ពិធីករ៣រូប មានមោទនភាពចំពោះក្រុមកម្ពុជាម្សិលមិញ តែបារម្ភជើងទី២

2015-03-13 20:18:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីករ៣រូប ក៏បានបង្ហាញមោទនភាពផងដែរ ចំពោះលទ្ធផលរបស់ក្រុមជម្រើសជាតិកម្ពុជា ដែលបានយកឈ្នះ ក្រុមម៉ាកាវ ៣-០ សម្រាប់វគ្គជម្រុះបឋម នៃពានរង្វាន់បាល់ទាត់ពិភពលោកប្រចាំទ្វីបអាស៊ីកាលពីម្សិលមិញនេះ។

ពិធីករ និងជាតារាសម្ដែង ជា វណ្ណារិទ្ធ បាននិយាយថា សប្បាយចិត្ត ព្រោះឃើញក្រុមកម្ពុជាធ្វើបានល្អដូច្នេះ ហើយនេះជាព្រឹត្តិការណ៍ដ៏កម្រមួយ។ តែពិធីកររូបនេះនិយាយថា ៖" ខ្ញុំគ្រាន់តែបារម្ភចំពោះការប្រកួតជើងទី២ប៉ុណ្ណោះ ព្រោះនៅលើទឹកដីគេផង និងខ្វះការលើកទឹកចិត្តផង"។

តារារូបនេះបន្តថា ការប្រកួតនៅថ្ងៃទី១៧ខាងមុខនេះ ម៉ាកាវ អាចនឹងដាក់សម្ពាធលើក្រុមកម្ពុជា ហើយពូកគេអាចនឹងគាបខ្សែបម្រើប្រយុទ្ធឆ្នើម ចាន់ វឌ្ឍនាកា និងកីឡាករផ្សេងទៀត ព្រោះក្រុមម៉ាកាវបានដឹងសមត្ថភាពកម្ពុជាខ្លះហើយ។

ស្រដៀងគ្នានេះដែរ វីជេ រតនា បាននិយាយថា បានចំណាយពេលតាមដានការប្រកួតម្សិលមិញនេះតាំងពីដើមរហូតដល់ចប់ និងហ៊ោកញ្ជ្រៀវរហូតស្អកក។ ទន្ទឹមនឹងមោទនភាពពិធីកររូបនេះនិយាយថា ៖" ខ្ញុំកំពុងបារម្ភខ្លាចគេស៊ីវិញ ប្រហែលជាគេបានត្រៀមខ្លួនល្អជាងនេះហើយមើលទៅ។ យ៉ាងណា នៅតែសង្ឃឹមលើកីឡាករខ្មែរយើង"។

ងាកមកពិធីការិនីស្រស់ស្អាត សុខ សុម៉ាវត្តី ឯណេះវិញ ក៏បានសរសេរនៅលើ Instagram របស់ខ្លួនថា ៖" អបអរសាទរកម្ពុជា...អ្នកធ្វើបានល្អនៅនាទីចុងក្រោយ។ នៅទៅលេងទឹកដីគេវិញ...សង្ឃឹមថា ឈ្នះៗ"៕

ការប្រកួតនៅស្តាតចាស់ម្សិលមិញ ក្រុមកម្ពុជាមិនអាចទម្លាញសំណាញ់ទីរបស់ក្រុមម៉ាកាវបានទេសម្រាប់៤៥នាទីដំបូង ប៉ុន្តែអាចទម្លាយសំណាញ់ទីរបស់ភ្ញៀវបាននៅតង់ទី២ដោយខ្សែប្រយុទ្ធ ចាន់ វឌ្ឍនាកា រកបាន២គ្រាប់ និង ឃួន ឡាបូរ៉ាវី រកបាន១គ្រាប់ដែលជួយឲ្យកម្ពុជាឈ្នះម៉ាកាវ៣-០។ កម្ពុជានឹងធ្វើដំណើរទៅប្រកួតជើងទី២នៅលើទឹកដីម៉ាកាវវិញនៅថ្ងៃទី១៧ ខែមីនាខាងមុខនេះ៕

អានអត្ថបទ៖ ក្រុម DJ នៅភ្នំពេញ បង្កើតកម្មវិធីជួបជុំ រឹតចំណងសាមគ្គីភាព

អានអត្ថបទ៖ ខួបកូនសោះ កាតុ អញ្ជើញសុទ្ធតែតារាល្បីៗច្រើនអស់ទាស់

អត្ថបទ៖ សំ ជំនាញ