ទម្រង់ល្ខោនខោលដ៏កម្រ នឹងរំលេចខ្លួនក្នុងបុណ្យភូមិលើកទី២
- 2015-03-24 17:49:33
- ចំនួនមតិ 0 | ចំនួនចែករំលែក 0
ទម្រង់ល្ខោនខោលដ៏កម្រ នឹងរំលេចខ្លួនក្នុងបុណ្យភូមិលើកទី២
ចន្លោះមិនឃើញ
ទម្រង់ល្ខោនខោលដ៏កម្រ នឹងរំលេចខ្លួននៅក្នុងពិធីបុណ្យភូមិលើកទី ២ នាឆ្នាំនេះ ដើម្បីឱ្យយុវជនជំនាន់ក្រោយមានឱកាសស្វែងយល់ ហើយជាផ្នែកមួយនៃការអភិរក្ស និង អភិវឌ្ឍវប្បធម៌ជាតិ។
លោក ហង្ស ភូមរ៉ា នាយកនៃក្រុមសិល្បៈខ្មែរ បាននិយាយនៅក្នុងសន្និសីទកាសែតម្សិលមិញថា ទម្រង់ល្ខោនខោល មិនសូវមានអ្នកស្គាល់នោះទេ ជាពិសេសក្នុងស្រទាប់យុវវ័យជំនាន់ក្រោយ។
លោកបញ្ជាក់ថា៖ "ខ្ញុំចង់បញ្ជាក់ថា ប្រទេសគេអត់មានសិល្បៈច្រើនទម្រង់ដូចខ្មែរទេ តែយើងមិននាំគ្នាចូលរួមថែរក្សា បែរជាឱ្យតម្លៃលើវប្បធម៌បរទេសទៅវិញ"។ ប្រធាននៃក្រុមសិល្បៈរូបនេះ បញ្ជាក់ថា សូម្បីនៅសាកលវិទ្យាល័យភូមិន្ទវិចិត្រសិល្ប ក៏មានអ្នកចាប់អារម្មណ៍ទៅលើទម្រង់ល្ខោនបុរាណតិចតួចដែរ។ ដូច្នេះលោកព្រមានថា ប្រសិនបើមិនមានការយកចិត្តទុកដាក់ទេនោះ អនាគតទៅទម្រង់សិល្បៈទាំង ២៤ អាចបាត់បង់មិនខានឡើយ ដោយសារតែភាពព្រងើយកន្តើយរបស់យុវជន យុវនារីខ្មែរ។
មូលហេតុចម្បងខាងលើ ធ្វើឱ្យលោកចាំបាច់ត្រូវរៀបចំឱ្យមានការបង្ហាញនូវផ្ទាំងទស្សនីយភាពល្ខោននេះ ក្នុងសុទិដ្ឋិនិយមថា នឹងអាចធ្វើឱ្យប្រជាពលរដ្ឋខ្មែរបានជ្រួតជ្រាបកាន់តែច្រើន។ ជាពិសេស ពូកគេអាចងាកមកចាប់អារម្មណ៍ និង ស្រលាញ់ទម្រង់ល្ខោនខោល និង ទម្រង់សិល្បៈដទៃទៀត ដែលជាការថែរក្សាលើកតម្កើងវប្បធម៌ខ្មែរ។
ជាមួយគ្នានោះដែរ ប្រធានក្រុមភ្លើងគប់ និង ជាសហស្ថាបនិកបាននិយាយថា បុណ្យភូមិលើកទី ២ រៀបឡើងនៅបរិវេណវត្តព្រែកថ្លឹង ជាយទីក្រុងភ្នំពេញដដែល ដោយមានការសហការពីក្រុមរីកសាយ,ក្រុមភ្លើងគប់ និង វិទ្យុ ABC ១០៧.៥។ ពិធីបុណ្យនេះរៀបចំឡើងចាប់ពីថ្ងៃទី ៣, ទី៤ និង ទី ៥ ខែ មេសា ខាងមុខនេះ។
កញ្ញា បញ្ជាក់ថា ទោះបីជាការរៀបចំមានទំហំប៉ុនឆ្នាំមុនក៏ពិតមែន ប៉ុន្តែ អាចនឹងមានការចូលរួមច្រើនជាងឆ្នាំមុន ដោយប្រជាពលរដ្ឋអាចចូលរួមលេងល្បែងកម្សាន្តនានាជារបស់ខ្មែរ និង បានទស្សនាទម្រង់សិល្បៈជាច្រើនទៀតផងដែរ។ យុវតីវ័យក្មេងរូបនេះបង្ហាញឆន្ទៈ នឹងរៀបចំជារៀងរាល់ឆ្នាំប្រសិនបើនៅតែមានការគាំទ្រ និងអាចឈានទៅដល់បណ្ដាខេត្តនានាទៀតផង សម្រាប់ផែនការអនាគត៕
អានអត្ថបទ៖ ប៉ាដឹងប៉ាវ៉ៃ ព្រាប សុវត្ថិចេញ Trailer ហើយធានាថាសើច
អានអត្ថបទ៖ ណុប លក្ខិណា មិនខ្លាចថតឈុតសិចស៊ីទេ
អានអត្ថបទ៖ មិនធម្មតា…បទចម្រៀងរបស់ AGO ល្បីដល់អាមេរិកទៀត!
កញ្ញា រិទ្ធី លំអងពេជ្រ បង្ហាញពីបុណ្យភូមិ