មិនឃើញមិនជឿ! ទីក្រុងកម្សាន្តមានបឹងកណ្ដាលវាលខ្សាច់

2015-02-26 16:16:30
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅចំកណ្ដាលវាលខ្សាច់ ដែលជាកន្លែងក្ដៅបំផុតមួយនៅលើពិភពលោក បែរជាមានទីក្រុងរមណីយដ្ឋានកម្សាន្ត មានដើមឈើពោរពេញដោយស្លឹកខៀវស្រងាត់ ព្រមទាំងបឹងមួយយ៉ាងធំ ស្ទើរមិនគួរឲ្យជឿ។

ទីក្រុងដ៏អស្ចារ្យនេះ ឈ្មោះថា Huacachina មានទីតាំងនៅលើវាលខ្សាច់មួយ ភាគនិរតីប្រទេសប៉េរូ ដែលមានចម្ងាយត្រឹម ៤គីឡូម៉ែត្រប៉ុណ្ណោះពីទីក្រុង Ica ។ អ្នកទេសចរ អាចធ្វើដំណើរទៅដល់ទីនោះ ដើម្បីងូតទឹកលេង មើលថ្ងៃលិច ព្រមទាំងទស្សនាលំនៅឋានទាំង ៩៦កន្លែង ដែលបើកអាជីវកម្មខ្នាតតូច ដើម្បីបម្រើជីវភាពរស់នៅប្រចាំថ្ងៃរបស់ពួកគេ។

នៅអំឡុងទសវត្សរ៍ឆ្នាំ១៩៤០ ទីក្រុងនិម្មិតនេះ គឺជាកន្លែងពេញនិយមសម្រាប់អ្នកមាន មកងូតទឹកលំហែកាយលេង ព្រោះពួកគេគិតថាទឹកនេះអាចមានប្រសិទ្ធភាពព្យាបាលជំងឺ ប៉ុន្តែក្រោយមកត្រូវគេទុកចោលអស់មួយរយៈ។ យ៉ាងណាមិញ បន្ទាប់ពីមានយុទ្ធនាការផ្សព្វផ្សាយសាជាថ្មី ទីក្រុងនេះចាប់ផ្ដើមទទួលបានប្រជាប្រិយភាពម្ដងទៀត ហើយអ្នករស់នៅក្នុងតំបន់ក៏ប្រកបមុខជំនួញដោយពឹងផ្អែកលើវិស័យទេសចរណ៍។

ដោយសារតែអ្នករស់នៅក្នុងទីក្រុង សាងសង់អណ្ដូងដើម្បីទាញយកទឹកពីក្រោមដី បូករួមទាំងរំហួតទឹកដែលកើតឡើងពីសីតុណ្ហភាពក្ដៅខ្លាំងផង ធ្វើឲ្យកម្រិតទឹកបឹងស្រកចុះកាលពីប៉ុន្មានឆ្នាំមុន។ ដើម្បីដោះស្រាយស្ថានការណ៍នេះ បឹងត្រូវគេបំពេញបន្ថែមឡើងវិញ ដោយទឹកដែលយកមកពីទីក្រុង Ica។ ទីក្រុងដ៏អស្ចារ្យ Huacachina ត្រូវអះអាងថាជាតំបន់មរតកវប្បធម៌របស់ប្រទេស ដោយវិទ្យាស្ថានវប្បធម៌ជាតិ៕