ប្រធានបទក្ដៅៗថ្មីៗ ពី Zayn Malik អតីតសមាជិក 1D

2015-04-19 16:12:36
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង Zayn Malik ដើរចេញពីក្រុមចម្រៀងប្រុសអង់គ្លេស One Direction បានធ្វើឱ្យមានការចុះផ្សាយ ជជែកគ្នាយ៉ាងក្ដៅគគុក លើបណ្ដាញសារព័ត៌មាន និងបណ្ដាញសង្គម ហើយពេលនេះ លោកចាប់ផ្ដើមធ្វើឱ្យគេ ចាប់អារម្មណ៍កាន់តែខ្លាំងទៀតហើយ។

អ្វីដែលធ្វើឱ្យអ្នកគាំទ្រភ្ញាក់ផ្អើលនោះ គឺនៅកម្មវិធី Asian Awards ក្នុងទីក្រុងឡុងដុង កាលពីថ្ងៃសុក្រកន្លងមក លោកបានកោរសក់ និងចោះច្រមុះបង្ហាញពីភាពប្លែក ដែលនាំឱ្យអ្នកគាំទ្រភាគច្រើន បញ្ចេញមតិព្រោងព្រាត លើបណ្ដាញ Twitter និង Instagram។

ក្នុងនោះ អ្នកគាំទ្រម្នាក់ បានប្រៀបធៀបរូបរាងថ្មី របស់ Zayn ទៅនឹងតារាចម្រៀង Timberlake និង Nick Jonas ដែលជាអ្នកលេងម៉ូដសក់។ អ្នកគាំទ្រផ្សេងៗទៀត បាននិយាយថា Zayn កោរសក់យ៉ាងដូច្នេះ ប្រហែលជាលោក នឹកដល់អតីតសមាជិក 1D ឈ្មោះ Liam Payne ហើយ។ រីឯអ្នកគាំទ្រម្នាក់ទៀត ក៏បាន Tweet តាមការនិយាយរបស់ Liam ថា ជាការពិតណាស់ រូបរាងថ្មីនេះ គឺស្ដែងឱ្យឃើញថា Zayn នឹកលោក។

ចំពោះមូលហេតុ ដែលតារាវ័យ២២ឆ្នាំរូបនេះ កោរសក់ និងចោះច្រមុះ ប្រភពមួយឱ្យដឹងថា មកពីលោកចង់នៅឱ្យឆ្ងាយពីក្រុម 1D និងចង់ណែនាំអ្នកគាំទ្រទាំងអស់ ឱ្យស្គាល់ Zayn Malik ថ្មី មិនមែន Zayn Malik ពីមុននោះទេ។

សូមបញ្ជាក់ថា បើគិតចាប់តាំងពីការចាកចេញ របស់ Zayn Malik ពីក្រុម One Direction មកដល់ពេលនេះ គឺមានរយៈពេល២៣ថ្ងៃហើយ។ ចំណែកមូលហេតុនោះ ប្រភពខ្លះនិយាយថា លោកចេញ ព្រោះចង់ធ្វើជាតារាចម្រៀងទោល និងតារាចម្រៀងរ៉េប៕