ឃុំ ប៉ុណ្ណាដែត ថា សុខភាពម្ដាយ និង កូនល្អគ្មានអ្វីជាបញ្ហាទេ

2015-03-03 12:00:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាចម្រៀងរបស់ផលិតកម្ម រស្មីស្ទឹងសង្កែ ឃុំ ប៉ុណ្ណាដែត និយាយថា សុខភាពប្រពន្ធ និង កូនប្រុសទី ២ របស់លោកល្អជាធម្មតា មិនមានអ្វីជាបញ្ហាទេ។ លោកបានលើកឡើងដូច្នេះបន្ទាប់ពីភរិយា យក់ ឋិតរដ្ឋា សម្រាលបុត្រទី ២ យប់ម្សិលមិញក្នុងមន្ទីរពេទ្យ រ៉ូយ៉ាល់រតនៈ។

សមាជិកក្រុមចម្រៀង EV Band និយាយថា៖ "អរណាស់បង ដោយកូនប្រុសរបស់ខ្ញុំកើតមកមិនមានបញ្ហាអ្វីកើតឡើង។ ទាំងម្ដាយ និងកូនគឺសុខភាពរឹងមាំតែពីរតែម្ដង"។

យក់ ឋិតរដ្ឋា និងកូនប្រុសទី២ សម្រាលយប់មិញនៅមន្ទីរពេទ្យ រ៉ូយ៉ាល់រតនៈ

ឃុំ ប៉ុណ្ណាដែត បន្តថា កូនប្រុសទី ២ របស់លោកកើតមកមានទម្ងន់ជិត ៣ គីឡូ ហើយលោកត្រៀមនឹងយកម្ដាយកូនទាំងពីរទៅសម្រាកនៅផ្ទះក្នុងរយៈពេលបីទៅបួនថ្ងៃខាងមុខទៀត។

តារាចម្រៀងរូបនេះមិនទាន់គិតពីគម្រោងយកបុត្រទី ៣ នៅឡើយទេ ដោយរយៈពេលពីរទៅបីឆ្នាំខាងមុខទៀតទើបគិត។ លោកថាប្រសិនបើចង់បាន ភរិយា ក៏ដូចជា ខ្លួនផ្ទាល់ចង់បានកូនស្រីវិញ។ តែទោះជាយ៉ាងណាលោកថា អាស្រ័យលើពេលវេលា។

ដោយឡែកនិយាយពីអាជីពជាអ្នកចម្រៀងរបស់ យក់ ឋិតរដ្ឋា អតីតតារាចម្រៀងរូបនេះ ប្រាប់ថា ប្រពន្ធរបស់ខ្លួនគឺនៅតែបន្តតទៅទៀតមិនទាន់ផ្អាកទេ។ បន្ទាប់ពីសុខភាពម្ដាយ និង កូនល្អប្រសើរនឹងវិលចូលសិល្បៈវិញ ព្រោះការងារក្នុងផលិតកម្មជាច្រើនកំពុងរង់ចាំ។

“ប្រពន្ធខ្ញុំគាត់នៅតែបន្តច្រៀងទៀត មិនទាន់គិតពីរឿងផ្អាកសិល្បៈទេ។ គាត់ចង់បម្រើទស្សនិកជនតទៅទៀត ពេលរឹងដៃរឹងជើងគាត់វិលមកកាន់វិថីចម្រៀងវិញ"។ ឃុំ ប៉ុណ្ណាដែត បន្ថែមដូច្នេះ។

បុត្រប្រុសទី ១ របស់ ឃុំ ប៉ុណ្ណាដែត និង យក់ ឋិតរដ្ឋា មកទល់នឹងពេលនេះមានវ័យជិត ៨ ឆ្នាំហើយ។ រីឯចំណងអាពាហ៍ពិពាហ៍អ្នកទាំងពីរវិញ គឺមានរយៈជាង ៩ឆ្នាំ គិតមកត្រឹមពេលនេះ៕