ឆាយ វីរៈយុទ្ធ៖ តាំងពីចេះច្រៀងមកមិនមានបទណាពិបាកស្រែកដូចបទនេះ

2015-03-19 16:17:55
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងលេចធ្លោរបស់ផលិតកម្ម សាន់ដេ និយាយថា តាំងពីផ្ដើមអាជីពជាអ្នកចម្រៀងមក មិនដែលមានបទចម្រៀងណាពិបាកស្រែកដូចបទ "នឹកសង្សារចាស់" ឡើយ។ លោកលើកឡើងដូចច្នេះ ខណៈទស្សនិកជនបានឃើញលោកច្រៀងបទនេះក្នុងកម្មវិធី Smart Mega Concert កាលពីពេលថ្មីៗកន្លងទៅ ដោយស្រែកច្រៀងរហូតដល់ស្អកសំឡេង។

ឆាយ វីរៈយុទ្ធ លើឆាកប្រគំតន្ត្រីថ្មីៗនេះ

ឆាយ វីរៈយុទ្ធ បានបញ្ជាក់ដូច្នេះថា "មានបទចម្រៀងច្រើនខ្ញុំធ្លាប់ច្រៀង ហើយស្រែកខ្លាំង តែបទនេះគឺស្រែកខ្លាំងលើសបទចម្រៀងណាៗទាំងអស់។ លើកដំបូងខ្ញុំជួបប្រទះតាំងពីចេះច្រៀងជាង ១០ឆ្នាំមកនេះ"។

ម្ចាស់បទ "សង្សារលួចលាក់" បន្តថាទោះជាបទចម្រៀងខាងលើពិបាកស្រែកដល់ថ្នាក់ណាក៏ដោយ ក៏លោកនៅតែព្យាយាមដើម្បីបំពេញសេចក្ដីត្រូវការរបស់ទស្សនិកជនដែរ។

ទាក់ទងនឹងការច្រៀងបទ"នឹកសង្សារចាស់" ស្រែកភ្លាត់បន្តិចកាលពីពេលថ្មីៗក្នុងកម្មវិធី Smart Mega Concert វីរៈយុទ្ធ ប្រាប់ថា ដោយសារលោកត្រូវប្រើសំឡេងផ្ទាល់ មិនចង់ចាក់ឌីសឡើយខ្លាចទស្សនិកជនរិះគន់។ ម្យ៉ាងទៀតព្រោះតែមានសំណូមពរពីទស្សនិកជនច្រើនពេកទើបលោកលើកយកបទចម្រៀងខាងលើមកបកស្រាយ។

អតីតតារាចម្រៀងរបស់ផលិតកម្ម Bigman បន្ថែមថា រាល់ការបកស្រាយបទចម្រៀង "នឹកសង្សារចាស់" ម្ដងៗនៅតាមកម្មវិធីប្រគំតន្ត្រីនានាលោកតែងត្រៀមហាត់សមយ៉ាងយកចិត្តទុកដាក់បំផុត ព្រោះជាបទចម្រៀងពិបាកស្រែក និងធ្វើសំឡេងបំផុត។

យ៉ាងណាក៏ដោយតារាចម្រៀងមានប្រភពមកពីខេត្ត កំពង់ចាម រូបនេះបានសុំអធ្យាស្រ័យពីប្រិយមិត្ត និងមិត្តៗយុវវ័យប្រសិនបើការបកស្រាយបទចម្រៀងដ៏តឹងរបស់លោកមានចំណុចខ្វះខាតមួយចំនួន។

ទន្ទឹមនឹងនោះលោកក៏ស្នើដល់ទស្សនិកជនបន្តគាំទ្របទចម្រៀងរបស់ខ្លួនតទៅទៀតដើម្បីលើកកម្ពស់វិស័យចម្រៀងខ្មែរ ហើយលោកត្រៀមនឹងពាំនាំបទចម្រៀង ក៏ដូចជាស្ទីលថ្មីៗជាច្រើនទៀតសម្រាប់បម្រើអារម្មណ៍មហាជន។

បទចម្រៀង "នឹកសង្សារចាស់" ជាបទថ្មីរបស់អតីតតារាចម្រៀងផលិតកម្ម M រូបនេះ ទើបតែចេញលក់ជា CD នៅលើទីផ្សារ ហើយត្រៀមនឹងចេញជា VCD ក្នុងពេលឆាប់ៗខាងមុខ។

ឆាយ វីរៈយុទ្ធ ផ្ដើមអាជីពជាអ្នកចម្រៀងក្នុងឆ្នាំ២០០២ ប៉ុន្តែមិនទាន់មានបទចម្រៀងចេញលក់លើទីផ្សារគឺដើរច្រៀងតាម រង្គសាល ប៉ុណ្ណោះ។ ទើបតែឆ្នាំ២០០៥លោកបានចេញ CD លើកដំបូងក្នុងផលិតកម្ម រស្មីស្ទឹងសែន។

កេរ្តិ៍ឈ្មោះរបស់លោកចាប់ផ្ដើមល្បី និងមានអ្នកស្គាល់ច្រើនពេលមានវត្តមានក្នុងផលិតកម្ម Blue Diamond ក្នុងបទ "កិច្ចសន្យាស្នេហ៍"។ ចាប់តាំងពីពេលនោះមកលោកផ្ដើមមានទីផ្សារខ្ពស់រហូតដល់ពេលបច្ចុប្បន្ន៕