ចំណុចតូចៗគូស្នេហ៍មើលរំលងនិងតែងធ្វើខុសពេលផ្ដើមមានស្នេហា

2014-10-07 16:08:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្នេហាប្រៀបដូចជាអណ្ដាត និងធ្មេញ លៃអីគង់នឹងប៉ះគ្នា។ គូស្នេហ៍ខ្លះ ស្រលាញ់គ្នាសុខៗ ក៏ឈ្លោះគ្នា។ នេះមកពីមិនបានស្វែងយល់ពីគ្នាទៅវិញទៅមក និងតែងតែមើលងាយបញ្ហាតិចតួចជុំវិញខ្លួន ដោយចេះតែបណ្ដែតបណ្ដោយពីមួយថ្ងៃទៅមួយថ្ងៃរហូតឈានដល់ដំណាក់កាល ចុងក្រោយ គឺបែកគ្នា។

តើអ្វីខ្លះទៅ ដែលគូស្នេហ៍មួយចំនួនតែងតែមើលស្រាលថាវាមិនអី គ្រាន់ជារឿងតូចតាច តែធាតុពិតប៉ះពាល់យ៉ាងធ្ងន់ធ្ងរដល់សម្ព័ន្ធស្នេហា?

មិនពេញចិត្ត មិននិយាយ ចង់ឲ្យគេដឹងដោយខ្លួនឯង សម្រាប់លោក សុខ មង្គល អតីតនិស្សិតសាកលវិទ្យាល័យភូមិន្ទភ្នំពេញ ជំនាញគណិតវិទ្យា បាននិយាយថា នារីខ្លះមិនពេញចិត្តអ្វីមួយ គឺគិតតែពីអង្គុយខឹងងរ មិនព្រមប្រាប់ថាខឹងរឿងអ្វី ចង់ឲ្យសង្សារដឹងថាខ្លួនកំពុងតែគិតអ្វី។ ហើយបើគេដឹង គឺមានន័យថាគេយល់ចិត្ត និងយកចិត្តទុកដាក់មកលើខ្លួន។ គិតបែបនេះគឺយ៉ាប់ហើយ ប្រុសៗមិនមែនជាទេវតា ឬគ្រូទាយ អ្នកណាគិតអ្វីក៏ដឹង អ្នកណាសួរអ្វីក៏ឃើញនោះទេ។ បើដឹងអ្វីបានដោយខ្លួនឯងទាំងអស់អញ្ចឹង ទៅដាក់កំប៉ុងជើងធូបទាយរកលុយក្លាយជាអ្នកមានហើយ។

មង្គល បន្តថា៖ “យើងមិនមែនគ្រាន់តែសម្របខ្លួនរកគេ ឬគិតតែទាមទារឲ្យគេសម្របខ្លួនតាមយើងនោះឡើយ គឺទាំងប្រុសស្រីត្រូវចេះសម្របខ្លួនរកគ្នា ស្វែងយល់ពីភាពខុសប្លែករវាងគ្នា តែប៉ុណ្ណឹងស្នេហាក៏ល្អទៅហើយ”។ ពេលឈ្លោះគ្នា តែងតែរាលដាលសុំចែកផ្លូវ និស្សិត សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ផ្នែកវិទ្យាសាស្ត្រសេដ្ឋកិច្ច កញ្ញា ឡុង សោភ័ណ ប្រាប់ថា រឿងតូចប៉ុនឈើចាក់ធ្មេញ តែអ្នកខ្លះធ្វើឲ្យវាក្លាយទៅជារឿងធំបាន។ ឈ្លោះគ្នាដោយរឿងតូចតាចមិនបញ្ចប់រឿងនោះទេ បែរជារាលដាលទៅដល់រឿងផ្សេងទៀត។ ជួនកាលឈ្លោះគ្នារឿងទៅញ៉ាំអី និយាយទៅនិយាយមករាលដាលទៅដល់សង្សារចាស់។ ពេលខឹងខ្លាំងធ្វើអ្វីគេមិនបាន ក៏សុំចែកផ្លូវគ្នា។

កញ្ញាបន្ថែម ថា៖ “គូស្នេហ៍ខ្លះនិយាយសុំចែកផ្លូវគ្នាឡើងក្លាយជាទម្លាប់ទៅហើយ ទាំងមិនបានពិចារណា ព្រោះគ្រាន់តែចង់ធ្វើបាបឲ្យម្ខាងទៀតគិតថា ខ្លួនគាត់ខុស។ នៅពេលអ្នកណាម្នាក់និយាយសុំបែកគ្នា ម្ខាងទៀតនឹងតបស្នងតាមសេចក្ដីត្រូវការនោះ ទោះគេនៅស្រលាញ់ក្ដី។ បាត់សង្សារមិនបញ្ហា តែបាត់បង់កិត្តិយស វាគឺជារឿងធំ”។

