តារាចម្រៀង ៤ ដួង ប្រកាន់ទស្សនៈសុខចិត្តស្លាប់ មិនច្រៀងបទចម្លងពីបរទេស

2015-03-17 17:02:19
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង ៤ ដួងស្ថិតក្នុងទ្រនំផ្សេងគ្នា ប៉ុន្តែ ប្រកាន់ទស្សនៈដូចគ្នាថា សុខចិត្តស្លាប់ពីច្រៀងចម្រៀង ដែលចម្លងពីបរទេស។ តារាចម្រៀងទាំង ៤ដួងចូលចិត្តការតែងនិពន្ធដោយខ្លួនឯងមានដូចជា សួន ពិសិដ្ឋ ញឹម ចំរើន ឌីជេ ក្ដឹប និង Jimmy kiss។

សួន ពិសិដ្ឋ ជាអ្នកនិពន្ធល្បីឈ្មោះក្នុងប្រទេសកម្ពុជា ក៏ប៉ុន្តែតារារូបនេះ បានវិវត្តន៍ខ្លួនក្លាយជាតារាចម្រៀងមួយទៀតបន្ទាប់ពីបោះជំហានមកកាន់ផលិតកម្ម រស្មីហង្សមាស។ ម្ចាស់ជយលាភី កម្មវិធីអាណាចក្រតារាពីរឆ្នាំជាប់គ្នាប្រាប់ Sabay កាលពីពេលកន្លងទៅថា ទោះជាស្ថិតក្នុងកាលៈទេសៈណាក៏ដោយ លោកមិនចម្លងស្នាដៃពីបរទេស ឬពីនរណាម្នាក់ឡើយគឺខិតខំបង្កើតអ្វីជាស្នាដៃកូនខ្មែរពិតៗ។

អតីតអ្នកនិពន្ធក្នុងផលិតកម្ម Rock បន្តថា ទោះជាបទចម្រៀងដែលលោកនិពន្ធ រួមនឹងច្រៀងជាការនិពន្ធថ្មីផ្ទាល់ដៃ មិនសូវទទួលការចាប់អារម្មណ៍ពីទស្សនិកជនក្ដី លោកនៅតែបន្តជានិច្ច ហើយថ្ងៃណាមួយទស្សនិកជននឹងយល់ងាកមកគាំទ្រស្នាដៃបង្កើតថ្មីជារបស់ខ្មែរ។

Jimmy Kiss ជាតារាចម្រៀងកំពុងស្ថិតក្នុងដួងចិត្តប្រិយមិត្ត និង មិត្តៗយុវវ័យ ដោយសារតែលោកចូលចិត្តការតាក់តែងបទចម្រៀងថ្មីខ្លួនឯងមិនចម្លងពីបរទេស។ បើទោះទស្សនិកជនខ្មែរមួយចំនួនឱ្យតម្លៃលើបទចម្រៀងបរទេស ក៏ប៉ុន្តែម្ចាស់បទ Baby I'm Sorry អះអាងចម្រៀង Original មិនសាបសូន្យទេ គឺមានមហាជនខ្មែរនៅតែឱ្យតម្លៃការបង្កើតថ្មីដោយកូនខ្មែរដដែល។

សារុន កល្យាណ ហៅ Jimmy Kiss បន្តថាការតាំងចិត្តខ្ពស់ សុខចិត្តស្លាប់មិនចម្លងស្នាដៃពីបរទេស ដោយខិតខំបង្កើតអ្វីជារបស់ខ្លួនឯង ធ្វើឱ្យទស្សនិកជនជាច្រើនងាកមកចាប់អារម្មណ៍ ឱ្យតម្លៃ និងគាំទ្រការបង្កើតថ្មី។

ញឹម ចំរើន ទើបតែរកឃើញទ្រនំថ្មីគឺផលិតកម្ម Legend Tiger ក្រោយចាកចេញពីផលិតកម្ម Rock កាលពីឆ្នាំ២០១១។ ការបាត់មុខជាយូរឆ្នាំពីពិភពសិល្បៈ ដោយសារតែលោកចង់ស្វែងរកផលិតកម្មណាដែលតាក់តែងបទចម្រៀងថ្មីដោយខ្លួនឯងមិនចម្លងពីបរទេស។

ម្ចាស់បទ"មិនប្រកាសសង្គ្រាមទេអូន" លើកឡើងថាផលិតកម្មជាច្រើនទាក់ទងទៅច្រៀងក្រោយចេញពី Rock តែលោកមិនទទួលព្រោះតែផលិតកម្មភាគច្រើនគឺចម្លងស្នាដៃពីបរទេស។ លោកថាប្រសិនបើខ្លួនច្រៀងឱ្យផលិតកម្មដែលចម្លងពីបរទេស គឺក្បត់ឧត្ដមគតិខ្លួនឯង ដូច្នេះហើយទើបលោករង់ចាំផលិតកម្មធ្វើបទថ្មីមិនយកលំនាំតាមនរណាម្នាក់។

ឌីជេ ក្ដឹប តារាចម្រៀងរ៉េបឈានមុខម្នាក់នៅក្នុងប្រទេស កម្ពុជា។ លោកបានសន្យានឹងខ្លួនឯង ឪពុកម្ដាយ និង មិត្តភ័ក្ដិថា នឹងធ្វើបទចម្រៀងថ្មីរហូតលុះដល់ដង្ហើមចុងក្រោយ។ ពោលមិនចម្លងស្នាដៃពីបរទេស ឬពីនរណាម្នាក់ទេ។

តារាចម្រៀងរូបនេះត្រៀមនឹងចេញបទចម្រៀងជាការនិពន្ធថ្មីសុទ្ធជាង ១០បទជាមួយ មាស សុខសោភា ក្នុងផលិតកម្ម Camtrax Music ដែលលោកទើបបង្កើតថ្មីដោយខ្លួនឯង។ តាមរយៈការបង្កើតចម្រៀងថ្មីដោយខ្លួនឯង ក្ដឹប មានក្ដីរំពឹងខ្ពស់ថានឹងទទួលការចាប់អារម្មណ៍ច្រើនពីទស្សនិកជនពេលចេញលក់លើទីផ្សារ។

ក្រៅតែពីតារាចម្រៀងទាំងបួនដូងនេះ ក៏នៅមានអ្នកនិពន្ធ និងតារាចម្រៀងផ្សេងទៀតខិតខំបង្កើតស្នាដៃផ្ទាល់ខ្លួនផងដែរ។ ជាពិសេសមួយរយៈចុងក្រោយ ផលិតកម្មនានាបានពង្រឹងការផលិតស្នាដៃថ្មីច្រើន ក្នុងន័យទាក់ទាញការចាប់អារម្មណ៍ពីទស្សនិកជន៕

អានអត្ថបទបន្ត៖ តារាថៃបង្ហោះវីដេអូជេរអ្នកទេសចរចិន ក្លាយជាប្រធានបទ

អានអត្ថបទបន្ត៖ ស្រីស្អាត ស៊ឹម សិរីរ័ត្នមុនី បានត្រឹមតួធំឆ្នាស់ឆ្នើម

អានអត្ថបទបន្ត៖ Arnold ជិះកង់អត់ពាក់មួកនៅអូស្ត្រាលី ប៉ូលិសរវល់រំភើបភ្លេចផាក

អត្ថបទ៖ អ៊ីង សុឡា