ប៉ែន ចំរ៉ុង ចង់បានប្រពន្ធឆ្លាត ហើយមាន ប៉ុន្តែ...

2015-03-10 21:21:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ែន ចំរ៉ុង បានបង្ហើបឱ្យ Sabay កាលពីពេលថ្មីនេះថា នារីដែលខ្លួនប្រាថ្នា ជាភរិយានោះ គឺជាមនុស្សម្នាក់ដែលមានទ្រព្យសម្បត្តិ មានចំណេះ ហើយឆ្លាតវាងវៃនៅក្នុងការរកស៊ីទៀតផង។

តារាសម្ដែងរូបនេះ បានបន្តថា ព្រោះខ្លួនជាអ្នកសិល្បៈទៅហើយ ប្រសិនបើបានភរិយាជាអ្នករកស៊ីកាន់តែប្រសើរ។ ចំរ៉ុង និយាយថា៖" បើមានចំណេះ និង ឆ្លាតហើយនោះ គឺយើងអាចជួយរកស៊ីគ្នាបានសន្សំលុយកាក់ទ្រព្យសម្បត្តិអញ្ចឹងទៅ"។ តួក្រមិចក្រមើមខាងលើបន្ថែមថា ជាដំបូងនេះរូបគេមិនមានគម្រោងរៀបការជាមួយអ្នកសិល្បៈដូចគ្នានោះទេ និងមិនមែនជាការរើសអើងនោះដែរ។

ពិធីករវ័យ ៣៣ ឆ្នាំ រូបនេះបានអះអាងថា កាលលើកឡើងនេះដោយផ្អែកលើនិស្ស័យ និងការសម្រេចចិត្តប៉ុណ្ណោះ ព្រោះមនុស្សម្នាក់ៗមានគោលការណ៍ផ្សេងគ្នា ហើយមានជម្រើសរៀងខ្លួនផងដែរ នៅក្នុងការជ្រើសរើសដៃគូជីវិតសម្រាប់អនាគតយូរអង្វែង។

ទោះបីជាយ៉ាងណា ប៉ែន ចំរ៉ុង បញ្ជាក់ថា គ្រប់យ៉ាងគ្រាន់តែជាគម្រោងប៉ុណ្ណោះ ខណៈកំពុងសម្លឹងរកនារី ដែលមានលក្ខណៈ សម្បត្តិគ្រប់គ្រាន់តាមការចង់បានរបស់ខ្លួន។ លោកថា៖ "ចិត្តចេះតែចង់បានហើយ តែខ្លាចតែគេមិនស្រលាញ់យើងជាអ្នកសិល្បៈអញ្ចឹង"។ តារារូបនេះបន្តថា នៅមិនទាន់អស់សង្ឃឹមនោះទេ ខណៈការងារសិល្បៈក៏មមាញឹក។

កាលពីពេលថ្មីនេះ ប៉ែន ចំរ៉ុង ទើបចាប់ផ្ដើមអាជីពថ្មីមួយគួរឱ្យភ្ញាក់ផ្អើល គឺដើរកាត់សក់តាមរោងការបន្ថែមទៀតក្រៅពីអាជីពពិធីករ និងតារាសម្ដែងដែលមានស្រាប់។ ទោះបីជាមិនទាន់មានមូលដ្ឋានជ្រៅជ្រះក្នុងផ្លូវប្រពៃណីយ៉ាងណាក្ដី ប៉ុន្តែមានការកត់សម្គាល់ឃើញថា បច្ចុប្បន្នមិនសូវមានអ្នកសិល្បៈវ័យក្មេងណាចង់ចាប់អាជីពនេះឡើយ ធ្វើឱ្យមានការខ្វះខាតធនធានផ្នែកនេះ៕