រឿង៨យ៉ាង បុគ្គលិកជោគជ័យមិនគួរនិយាយនៅកន្លែងការងារ
- 2015-03-16 17:15:07
- ចំនួនមតិ 0 | ចំនួនចែករំលែក 0
រឿង៨យ៉ាង បុគ្គលិកជោគជ័យមិនគួរនិយាយនៅកន្លែងការងារ
ចន្លោះមិនឃើញ
កន្លែងការងារមួយអាចប្រព្រឹត្តទៅបានល្អឥតអាក់ លុះត្រាតែបុគ្គលិកទាំងអស់ចេះយោគយល់ ពិភាក្សាគ្នា និងជឿជាក់គ្នាទៅវិញទៅមក។ ទោះបែបនេះក្ដី មិនមែនគ្រប់រឿងទាំងអស់សុទ្ធតែត្រូវលើកយកមកនិយាយនោះទេ មានបញ្ហាមួយចំនួនក៏មិនត្រូវលាតត្រដាងដែរ។ ធ្វើបែបនេះ ដើម្បីកុំឲ្យអ្នកផ្សេងទៀតអាក់អន់ស្រពន់ចិត្ត ឬរឿងខ្លះដែលនិយាយចេញមកអាចប៉ះបាល់ដល់សកម្មភាពការងាររបស់អ្នក។ ខាងក្រោមនេះ គឺជារឿង ៨យ៉ាង លោកអ្នក មិនគួរលើកឡើងនៅកន្លែងការងារ៖
១. ធុញថប់នឹងការងារ
បុគ្គលិកល្អគួរបញ្ចេញកម្លាំងធ្វើការងារអស់ពីសមត្ថភាព ហើយបើទោះពេលខ្លះមានអារម្មណ៍ថាធុញថប់ ឬស្អប់ការងារ ក៏មិនត្រូវរៀបរាប់ចេញមកក្រៅមុខបុគ្គលិកផ្សេងទៀតដែរ។ ធ្វើបែបនេះ មានន័យថាអ្នកកំពុងមានគំនិតអវិជ្ជមានលើការងារដែលខ្លួនធ្វើ និងអូសអ្នកដទៃឲ្យមានគំនិតធុញថប់ដូចអ្នក។ មួយវិញទៀត បើពាក្យទាំងអស់នេះឮទៅដល់មេកើយ អ្នកនឹងក្លាយជាមុខសញ្ញាអាក្រក់ជាមិនខាន។
២. និយាយដើមបុគ្គលិកផ្សេងថាអសមត្ថភាព
ជាធម្មតា កន្លែងការងារមួយ ប្រាកដជាមានទាំងបុគ្គលិកប្រកបដោយសមត្ថភាពខ្ពស់ និងបុគ្គលិកអសមត្ថភាពខ្លះជាក់ជាមិនខាន។ បុគ្គលិកមួយចំនួនបាននិយាយដើមគេថាខ្សោយនៅពីក្រោយខ្នង ដើម្បីឲ្យបុគ្គលិកផ្សេងទៀតសរសើរសមត្ថភាពខ្លួន ប៉ុន្តែថ្ងៃណាមួយវានឹងបង្កផលអវិជ្ជមានដល់គេវិញ ព្រោះបុគ្គលិកផ្សេងទៀតអាចនិយាយដើមគេបានដូចគ្នា។ បើមិនបានជួយអ្វីគេទេ កុំនិយាយបង្អាប់គេពីក្រោយខ្នង ហើយត្រូវចាំថាបុគ្គលិកល្អប្រើសមត្ថភាពខ្លួនឯងដើម្បីឈានឡើង មិនមែនជាន់ពន្លិចអ្នកដទៃឡើយ។
៣. ប្រាក់ខែ
និយាយរឿងប្រាក់ខែជាមួយអ្នកផ្សេងក្រៅកន្លែងការងារជារឿងមិនសមរម្យទៅហើយ កុំថាឡើយជាមួយបុគ្គលិករួមការងារ។ បង្ហាញពីទំហំប្រាក់ខែអ្នកប្រាប់បុគ្គលិកផ្សេង នឹងនាំឲ្យមានការប្រៀបធៀប បង្កើតបានជាភាពច្រណែន ហើយគុណភាពការងារប្រាកដជាធ្លាក់ចុះមិនខាន។
៤. ជំនឿសាសនា និងនយោបាយ
