ឈិនឡុង ទម្លាយរឿងចង់លែងប្រពន្ធ ពេលស្រីស្នេហ៍មានផ្ទៃពោះ

2015-04-01 13:05:16
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាក្បាច់គុនហុងកុង Jackie Chan ហៅ ឈិនឡុង បានបង្ហើបថាខ្លួនស្ទើរតែលែងលះភរិយា Lin Feng-Jiao ទៅហើយកាលពីឆ្នាំ១៩៩៩ នៅពេលដែលដឹងថាមិត្តស្រីលួចលាក់ឈ្មោះ Elaine Ng មានផ្ទៃពោះ។ Jackie Chan បានទម្លាយរឿងនេះ តាមរយៈសៀវភៅ "Jackie Chan: Never Grow Up, Only Get Older” ដែលលោកបានសរសេររៀបរាប់ពីជីវិតផ្ទាល់ខ្លួន និងត្រៀមចេញផ្សាយដើម្បីអបអរខួបកំណើតគម្រប់អាយុ៦១ឆ្នាំ នៅថ្ងៃទី៧ ខែមេសា ខាងមុខ។

ឈិនឡុង ជាមួយប្រពន្ធ និងកូនប្រុស

កន្លងមក ឈិនឡុង ធ្លាប់មានស្រីកំណាន់ខាងក្រៅជាច្រើននាក់ ប៉ុន្តែភរិយារបស់គេមិនដែលនិយាយស្ដីអ្វីឡើយ។ អ្នកទាំងពីរបានរៀបការស្ងាត់ៗជាមួយគ្នានៅទីក្រុង Los Angeles សហរដ្ឋអាមេរិក កាលពីឆ្នាំ១៩៨២ និងមានកូនប្រុសម្នាក់ឈ្មោះ Jaycee។ អំឡុងពេលដែល ឈិនឡុង ធ្វើដំណើរទៅគ្រប់ទីកន្លែងដើម្បីថតភាពយន្ត ភរិយារបស់គេ (Lin Feng-Jiao) នៅមើលថែកូនប្រុស នៅឯផ្ទះ នៅតៃវ៉ាន់។ Lin គឺជាតារាសម្ដែងល្បីមួយរូប និងធ្លាប់ឈ្នះពានរង្វាន់ដែរ ប៉ុន្តែនាងបានបោះបង់អាជីពសិល្បៈចោលទាំងស្រុងដើម្បីបំពេញតួនាទីជាភរិយាល្អម្នាក់។ ឈិនឡុង ទទួលស្គាល់ថាមានពេលខ្លះ គេអាចនៅជាមួយប្រពន្ធកូនតែពីរសប្ដាហ៍ប៉ុណ្ណោះក្នុងមួយឆ្នាំ។

ក្រោយពីរឿងអាស្រូវស្នេហាឈិនឡុង ជាមួយបវរកញ្ញាហុងកុង Elaine Ng បានលេចលើទំព័រមុខនៃសារព័ត៌មានជាច្រើន ពិសេសនៅពេលដែលនាងមានផ្ទៃពោះ ឈិនឡុង ដឹងថាខ្លួនបានប្រព្រឹត្តកំហុសធំមួយដែលភរិយាមិនអាចលើកលែងបានតទៅទៀត។ តារារូបនេះបានសរសេរថា "ខ្ញុំចង់ទូរសព្ទទៅនាង ប៉ុន្តែខ្ញុំមិនដឹងថាគួរនិយាយអ្វី។ ខ្ញុំមិនអាចបកស្រាយអ្វីពីកំហុសមួយនេះបានឡើយ។ ខ្ញុំបានធ្វើខុសធ្ងន់ណាស់។ ខ្ញុំគិតថាពួកយើងមិនអាចដោះស្រាយអ្វីបាន ក្រៅពីលែងលះគ្នានោះទេ"។

ទីបញ្ចប់ ឈិនឡុង បានទទួលស្គាល់កំហុស និងបានសុំអភ័យទោសចំពោះកំហុសឆ្គងរបស់ខ្លួនតាមរយៈសន្និសីទកាសែតមួយ។ បើទោះជាមានមនុស្សជាច្រើនរិះគន់គេយ៉ាងណាក្ដី ប៉ុន្តែភរិយារបស់គេបានសម្រេចចិត្តលើកលែងឲ្យគេនៅពេលនោះ។ ពួកគេឈប់គិតពីរឿងលែងលះ ហើយបច្ចុប្បន្នជីវិតគ្រួសាររបស់ពួកគេមានសុភមង្គលធម្មតា ស្របពេលដែល ឈិន ឡុង នៅតែមមាញឹកនឹងការងារភាពយន្តរបស់ខ្លួនដដែល។

មកដល់ពេលនេះ ឈិនឡុង មិនទាន់ទទួលស្គាល់ជាផ្លូវការថាកូនស្រី Etta Ng ដែលអតីតសង្សារ Elaine Ng បានផ្ដល់កំណើតឲ្យកាលពីឆ្នាំ១៩៩៩ ជាកូនខ្លួននៅឡើយទេ។

ក្រៅពីរឿងនេះ ឈិនឡុង បានលាតត្រដាងរឿងជាច្រើនទៀតក្នុងសៀវភៅនេះ ដូចជារឿងកូនប្រុសរបស់គេ Jaycee Chan ឪពុកម្ដាយរបស់គេ រួមទាំងអាជីពសម្ដែងរយៈពេល ៥៤ឆ្នាំកន្លងមក ដែលបានផ្ដល់មេរៀនជាច្រើនសម្រាប់ជីវិតរបស់គេ។ ក្នុងផ្នែកមួយ ឈិនឡុង បានសរសេរផ្ដាំផ្ញើជាពិសេសដល់កូនប្រុស Jaycee Chan ដែលត្រូវបានចាប់ខ្លួន និងកាត់ទោសពីបទពាក់ព័ន្ធគ្រឿងញៀនថា "ខ្ញុំធ្លាប់មានកំហុសកាលពីនៅក្មេង។ ប៉ុន្តែខ្ញុំបានយកកំហុសទាំងនោះមកកែប្រែខ្លួនឯងឲ្យកាន់តែប្រសើរ។ ចុងក្រោយ ខ្ញុំនឹងក្លាយជាបុរសពិត ខ្លាំង និងមានឯករាជ្យ ដែលនឹងប្រឈមមុខនឹងអ្វីគ្រប់យ៉ាងដែលគេគួរតែប្រឈមមុខ" ៕