ចំណាត់ថ្នាក់ជាទីក្រុងស្អាតជាងគេរបស់កម្ពុជា បានលើក្រុង៤ និងខណ្ឌមួយ

2015-02-24 23:21:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ចំណាត់ថ្នាក់ជាទីក្រុងស្អាតជាងគេរបស់ប្រទេសកម្ពុជានៅឆ្នាំ២០១៥ នេះ ត្រូវបានគណៈកម្មាធិការជាតិវាយតម្លៃទីក្រុងស្អាតបានផ្តល់ទៅក្រុងចំនួន៤ និងខណ្ឌមួយ។ ការប្រកាសដែលត្រូវបានធ្វើឡើងដោយ សម្តេច ហ៊ុន សែន កាលពីព្រឹកមិញ ក្នុងទិវាទីក្រុងស្អាត ក្រោមប្រធានបទ "ជោគជ័យទីក្រុងស្អាត ជោគជ័យទេសចរណ៍” នៅមជ្ឈមណ្ឌលកោះពេជ្រ គឺបាន ផ្អែកលើកត្តាបរិស្ថាន អនាម័យ សណ្តាប់ធ្នាប់ និងហេដ្ឋារចនាសម្ព័ន្ធ ដែលអាចផ្តល់នូវភាពកក់ក្តៅ និងមជ្ឈដ្ឋានរស់នៅល្អប្រសើរសម្រាប់ប្រជាជន និងភ្ញៀវទេសចរ។

(ទិដ្ឋភាព សាលាខេត្តបាត់ដំបង)

គណៈកម្មាធិការនេះ បានប្រើផ្ការំដួលសម្រាប់សម្គាល់ចំណាត់ថ្នាក់ទីក្រុងស្អាត ក្នុងនោះមាន ក្រុងបាត់ដំបង ក្រុងសៀមរាប ខណ្ឌដូនពេញ (រាជធានីភ្នំពេញ) ក្រុងកំពត និង ក្រុងកែប ទទួលបានផ្ការំដួល៣ទង។

ផ្ការំដួល២ ទង មាន១០ក្រុង និង២ខណ្ឌ គឺក្រុងកំពង់ចាម ក្រុងពោធិ៍សាត់ ក្រុងកំពង់ឆ្នាំង ក្រុង ស្ទឹងសែន ក្រុងព្រៃវែង ក្រុងដូនកែវ ក្រុងព្រះសីហនុ ក្រុងតាខ្មៅ ក្រុងសេរីសោភណ្ឌ ក្រុងក្រចេះ ខណ្ឌចំការមន និងខណ្ឌទួលគោក។

ផ្ការំដួល១ទង មាន១១ក្រុង និង៦ខណ្ឌ គឺក្រុងបាលុង ក្រុងប៉ៃលិន ក្រុងសំរោង ក្រុងប៉ោយប៉ែត ក្រុងខេមរភូមិន្ទ ក្រុងព្រះវិហារ ក្រុងសែនមនោរម្យ ក្រុងស្វាយរៀង ក្រុងស្ទឹងត្រែង ក្រុងច្បារមន ក្រុងបាវិត ខណ្ឌ៧មករា ដង្កោ ខណ្ឌសែនសុខ ខណ្ឌមានជ័យ ខណ្ឌពោធិ៍សែនជ័យ និងខណ្ឌឫស្សីកែវ។

រាជរដ្ឋាភិបាលបានកំណត់យកថ្ងៃទី២៧ ខែកុម្ភៈ ជារៀងរាល់ឆ្នាំ ដើម្បីប្រារព្ធទិវាជាតិទីក្រុងស្អាត (តាមរយៈអនុក្រឹត្យលេខ ១៦៣ អនក្រ.បក ចុះថ្ងៃទី០១ តុលា២០១២)។

ឆ្នាំ២០១៥នេះ សម្តេច ហ៊ុន សែន បានប្រកាសឲ្យផ្នែកពាក់ព័ន្ធ ត្រូវបន្តធ្វើការគ្រប់គ្រងសំណល់រឹង ការគ្រប់គ្រងថង់ប្លាស្ទិក សំណល់រាវ ការពង្រឹងគុណភាពសេវាកម្មទេសចរណ៍ ការផ្តល់សេវាកម្មសាធារណៈ ការកែលំអអនាម័យ សណ្ដាប់ធ្នាប់ សោភ័ណ្ឌភាព និងការបង្កើតសង្កាត់គំរូនៅក្នុងក្រុង។ ភ្ញៀវទេសចរអន្តរជាតិកើនឡើងដល់បួនលានប្រាំសែននាក់ ក្នុងឆ្នាំ២០១៤ ខណៈ ឆ្នាំ ២០២០ កម្ពុជារំពឹងទទួលភ្ញៀវអន្តរជាតិប្រមាណជាង ៧,៥ លាននាក់ ៕