ភ្លើងសង្គ្រាមនៅស៊ីរី ធ្វើឲ្យក្មេងតូចម្នាក់ខ្លាចកាមេរ៉ាព្រោះគិតថាជាកាំភ្លើង
- 2015-04-01 14:04:07
- ចំនួនមតិ 0 | ចំនួនចែករំលែក 0
ភ្លើងសង្គ្រាមនៅស៊ីរី ធ្វើឲ្យក្មេងតូចម្នាក់ខ្លាចកាមេរ៉ាព្រោះគិតថាជាកាំភ្លើង
ចន្លោះមិនឃើញ
ស្នូរគ្រឿងផ្ទុះលាន់ឮកងរំពង សម្រែកយំសោក ឪពុកព្រាត់កូន ប្ដីព្រាត់ប្រពន្ធ ភាពភ័យខ្លាចគ្មានស្រាកស្រាន្ត... ទាំងនេះហើយ គឺជាលទ្ធផលនៃភ្លើងសង្គ្រាម ដែលគ្រប់គ្នាសែនស្អប់ និងតែងប្រាថ្នាចៀសចាកឆ្ងាយ។ ជាក់ស្ដែង សង្គ្រាមអូសបន្លាយ ៥ឆ្នាំនៅក្នុងប្រទេសស៊ីរី បានធ្វើឲ្យមនុស្សជាច្រើនបាត់បង់ជីវិត បាត់បង់ទីជម្រក ហើយអ្វីដែលរឹតតែគួរឲ្យសង្វេគទៀតនោះ គឺក្មេងស្រីម្នាក់ បានលើកដៃទាំងពីរឡើងលើពេលឃើញកាមេរ៉ា ព្រោះគេគិតថានោះជាកាំភ្លើងប្រល័យជីវិត។
រូបភាពដ៏សង្វេគនេះ ថតបានក្នុងជំរំជនភៀសខ្លួន Atmen នៅព្រំដែនរវាងប្រទេសស៊ីរី និងទួរគី។ ក្មេងស្រីនៅក្នុងរូបមានឈ្មោះ Adi Hudea អាយុទើបបាន ៤ឆ្នាំប៉ុណ្ណោះ ហើយត្រូវឪពុកស្លាប់ចោលតាំងពីឆ្នាំ២០១២។ ក្រោយកំព្រាឪពុក ក្មេងស្រីដ៏កម្សត់ ត្រូវរស់ជាមួយម្ដាយ និងបងប្អូនបង្កើតបីនាក់ទៀតនៅក្នុងជំរំជនភៀសខ្លួន។
អ្នកថតរូបព័ត៌មានជនជាតិទួរគី Osman Sagirli គឺជាអ្នកផ្ដិតយកទិដ្ឋភាពនេះឡើង។ ក្រោយមក រូបភាពត្រូវបង្ហោះចូលក្នុងបណ្ដាញសង្គមដោយសរសេរអមថា ក្មេងស្រីតូចឃើញកាមេរ៉ាជាកាំភ្លើងទើបនាងលើកដៃឡើងលើ ហើយក៏ចាប់ផ្ដើមល្បីល្បាញ និងធ្វើឲ្យមនុស្សជាច្រើនមានការរំជួលចិត្តយ៉ាងខ្លាំង។
សង្គ្រាមស៊ីវិលស៊ីរី ដែលអូសបន្លាយរយៈពេល ៥ឆ្នាំមកនេះ បានឆក់យកជីវិតមនុស្សជាង ២២ម៉ឺននាក់ ដែលក្នុងនោះមានប្រមាណ ១ម៉ឺននាក់ជាកុមារ។ មនុស្សរាប់លាននាក់ត្រូវចាកចោលផ្ទះសម្បែង គេចពីការប្រយុទ្ធបង្ហូរឈាមគ្នា។ ក្នុងចំណោមនោះ មានជាង ១២លាននាក់ រាប់ទាំងក្មេង ៥លាននាក់ កំពុងស្ថិតនៅក្នុងស្ថានភាពគ្រោះថ្នាក់ និងត្រូវការជំនួយមនុស្សធម៌នៅឡើយ៕
ចុចអាន៖ ឡានក្រុងក្លាយជារបាំងគ្រាប់កាំភ្លើងការពារប្រជាជននៅស៊ីរី
ប្រែសម្រួល៖ គង់ វិសាល ប្រភព៖ dailymail