មនុស្សភាគច្រើនរស់ជាមួយជំនឿ ទាំងសាសនា និងនយោបាយ ដែលជាប្រធានក្ដៅគគុកវែកញែករកចាញ់ឈ្នះមិនឃើញ។ មិនថាអ្នកដាក់ជំនឿលើសាសនាណា ឬប្រកាន់យកនយោបាយបក្សណា មិនគួរលាតត្រដាងនៅកន្លែងការងារឡើយ ព្រោះអាចបង្កជាការមើលមុខគ្នាមិនត្រង់។ មួយវិញទៀត ប្រសិនបើរឿងនេះត្រូវបានទម្លាយ បុគ្គលិកមួយចំនួនដែលជឿជាក់ស៊ប់ផ្ទុយនឹងអ្នក អាចចាត់ទុកអ្នកជាសត្រូវ៕
៥. ប្រវត្តិមិនល្អពេលនៅរៀន
អតីតកាលរបស់មនុស្សម្នាក់ អាចបញ្ជាក់ពីចរិតលក្ខណៈរបស់គេ។ បើទោះពេលនេះអ្នកប្រែជាល្អ ក៏មនុស្សភាគច្រើនមិនដាក់ជំនឿលើអ្នកខ្លាំងដែរ។ ធ្លាប់ដើរលេងគេចសាលា ផឹកស្រាសប្បាយ ប្រើគ្រឿងញៀន ឬវាយតប់គ្នាជាដើម មិនគួរទម្លាយប្រាប់បុគ្គលិកដទៃឡើយ ព្រោះវាអាចមានផលអវិជ្ជមានចំពោះអ្នក។ ម្យ៉ាងវិញទៀត បើដឹងថាអ្នកធ្លាប់មានប្រវត្តិអាក្រក់ គេប្រាកដជាមិនសូវគោរពតាមការដឹកនាំរបស់អ្នកឡើយ។
៦. បង្ហាញអំនួត
ទោះខ្លួនពូកែយ៉ាងណា ក៏មិនត្រូវនិយាយអួតអាងនៅមុខបុគ្គលិកដទៃដែរ ព្រោះមានអំនួតបែបនេះអាចធ្វើឲ្យគេស្អប់បានគ្រប់ពេលវេលា។ អ្នកមានសមត្ថភាពប៉ុនណា បុគ្គលិកដទៃប្រាកដជាមើលឃើញ ហើយអ្វីដែលត្រូវធ្វើនោះ គឺប្រើសមត្ថភាពរបស់អ្នកបំពេញការងារ និងជួយបុគ្គលិកដទៃទើបជាការល្អ។
៧. និយាយលេងសើចច្រើន
ជាការពិតណាស់ នៅកន្លែងការងារគួរបង្កើតបរិយាកាសរីករាយខ្លះ ប៉ុន្តែជួនកាលបើធ្វើឡើងជ្រុលពេក វាអាចក្លាយជាការរំខានដល់អ្នកដទៃ។ ពេលខ្លះការលេងសើចនោះ ប៉ះពាល់ដល់ជីវិតពិតរបស់អ្នកដទៃ ដែលនឹងបង្កើតជាការថ្នាំងថ្នាក់ណាមួយ។
៨. ប្រាប់គ្រប់គ្នាថាកំពុងស្វែងរកការងារថ្មី
នៅពេលអ្នកប្រាប់បុគ្គលិកផ្សេងថាកំពុងស្វែងរកការងារ និងមានគម្រោងចាកចេញ វាប្រៀបដូចជាអ្នកបញ្ចប់ឱកាសខ្លួនឯងដែរ។ គ្រប់គ្នានឹងយល់ថាអ្នករង់ចាំតែពេលចាកចេញ និងគ្មានចិត្តធ្វើការងារឡើយ ដែលអាចប៉ះពាល់ដល់ការឡើងតួនាទី ឬការទទួលបានប្រយោជន៍ផ្សេងៗក្នុងកន្លែងការងារ។ ពេលខ្លះការតាមប្រមាញ់ការងារថ្មីរបស់អ្នកអាចបរាជ័យ ដែលតម្រូវឲ្យអ្នកត្រូវធ្វើការនៅកន្លែងដដែល។ ដូចនេះ យល់ល្អចាំរកការងារថ្មីនោះបាន ចាំលាតត្រដាងប្រាប់អ្នករាល់គ្នា។
ចុចអាន៖ រឿងរ៉ាវ ៤ យ៉ាងមិនគួរនិយាយពេលទើបចាប់ផ្ដើមការងារថ្មី
ប្រែសម្រួល៖ គង់ វិសាល ប្រភព៖ businessinsider
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