(រូបតំណាង)

មិនខ្វល់ មិនលួងលោម មិនចេះមើលថែទាំ ចំពោះកញ្ញា ខេមរៈ បុស្បា អាយុ២៤ឆ្នាំ អតីតនិស្សិតសាកលវិទ្យាល័យបញ្ញាសាស្ត្រ ជំនាញអក្សរសាស្ត្រអង់គ្លេស បញ្ចេញទស្សនៈទាក់ទងនឹងរឿងនេះថា បុរសខ្លះមិនហ៊ានយកចិត្តទុកដាក់មើលថែទាំមិត្តស្រីខ្លួនទេ ព្រោះគិតថាលួងច្រើន ខ្វល់ច្រើននឹងបានចិត្ត។ បុស្បា និយាយបញ្ជាក់ថា៖ “ការដែលបុរសគិតបែបនេះគឺខុសធ្ងន់ជាទីបំផុត។ ស្នេហាប្រៀបដូចជាទូរសព្ទអញ្ចឹង វាក៏ចេះអស់ថ្មដែរ ហើយនៅពេលវាជិតអស់ វាតែងលោតសញ្ញាប្រាប់ឲ្យបញ្ចូលវា។ មិនខុសគ្នាអីនឹងគូសង្សារទេ បើអ្នកគិតថាការខ្វល់ខ្វាយពីគ្នាជាការខុស គឺអ្នកនោះហើយដែលខុស ព្រោះមនុស្សស្រលាញ់គ្នាត្រូវយកចិត្តទុកដាក់សួរនាំគ្នាទៅវិញ ទៅមក ទើបស្នេហាផ្អែមល្ហែមទៅរួច។ នារីត្រូវការណាស់ការយកចិត្តមើលថែសូរនាំ បើពេលនាងមានទុក្ខមិនដែលឃើញមុខសង្សារនៅក្បែរ ឬនាងមានបញ្ហាបាក់ទឹកចិត្តត្រូវការលួងលោមពីមនុស្សដែលនាង ស្រលាញ់ផ្ដល់កម្លាំងចិត្ត តែបែរជាមិនអើពើនឹងនាងទៅវិញ។ នៅពេលនោះមិនយូរមិនឆាប់ ស្នេហានឹងផុតរលត់ទៅដោយឯកឯង”។

ប៉ិនយំ ប៉ិនឡូឡា ប៉ិនប្រច័ណ្ឌ នៅ ពេលស្រលាញ់គ្នាបានមួយរយៈ ស្ត្រីនឹងចាប់ផ្ដើមប្រច័ណ្ឌ ជួនកាលកើតឡើងដោយមិនដឹងខ្លួន ខ្លាចគេមានថ្មី ខ្លាចគេឈប់ស្រលាញ់ ដែលនេះជាអ្វីបានលើកឡើងដោយយុវជន ណុប ខន អ្នកសម្របសម្រួលនៃអង្គការសុខភាពមួយក្នុងរាជធានីភ្នំពេញ។ ខន ថ្លែងថា៖ “នារីខ្លះមិនទាន់ទាំងដឹងច្បាស់ថាសង្សារខ្លួនលួចមានថ្មី ឬ អត់ផង ក៏ឡូឡាចោទប្រកាន់ធ្វើតាមចិត្តគ្មានហេតុផល។ មានបុរសជាច្រើនសុខចិត្តជ្រើសផ្លូវបែកគ្នា។ មូលហេតុមកពីគេមិនអាចទ្រាំទ្របាន នៅពេលដែលនារីជាគូស្នេហ៍មិនផ្ដល់តម្លៃទុកចិត្តដល់រូបគេ។ នារីដែលចាត់ទុកខ្លួនឯងជាម្ចាស់ក្សត្រី ធានាថាមិនដល់មួយឆ្នាំទេ សង្សារប្រាកដជារត់ចោលមិនខាន”៕

ចុច ត្រង់នេះ! ដើម្បីចូលទៅបណ្ដុំអត្ថបទតិចនិកពិសេសៗសម្រាប់ស្នេហារក្រុមយុវវ័យ

៦យ៉ាងដែលស្រីៗគិត ពេលឃើញប្រុសៗដំបូង

បច្ចេកទេសឲ្យស្រីៗបាក់ស្រលាញ់ទោះមិនសង្ហា

អត្ថបទ៖ សុនា