ក្មេងតូចក្ដៅខ្លួន គួរធ្វើដូចម្ដេច?

2015-03-30 15:58:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាទូទៅ ក្មេងតូចៗតែងគ្រុនក្ដៅចៀសមិនផុតដែលធ្វើឲ្យឪពុកម្ដាយមានការព្រួយបារម្ភយ៉ាងខ្លាំង រហូតមិនដឹងថា គួរធ្វើយ៉ាងណាដើម្បីឲ្យកូនតូចជាទីស្រលាញ់មានភាពធូរស្បើយវិញ ។ នេះបើតាមការលើកឡើងរបស់ក្រុមគ្រូពេទ្យ ប្រាប់ Sabay ឲ្យដឹងកាលពេលថ្មីៗនេះ។

លោកសាស្រ្តាចារ្យ គឹម អាង

ក្នុងសិក្ខាសាលា ដែលរៀបចំដោយក្រុមហ៊ុនសាណូហ្វីប្រចាំកម្ពុជាអំពី “ជំងឺឆ្លងនៅលើកុមារ និង ការគ្រប់គ្រងអាការៈគ្រុនក្ដៅ” លោក គឹម អាង សាស្ត្រាចារ្យឯកទេសរោគកុមារ នៃមន្ទីរពេទ្យកុមារជាតិ និង ជាសាស្រ្តាចារ្យបង្រៀននៅសាកលវិទ្យាល័យវិទ្យាសាស្ត្រសុខាភិបាល និង ជាអនុប្រធានសមាគមគ្រូពេទ្យកុមារកម្ពុជាផងដែរ បកស្រាយថា នៅពេលកូនក្ដៅខ្លួន ឪពុកម្ដាយចៀសវាងដណ្ដប់កូនហួសហេតុ ដោយយកភួយក្រាស់ៗ ឬអាវរងា តែក៏មិនត្រូវដោះអស់រលីងដែរ គឺត្រូវមានអាវយឺតស្ដើង និង ត្រូវមើលថា កូនក្ដៅក្នុងកម្រិតប៉ុន្មាន តិចតួច ឬខ្លាំង។

លោក សាស្រ្តាចារ្យ បានបន្ថែមទៀតថា បើក្ដៅខ្លាំងចាប់ពី ៣៨ អង្សា ត្រូវយកកន្សែងជ្រលក់ជាមួយទឹកក្ដៅឧណ្ហៗ មកជូតខ្លួនកុមារប្រហែល ៤ ទៅ ១០ នាទី។ បន្ទាប់មកប្រើថ្នាំបញ្ចុះកម្ដៅក្នុងបរិមាណត្រឹមត្រូវ អាចឲ្យកូនធូរស្រាលបានខ្លះដែរ រួចសឹមបញ្ជូនកូនទៅជួបគ្រូពេទ្យ។ ហាមប្រើទឹកកកឬអាល់កុលមកជូតខ្លួនកូនព្រោះធ្វើឲ្យកុមារពិបាកទ្រាំទ្រ និង ជួនកាលការប្រើទឹកកកនាំឲ្យការបញ្ចេញកម្ដៅពីខ្លួនកុមារត្រូវបានរាំងស្ទះទៀតផង។

លោក គឹម អាង បន្តថា ការបញ្ជូនកូនទាំងតក់ក្រហល់ភ្លាមបន្ទាប់ពីដឹងថា កូនក្ដៅខ្លួននោះ មិនមែនជារឿងល្អឡើយ ព្រោះក្មេងក្ដៅភ្លាម មិនទាន់ចោទជាបញ្ហា ឬសញ្ញាបន្ទាន់ឡើយ។ ឪពុកម្ដាយខ្លះ គ្រាន់តែដឹងថា កូនក្ដៅខ្លួនភ្លាម ក៏ទៅជួបគ្រូពេទ្យទាំងយប់កណ្ដាលអាធ្រាត្រក៏មាន ដែលនេះមិនមែនជាវិធីល្អឡើយ ។ អ្វីដែលល្អ គឺឪពុកម្ដាយត្រូវជូតខ្លួនឲ្យកូន ប្រើថ្នាំបញ្ចុះកម្ដៅក្នុងបរិមាណសមរម្យ បន្ទាប់មកតាមដានថា តើកូនមានអាការៈក្ដៅខ្លួនធ្ងន់ធ្ងរឬទេ?។

លោក លឹម ភារុន

ចំពោះ លោកវេជ្ជបណ្ឌិត លឹម ភារុន អ្នកគ្រប់គ្រងផលិតផលឱសថ DOlIPRANE របស់ក្រុមហ៊ុនសាណូហ្វីប្រចាំកម្ពុជា មានប្រសាសន៍ថា ការឲ្យកុមារទទួលបានការថែទាំ ការការពារ និង ការព្យាបាលបានត្រឹមត្រូវសមស្របទៅតាមលក្ខខណ្ឌសុខភាពរបស់ពួកគេ ធ្វើឲ្យពួកគេមានសុខភាពល្អ និង មិនចំណាយថវិកាច្រើន។ បន្ទាប់មកត្រូវនាំកុមារមកជួបគ្រូពេទ្យ ដើម្បីពិនិត្យឲ្យឃើញថាកុមារមានឈឺអ្វីពិតប្រាកដ តាមពេលវេលាមួយដ៏សមស្របកុមារ មាតាបិតា និង គ្រូពេទ្យ។

ដូច្នេះហើយ ក្នុងនាមជាសាស្ត្រាចារ្យ លោក គឹម អាង បានផ្គាំផ្ញើថា ការយល់ដឹងពីការគ្រប់គ្រងអាការៈគ្រុនក្ដៅរបស់កុមារ គឺជា ចំណេះដឹងសំខាន់ដែលឪពុកម្ដាយត្រូវរៀនសូត្រដើម្បីកុំឲ្យក្លាយជាកិច្ចការមួយ ដែលរំខានការងារខ្លួនឯងយ៉ាងខ្លាំង កុំឲ្យពីការងារសាមញ្ញទៅជាការលំបាក៕

សូមទស្សនាវីដេអូខាងក្រោម