដែលអ្នកខ្លះ មិនធ្លាប់ឃើញផង ទុកក្នុងសាលមួយនៅផ្ទះគាត់ ដូចជា ស៊ីក្លូ រម៉ក កង់រទេះគោ ត្បាល់កិន និងរបស់ទាក់ទាញជាច្រើន។ គេត្រូវចំណាយ១ដុល្លារ ដើម្បីចូលទស្សនាឥវ៉ាន់ដែលគាត់បង្កើតឡើងក្នុងសាលនោះ។ «តាមខ្ញុំដឹងវាជាការរកស៊ីរបស់គាត់ គឺគាត់ធ្វើការអស់ហ្នឹង»។ លោកបន្ថែម។

ការរៀបរាប់ខាងលើគ្រាន់តែជាអ្វីដែល សុភ័ក្ត្រ ដឹងពីម្ចាស់របស់វា។ ប៉ុន្តែអ្នកខ្លះបែរជាសង្ស័យថា ម៉ូប៊ីលែត នេះអាចរទិញពីប្រទេសក្រៅទៅវិញ ហើយគេព្រលយថាមានតម្លៃខ្ទង់មួយពាន់ដុល្លារអាមេរិក។