នូ ស៊ឹប រាងកាយទ្រុឌទ្រោម ក្រោយជួបគ្រោះថ្នាក់ចរាចរណ៍
- 2015-01-30 22:17:49
- ចំនួនមតិ 0 | ចំនួនចែករំលែក 0
នូ ស៊ឹប រាងកាយទ្រុឌទ្រោម ក្រោយជួបគ្រោះថ្នាក់ចរាចរណ៍
ចន្លោះមិនឃើញ
តារាចម្រៀងជើងចាស់ លោក នូ ស៊ឹប បានរៀបរាប់ប្រាប់ Sabay នៅព្រឹកនេះថា ដៃជើងរបស់លោកនៅមិនទាន់កម្រើកបានទេ បន្ទាប់ពីជួបគ្រោះថ្នាក់ចរាចរណ៍តាមបណ្ដោយផ្លូវ ម៉ៅសេងទុង កាលពីពេលថ្មីៗនេះ។
លោក នូ ស៊ឹប កំពុងរៀបរាប់រឿងរ៉ាវរបស់គាត់ នៅក្នុងបន្ទប់ជួលតូចមួយរស់នៅជាមួយក្មួយប្រុស
លោកបន្តថា មិនបានទៅរកការព្យាបាលពីមន្ទីរពេទ្យណាមួយឡើយ ដោយគ្រាន់តែឲ្យក្មួយៗ រស់នៅជាមួយ ទិញថ្នាំយកមកព្យាបាលខ្លួនឯង ដោយពីមុនលោកធ្លាប់ចេះវិជ្ជាពេទ្យដែរ។ ម្យ៉ាងទៀត មិនសូវមានថវិកាគ្រប់គ្រាន់ក្នុងការព្យាបាលនោះទេ ព្រោះអាជីពចម្រៀងកន្លងបានត្រឹមមួយទប់ទល់ជីវភាពប្រចាំថ្ងៃ។
“ ដល់ពេលជួបគ្រោះថ្នាក់អីចឹងទៅ ឥឡូវកាន់តែយ៉ាប់ហើយ ព្រោះគេហៅខ្ញុំទៅច្រៀងក៏មិនបានទៅដែរ ឃើញស្រាប់ហើយ បើដេកដួលអញ្ចឹង!”។ លោក នូ ស៊ឹប បញ្ជាក់យ៉ាងដូច្នេះ។
អ្នកសិល្បៈជើងចាស់រូបនេះ រំលឹកថា លោកមិនបានទាមទារសំណងជំងឺចិត្តពីភាគីម្ខាងទៀតនោះទេ ទោះបីជាលោកមានរបួសរលាត់ដៃជើង និង ប៉ះទង្គិចរហូតគ្រាំគ្រាកម្រើកមិនរួច ហើយម៉ូតូម៉ាក Fino ដែលខ្ចីពីក្មួយប្រុសជិះ ត្រូវខូចខាតស្ទើរទាំងស្រុងក៏ដោយ។ ដោយសារលោកជាសិល្បករ ទើបមិនចង់ឲ្យមានរឿងរ៉ាវវែងឆ្ងាយ ស្របពេលដែលឃើញភាគីម្ខាងទៀត ក៏មានរបួសធ្ងន់ដូចគ្នាដែរ។
លោក នូ ស៊ឹប កំពុងរៀបរាប់រឿងរ៉ាវរបស់គាត់ នៅក្នុងបន្ទប់ជួលតូចមួយ
ទោះបីជាយ៉ាងណា លោកសង្ឃឹមថា របួសនឹងឆាប់ជាសះស្បើយ ហើយអាចធ្វើចលនាងាយស្រួលបានដូចពីមុនក្នុងពេលឆាប់ៗនេះ។ ប្រសិនបើអូសបន្លាយពេលវេលាយូរពេក អាចមានផលប៉ះពាល់ដល់ជីវភាពរបស់លោកយ៉ាងខ្លាំង ព្រោះត្រូវចំណាយលុយកាក់ជាប្រចាំ តែគ្មានចំណូលមកវិញ។ ហើយបើផ្អែកលើប្រាក់របបសោធននិវត្តន៍នោះ មិនអាចគ្រប់គ្រាន់នោះទេ សម្រាប់ការចំណាយរាល់ប្រចាំថ្ងៃ។
លោក នូ ស៊ឹប មានវ័យ ៦៧ ឆ្នាំ និង មានប្រភពពីខេត្តកំពង់ធំ ហើយមានទេពកោសល្យសិល្បៈតាំងពីកំណើតដោយអាចច្រៀងបានទាំងបទសម័យ, បុរាណ ដូចជា យីកេ, បាសាក់ និង មហោរី ជាដើម។ ប៉ុន្តែសព្វថ្ងៃ លោក នូ ស៊ឹប បានត្រឹមច្រៀងតាមភោជនីយដ្ឋានពេលរាត្រី ដើម្បីបានកម្រៃខ្លះចិញ្ចឹមជីវិតប៉ុណ្ណោះ។ ហើយការព្យាបាលរបួសនៅពេលនេះ គឺមានជំនួយឧបត្ថម្ភខ្លះ ពីសប្បុរសជនតិចតួច។ ប្រសិនបើសប្បុរសជនចង់ចូលរួមចំណែកជួយអ្នកសិល្បៈរូបនេះសូមទាក់ទងដោយផ្ទាល់ទៅកាន់លេខទូរសព្ទរបស់លោក ០១២ ៩៥៨ ០៥៤៕
អានអត្ថបទ៖ "កូនមាសម្ដាយ" តាំងចិត្តមុះមុត
អានអត្ថបទ៖ កន្លះខែទៀត សារ៉ាយ សក្ខណា ឃើញមុខកូនស្រីដូចប្រាថ្នា
អត្ថបទ៖ សំ ជំនាញ