ប៉ែន ចំរុង ជ្រើសរើសយកតែ ១ ក្នុងចំណោម ៥
- 2015-03-26 18:21:51
- ចំនួនមតិ 0 | ចំនួនចែករំលែក 0
ប៉ែន ចំរុង ជ្រើសរើសយកតែ ១ ក្នុងចំណោម ៥
ចន្លោះមិនឃើញ
តារាកំពុងឡើងកូដ ប៉ែន ចំរុង ជ្រើសរើសយកតែរឿង ១ ប៉ុណ្ណោះ ក្នុងចំណោមខ្សែភាពយន្ត ៥ មកទាក់ទងឱ្យថត។ ខ្សែភាពយន្តធ្វើឱ្យលោកសម្រេចចិត្តគឺរឿង "ខ្មោចថតកុន" របស់ផលិតកម្ម មហាហង្ស ទើបក្រុងពាលីព្រឹកមិញ។
តារាសម្ដែង និង ពិធីករ រូបនេះ បានលើកឡើងថា៖ "និយាយទៅនរណាមកមុន ខ្ញុំកុងត្រាថតឱ្យមុន មិនរើសផលិតកម្មទេ។ មិនក្រោម ៥ ផលិតកម្មទេទាក់ទងខ្ញុំដំណាលគ្នា តែខ្ញុំសម្រេចចិត្តថតរឿង "ខ្មោចថតកុន"។
ប៉ែន ចំរុង និង ភិន សុដាលីស តួឯកក្នុងរឿង ខ្មោចថតកុន ធ្វើពិធីក្រុងពាលីព្រឹកមិញ
ប៉ែន ចំរុង មិនបង្ហើបពីឈ្មោះផលិតកម្ម ៤ ផ្សេងទៀត មកទាក់ទងថតទេ ក៏ប៉ុន្តែប្រការនាំឱ្យលោកសម្រេចចិត្តថតឱ្យខ្សែភាពយន្តខាងលើ ដោយសារមើលឃើញសាច់រឿងទាំងមូលមានលក្ខណៈប្លែកខុសពីរឿងដទៃៗផ្សេងទៀតធ្លាប់សម្ដែងពីមុន។ ប្លែកត្រង់ថា លោកនឹងត្រូវប្រើចរិតតួអង្គ បីផ្សេងគ្នាក្នុងសាច់រឿងតែមួយ។
តាមរយៈការសម្ដែងចរិតតួអង្គប្លែក និង សាច់រឿងគួរឱ្យទាក់ទាញម្ចាស់ជយលាភីពានពីរម្នាក់ឯងក្នុងកម្មវិធី អាណាចក្រតារាកាលពីឆ្នាំ ២០១៣ កន្លងទៅ ជឿជាក់ថា នឹងអាចទាក់ទាញការចាប់អារម្មណ៍បានច្រើនពីទស្សនិកជននៅពេលដាក់បញ្ចាំងលើទីផ្សារ។
ដោយឡែកការសម្ដែងជាមួយដៃគូស្រី ភិន សុដាលីស និង តារាផ្សេងៗទៀតពិធីកររបស់ស្ថានីយទូរទស្សន៍ អាស៊ីអាគ្នេយ៍រូបនេះ អះអាងថា មិនមានអ្វីចោទជាបញ្ហាទេ ព្រោះធ្លាប់សម្ដែងរួមគ្នារួចទៅហើយ។ ម្យ៉ាងទៀតតារាម្នាក់ៗ សុទ្ធសឹងតែជាអ្នកមានបទពិសោធន៍រៀងៗខ្លួន។
ទាក់ទងនឹងខ្សែភាពយន្តដែល ប៉ែន ចំរុង សម្រេចជ្រើសរើសយកតែ ១ ក្នុងចំណោម ៥ គឺរឿង "ខ្មោចថតកុន" ចាងហ្វាងផលិតកម្ម មហាហង្ស និង ជាអ្នកនិពន្ធលោក អ៊ិន សុភិន បានលើកឡើងថា ខ្សែភាពយន្តនេះគឺសម្រិតសម្រាំងជាខ្លាំងដើម្បីបំពេញតម្រូវការទស្សនិកជន។
លោក អ៊ិន សុភិន បញ្ជាក់ថា៖"ខ្ញុំធានាថារឿងនេះប្លែកជាងរឿងមុនៗឆ្ងាយ ជាពិសេសរឿង អាព្រឿងងាប់ហើយ។ ខ្មោចថតកុន គឺប្លែកទាំងសាច់រឿង និងតួអង្គស្ទើរតែទាំងអស់"។
ចាងហ្វាងផលិតកម្ម មហាហង្ស បន្តថា ដោយប្រើដើមទុនចន្លោះពី ៦ម៉ឺនទៅ ៨ម៉ឺនដុល្លារ ខ្សែភាពយន្តខាងលើអាចនឹងនាំទៅចាក់បញ្ចាំងនៅក្រៅប្រទេសថែមទៀត បន្ទាប់ពីថតចប់ ដាក់បញ្ចាំងរួចរាល់ក្នុងទីផ្សារ កម្ពុជា។
ក្នុងឆ្នាំ ២០១៥ ប៉ែន ចំរុង ថតបានខ្សែភាពយន្ត ៥រឿងមកហើយ។ ដោយឡែកសម្រាប់រឿង ខ្មោចថតកុន លោកនឹងត្រូវសម្ដែងជាតួឯកជាមួយ ភិន សុដាលីស ម្ដងទៀតបន្ទាប់ធ្លាប់ចាប់ដៃគ្នាម្ដងក្នុងរឿង អាព្រឿងងាប់ហើយ កាលពីពេលថ្មីៗ៕
អានអត្ថបទបន្ត៖ អីយ៉ា…អេឡិច ច័ន្ទត្រា ដូរថ្មីទៀតហើយ!
អានអត្ថបទបន្ត៖ បវរកញ្ញាជប៉ុនស្បែកខ្មៅរងការរិះគន់យ៉ាងចាស់ដៃ
អានអត្ថបទបន្ត៖ម្នាក់ៗសុទ្ធសឹងតែល្បីល្បាញ ក្នុងវិស័យភាពយន្តខ្មែរ ដឹងថា មានកម្ពស់ប៉ុន្មានអត់?
អត្ថបទ៖ អ៊ីង សុឡា