អ្នកភូមិម្តុំវត្តទឹកថ្លា ល្បីហោរាវ័យក្មេងទាយឆុត!

2015-03-30 16:22:38
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូទស្សន៍ទាយ ភាគច្រើនជាមនុស្សចាស់ ឬ មនុស្សវ័យកណ្ដាល តែចម្លែកអីលោកគ្រូទាយម្នាក់នេះ អាយុទើបតែ ៦ ឆ្នាំសោះ ចេះទាយគន់គូប្រមើលមើល មិនចាញ់គ្រូទាយដែលមានវ័យចំណាស់ឡើយ។

ហោរវ័យក្មេងរូបនេះ មានឈ្មោះថា សុខ ហេងសម្បត្តិ មានអាយុទើបតែ ៦ ឆ្នាំ ប៉ុណ្ណោះ។ អ្នកស្រី វ៉ា ចាន់នឿន ត្រូវជាម្ដាយរបស់គ្រូហោរវ័យក្មេងបានប្រាប់ Sabay ថា កាលបងស្រីចាប់មានកំណើត សម្បត្តិ គាត់បានយល់សុបិន្ដថា មានគេឱ្យត្បូងពេជ្រពណ៌ខៀវ ប៉ុនមេជើង បន្ទាប់មកបងស្រីក៏ចាប់បាត់រដូវ នឹងបានទៅមន្ទីរពេទ្យ ពិនិត្យសុខភាព ក៏ដឹងថាមានគភ៌។ អ្នកស្រីថា ពេលសម្បត្តិមានអាយុ ៤ ឆ្នាំ កុមាររូបនេះក៏ចាប់ផ្ដើមដឹងរឿងរ៉ាវផ្សេងៗ ដែលនឹងកើតឡើងក្នុងពេលអនាគត។

''កាលខ្ញុំនៅធ្វើចម្ការនៅរតនគិរី មានយាយម្នាក់ កូនគាត់ហ្នឹងត្រូវ គេចាប់ឃុំ! កូនខ្ញុំក៏ទៅប្រាប់យាយហ្នឹងថាកុំភ័យកូនយាយឯងពីរបីថ្ងៃទៀតចេញមកវិញហើយ! ស្រាប់តែបីថ្ងៃក្រោយកូនយាយហ្នឹងចេញមកវិញមែន! តាំងពីពេលហ្នឹងមក ទើបដឹងថាកូនខ្លួនឯងចេះទាយ''។ អ្នកស្រី វ៉ាចាន់នឿន និយាយ។

ម្ដាយហោរាវ័យក្មេងឱ្យដឹង ទៀតថា ចាប់តាំងពីពេលនោះមកក៏មានគេឯងមករកសម្បត្តិដើម្បីទាយឱ្យ ហើយពេលទាយឱ្យគេម្ដងៗ សម្បត្តិ មិនដែលឱ្យម្ដាយ នៅមើលទេ បើឃើញម្ដាយនៅឈរមើល ហោរវ័យក្មេងរូបនេះនឹងចង្អុលមុខម្ដាយហើយដេញចេញភ្លាម។

អ្នកស្រីតេងរី ដែលបានរកគ្រូទាយវ័យក្មេងរូបនេះ ដើម្បីចង់ដឹងលទ្ធផលកូនប្រុសដែលទើបតែប្រឡង បាក់ឌុបលើកទីពីរ រួចកាលពីចុងឆ្នាំ២០១៤ បានប្រាប់ Sabay ថា អ្នកភូមិល្បីលោកគ្រូក្មេងពូកែ ទើបអ្នកស្រីស្កាត់ទៅរក។ អ្នកស្រីថា ការទស្សន៍ទាយប្រាប់ថាកូនអ្នកស្រីធ្លាក់ ទីបំផុតធ្លាក់មែន។ ''គ្រូទាយហ្នឹងវាថា ជាប់!ខ្ញុំក៏សួរបញ្ជាក់ ជាប់មែនអី? គ្រូក្មេងក៏ថាជាប់មែន តែដល់កូនហ្នឹងស្រីបានជាប់! ក្រោយមកកូនខ្ញុំធ្លាក់មែន! ព្រោះកូនគាត់ប្រុស ''។

ទន្ទឹមគ្នានេះ កញ្ញា សេន គឹមវែង ជាអ្នករស់នៅក្បែរផ្ទះហោរវ័យក្មេង បានឱ្យដឹងថា '' ខ្ញុំក៏ធ្លាប់ទៅទាយដែរបង! គឺខ្ញុំសួរពីរឿងប្រឡងអាហារូបករណ៍ទៅរៀននៅថៃ ថាជាប់អត់? គ្រូទាយហ្នឹងថាអត់ជាប់ទេ! ខ្ញុំថាម៉េចចឹង? កូនហ្នឹងថា ចែឯងរៀនអត់សូវចេះផង! (សើច) ការពិតទៅ! ខ្ញុំធ្លាក់មែនព្រោះខ្ញុំអត់ទៅប្រឡងផង!''។

ក្នុងនាមជាម្ដាយមួយរូប បងស្រីចាន់នឿន មិនបានហាមឃាត់កូនមិនឱ្យទស្សន៍ទាយ ឬ ក៏មានបំណងចង់អូសទាញកូន ឱ្យចេញផុតពីរឿងអបិយជំនឿទាំងនេះទេ ផ្ទុយទៅវិញបងស្រីចង់ទិញបាយសី តាមការស្នើរបស់កូន ប៉ុន្តែដោយសារពុំមានថវិកាគ្រប់គ្រាន់ទើបមិនទាន់បានរៀបចំជា អាសនៈឱ្យលោកគ្រូហោរវ័យក្មេង។ ក្រៅពីទស្សន៍ទាយហោរក្មេងរូបនេះក៏ចេះស្រោចទឹកលើករាសីដែរ ហើយសព្វថ្ងៃ កុមារសុខ ហេងសម្បត្តិ រស់នៅជាមួយឪពុកម្ដាយ និងបងប្រុស នៅផ្ទះជួលមួយកន្លែងស្ថិតក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ដើម្បីកាន់តែជ្រាបច្បាស់សូមប្រិយមិត្តទស្សនាវីដេអូខាងក្រោមនិងពិចារណាលើរឿងនេះទាំងអស់គ្នា៕