ពេជ្រ អាវីហ្សា ប្ដូរទាំងសង្សារប្ដូរទាំងឡាន

2015-03-11 17:11:32
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ពេជ្រ អាវីហ្សា ដែលល្បីថា បាត់រថយន្ត LEXUS RX 300 ជិត១ឆ្នាំមកហើយនោះ ពេលនេះ បានប្ដូររថយន្តថ្មីៗទំនើបជាងមុនទៅទៀត មិនត្រឹមតែប៉ុណ្ណោះ តារាស្រីម្នាក់នេះ បានថែមទាំងប្ដូរសង្សារថ្មីៗទៀតផង។ នេះបើតាមការបង្ហើបរបស់សាមីខ្លួនប្រាប់ Sabay កាលពីពេលថ្មីៗនេះ។

អាណិកជនខ្មែររស់នៅសហរដ្ឋអាមេរិកវ័យស្មើឪពុកដែលជារឿយៗ ពេជ្រ អាវីហ្សា តែងប្រកាសប្រាប់ថា ជាសង្សារបណ្ដូលចិត្ត ហើយតែងតែតាមហួងហែងប្រចណ្ឌនាងមិនឲ្យប្រលូកសិល្បៈ ជាច្រើនឆ្នាំមកហើយនោះ ថ្មីៗនេះ ពេជ្រ អាវីហ្សាប្រាប់ថា បានចែកផ្លូវគ្នាជាង៥ខែមកហើយ។ មូលហេតុ ដែលនាំឲ្យចែកផ្លូវគ្នានេះ ត្រូវតារាសិចស៊ី ម្នាក់នេះទម្លាក់កំហុសទាំងស្រុងទៅលើ ភាគីខាងប្រុស ដោយនាងលើកឡើងថា មកពីបុរសអាណិកជនម្នាក់នោះ ពូកែប្រចណ្ឌខ្លាំងពេក ធ្វើឲ្យនាងទ្រាំលែងបាន ទើបសម្រេចចិត្តសុំចែកផ្លូវគ្នាតែម្ដង។

ចែកផ្លូវគ្នាមិនបានមួយចម្អិនកំពឹសផង តារាស្រីដែលល្បីមានទំនាក់ទំនងជាមួយអ្នកលេងភ្លេងល្បីឈ្មោះ លោក រ៉េដ ធីដូណា មុនមានទំនាក់ទំនងជាមួយបុរសក្រៅស្រុកម្នាក់នេះ ត្រូវបានអ្នកជំនួញក្នុងស្រុកម្នាក់មានវ័យខ្ទង់៣០ឆ្នាំស្ដើង ស្ម័គ្រចិត្តមកជួយស្អំបេះដូងដែលប្រេះស្រាំនោះ។ ជាមួយគ្នានោះ សង្សារថ្មីម្នាក់នាងបានផ្ដល់រថយន្តទំនើបៗ ឲ្យជិះ ប្ដូរស្ទើរគ្រប់សេរី។

និយាយដោយមិនលាក់លៀម អាវីហ្សា ប្រាប់ថា នាងបានស្គាល់សង្សារថ្មីនេះ ជាង៣ខែមកហើយ ដោយសង្សារថ្មីម្នាក់នេះ ស្រលាញ់ហើយពូកែលួងលោមមិនប្រចណ្ឌនាងឡើយ មិនត្រឹមតែប៉ុណ្ណោះថែមទាំង ឲ្យនាងប្រលូកសិល្បៈឡើងវិញខ្លាំងថែមទៀតផង។

មួយរយៈចុងក្រោយនេះ អាវីហ្សា តែងតែបណ្ដើរសង្សារថ្មីរបស់នាង ទៅចូលរួមក្នុងកម្មវិធីជួបជុំអ្នកសិល្បៈជាញឹកញាប់ ហើយថែមទាំងជិះរថយន្តទំនើបៗទៀត ដូចជា LEXUS 570 ជាដើម។

ទោះបីជា សង្សារថ្មីនោះក្មេងក៏ពិតមែន តែពេជ្រ អាវីហ្សា បានអះអាងថា បុរសនោះពូកែរកស៊ីខ្លាំងណាស់ ត្រឹមរថយន្តធុនល្មមឲ្យនាងជិះនោះ មិនជាចោទជាបញ្ហាឡើយ។

តារាស្រីម្នាក់នេះ មិនទម្លាយឲ្យដឹងថា សង្សារនាងរកស៊ីរបរអ្វីឡើយ ហើយនាងក៏មិនបានប្រាប់ពី គម្រោងភ្ជាប់ពាក្យ ឬ ចូលរោងការ ជាមួយគ្នាថ្ងៃណានោះដែរ៕

អានអត្ថបទ៖ មង្គលការសេដ្ឋីខ្មែរ គិត ម៉េង អ្នកកំដរសុទ្ធតែឧកញ៉ា-ជំទាវ-ឈុតកូនក្រមុំ១៤ម៉ូដ ថ្មីទាំងអស់

អានអត្ថបទ៖ ស្ងាត់ៗ…ឡូរ៉ា ម៉ម ក្លាយជាស្រីស្អាតប្រចាំកម្មវិធី “អង្គរសង្ក្រាន្ត២០១៥”

អត្ថបទ៖ ខុត សីហា