Harry ស្រក់ទឹកភ្នែកលើឆាក ពេល Louis ឱបស្រមោល Malik

2015-03-26 18:13:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណឹងដើរចេញពីក្រុម One Direction របស់ Zayn Malik ធ្វើឱ្យកក្រើកពិភពលោក ដោយមនុស្សភាគច្រើនបានសម្ដែងអារម្មណ៍ស្ដាយស្រណោះ។ មិនខុសពីមនុស្ស ឬអ្នកគាំទ្រដទៃទេ អារម្មណ៍របស់ Harry Styles ក៏ដូច្នេះដែរ ហើយក្នុងកម្មវិធីប្រគំតន្ត្រីទេសចរណ៍ On The Road Again Tour ក្នុងទីក្រុង Jakarta ថ្មីៗនេះ តារា២១ឆ្នាំបានស្រក់ទឹកភ្នែកម្នាក់ឯង។

សមាជិកក្រុម 1D រូបនេះ បានយំក្នុងកម្មវិធីប្រគំតន្ត្រី On The Road Again Tour ចុងក្រោយរបស់ខ្លួន ក្នុងប្រទេសឥណ្ឌូណេស៊ី ពេលឃើញសកម្មភាពមិត្តរួមក្រុម Louis Tomlinson ឱបស្រមោល Malik ខណៈកំពុងសម្ដែងលើឆាក។

បើមើលតាមរូបថត ខណៈពេល Liam Payne ឱប Harry តារាចម្រៀង Louis បានយកដៃខ្លួនឱបខ្យល់(Zayn Malik) ដែលជាហេតុធ្វើឱ្យ Harry យំមុខហ្វូងទស្សនិកជនរាប់ពាន់នាក់។ បច្ចុប្បន្នក្រុមចម្រៀងប្រុស លំដាប់ពិភពលោក One Direction សល់គ្នាតែ៤នាក់ទេ គឺ Niall Horan, Harry, Liam Payne និង Louis Tomlinson។

ជុំវិញការចាកចេញ បុរសសង្ហា២២ឆ្នាំ ធ្វើឱ្យបាននិយាយកាលពីថ្ងៃពុធថា "ជីវិតខ្ញុំនៅជាមួយ One Direction គឺច្រើនជាងអ្វីខ្ញុំធ្លាប់រំពឹងទុក ប៉ុន្តែបន្ទាប់ពី៥ឆ្នាំនេះ ខ្ញុំយល់ថាដល់ពេល ដែលត្រូវចេញហើយ។ ខ្ញុំសុំទោសចំពោះអ្នកគាំទ្រ បើសិនខ្ញុំធ្វើឱ្យអ្នកទាំងអស់គ្នាអាក់អន់ចិត្ត តែខ្ញុំត្រូវតែធ្វើអ្វីដែលខ្ញុំចង់ធ្វើ"។

លោកបន្តថា "ខ្ញុំចេញព្រោះខ្ញុំចង់ធ្វើជាបុរសវ័យ២២ឆ្នាំសាមញ្ញម្នាក់ ដែលអាចសម្រាក និងមានពេលឯកជនផ្ទាល់ខ្លួន។ ខ្ញុំដឹងខ្ញុំមានមិត្តបួននាក់ គឺ Louis, Liam, Harry និង Niall។ ខ្ញុំដឹងថាពួកគេនឹងបន្តធ្វើឱ្យក្រុមល្បីក្នុងពិភពលោក"៕