Town ធ្វើមេឡូឌីថ្មី ៩០%សម្រាប់អាល់ប៊ុមចូលឆ្នាំប្រពៃណីជាតិ ២០១៥

2015-01-30 21:34:51
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនខុសពីឆ្នាំមុនៗទេ អាល់ប៊ុមចូលឆ្នាំប្រពៃណីជាតិ ២០១៥នេះផលិតកម្ម Town នឹងធ្វើមេឡូឌីថ្មីសុទ្ធ ៩០ភាគរយ។

អ្នកចាត់ការទូទៅផលិតកម្ម Town លោក មាស សុខរតនៈ ប្រាប់ថា៖"ដូចឆ្នាំមុនៗអ៊ីចឹងយើងអូន ចម្រៀងចូលឆ្នាំៗនេះយើងធ្វើមេឡូឌីថ្មីសុទ្ធ ពី៨០ ទៅ៩០ភាគរយ"។

ក្រុមសិល្បករ សិល្បការិនី ក្នុងពិធីថតចម្រៀងចូលឆ្នាំប្រពៃណីជាតិកាលពីពេលថ្មីៗ

លោកបានបន្តថា ក្នុងអាល់ប៊ុមចម្រៀងចូលឆ្នាំថ្មី ដែលមានមេឡូឌីថ្មីសុទ្ធពី ៨០ ទៅ៩០ភាគរយគឺតារាចម្រៀងក្នុងផលិតកម្ម Town ទាំងចាស់ និងថ្មីទាំងអស់បានច្រៀងដូចគ្នា មិនមានចន្លោះនរណាម្នាក់ឡើយ។

អាល់ប៊ុមប្រពៃណីជាតិ ២០១៥ ចំនួនប៉ុន្មានវ៉ុល ទីតាំងនៃការថត រួមនឹងថ្ងៃថតពិតប្រាកដលោក មាស សុខ រតនៈ មិនទាន់បង្ហើបឱ្យដឹងនៅឡើយទេ។ ក៏ប៉ុន្តែបើតាមការឱ្យដឹងពីតារាសម្ដែងម្នាក់សុំមិនបញ្ចេញឈ្មោះប្រាប់ថាផលិតកម្ម Town ឆ្នាំនេះនឹងថតចម្រៀងចូលឆ្នាំថ្មីនៅខេត្ត សៀមរាប ក្នុងខែកុម្ភៈខាងមុខ។

លោក មាស សុខរតនៈ រំពឹងថាបទចម្រៀងចូលឆ្នាំប្រពៃណីជាតិរបស់ផលិតកម្ម Town ឆ្នាំនេះនឹងទទួលការចាប់អារម្មណ៍ច្រើន។ ក៏ប៉ុន្តែថាឱ្យទទួលការចាប់អារម្មណ៍ខ្លាំងប៉ុណ្ណាគឺចាំមើលទីផ្សារនៃការលក់ និងសំឡេងគាំទ្រពីទស្សនិកជននាពេលខាងមុខសិន។ ចង្វាក់ប្រពៃណីជាតិគ្រប់ទម្រង់ទាំងអស់ត្រូវបានអ្នកចាត់ការទូទៅខាងលើ អះអាងថានឹងមានវត្តមាននៅក្នុងបទចម្រៀងរបស់ផលិតកម្ម Town។

ក្នុងឆ្នាំ២០១៣-២០១៤ កន្លងទៅផលិតកម្ម Town បានទទួលជោគជ័យជាខ្លាំងក្នុងការផលិតបទចម្រៀងចូលឆ្នាំប្រពៃណីជាតិ។ ការនាំយកតារាកំប្លែង CTN មកចូលរួមផលិតកម្ម ដោយផ្ដល់បទចម្រៀងជាច្រើនឱ្យពួកគេក្នុងអាល់ប៊ុមឆ្នាំថ្មី បានធ្វើឱ្យទីផ្សារផលិតកម្មមួយនេះស្ទុះខ្លាំងមួយរយៈចុងក្រោយ៕

អានអត្ថបទបន្ត៖ មួយខែទៀត សារ៉ាយ សក្ខណា ឃើញមុខកូនស្រីដូចការប៉ងប្រាថ្នា

អានអត្ថបទបន្ត៖ តារាសម្ដែងជើងចាស់ នារី រ័ត្នគន្ធា ចង់រត់ចោលអាមេរិក

អានអត្ថបទបន្ត៖ Clara Lee ប្រាប់ថា ចង់សម្ដែងរឿងជាមួយ លី តឺហួរ

អត្ថបទ៖ អ៊ីង សុឡា