បុរសពិការដៃនិងខ្វាក់ភ្នែក រួមផ្លូវជីវិតស្រដៀងរឿងព្រេងខ្មែរ
- 2015-04-20 16:24:48
- ចំនួនមតិ 0 | ចំនួនចែករំលែក 0
បុរសពិការដៃនិងខ្វាក់ភ្នែក រួមផ្លូវជីវិតស្រដៀងរឿងព្រេងខ្មែរ
ចន្លោះមិនឃើញ
រឿងព្រេងនិទានខ្មែរ "អាខ្វាក់អាខ្វិន" មានមនុស្សតិចនាក់ណាស់ដែលមិនធ្លាប់ឮ ព្រោះជារឿងល្បីរន្ទឺមួយ ដែលដំណាលតៗគ្នាជាយូរយារណាស់មកហើយ។ នាយខ្វិនជិះលើ ក ប្រាប់ផ្លូវនាយខ្វាក់ ធ្វើដំណើររួមសុខទុក្ខជាមួយគ្នា រហូតចុងក្រោយមានភ័ព្វវាសនាបានក្លាយជាអ្នកធំរៀងៗខ្លួន។ យ៉ាងណាមិញ ពេលនេះរឿងរ៉ាវស្រដៀងគ្នាបានកើតឡើងពិតនៅប្រទេសចិន ខណៈបុរសពិការដៃម្នាក់ បានដើរផ្លូវរួមគ្នាជាមួយបុរសពិការភ្នែកម្នាក់ទៀតអស់ជាច្រើនឆ្នាំមកហើយ។
ជារៀងរាល់ថ្ងៃ លោក Jia Haixia និងលោក Jia Wenqi បានចេញដំណើរទៅធ្វើការរកប្រាក់ចិញ្ចឹមជីវិតជាមួយគ្នា ដោយក្នុងដៃមានកាន់ញញួរ និងដំបង។ ការងារទាំងនោះ ត្រូវធ្វើឡើងនៅលើផ្ទៃដី ៨ហិចតា ដែលពួកគេបានជួលពីអាជ្ញាធរក្នុងតំបន់។ ដើម្បីទៅដល់កន្លែងធ្វើការនោះ លោក Wenqi ដែលពិការដៃទាំងសងខាង បាននាំផ្លូវលោក Haixia ដែលពិការភ្នែកកាត់ព្រៃព្រឹក្សា តាមរយៈការកាន់ដៃអាវ។ នៅពេលដល់ទន្លេ បុរសពិការភ្នែកនោះ ត្រូវជិះលើខ្នងបុរសពិការដៃ ដើម្បីឆ្លងទឹក។
បុរសអភ័ព្វទាំងពីរនាក់នេះ បានចូលរៀននៅសាលាជាមួយគ្នា តាំងពីវ័យកុមារក្នុងភូមិ Yeli ភាគឦសានប្រទេសចិន។ លោក Wenqi បាននិយាយថា ពូកគេទាំងពីរនាក់ប្រៀបដូចជាបងប្អូន ហើយមានអាយុចន្លោះគ្នាត្រឹមតែមួយឆ្នាំប៉ុណ្ណោះ។ ចំណែកបុរសពិការភ្នែក Haixia វិញបាននិយាយថា "ខ្ញុំជាដៃរបស់គាត់ ហើយគាត់ជាភ្នែករបស់ខ្ញុំ... យើងជាដៃគូដ៏ល្អ"។ លោក Jia Haixia បានកើតមកដោយពិការភ្នែកខាងឆ្វេង ហើយនៅឆ្នាំ២០០០ អំឡុងពេលធ្វើការក្នុងរោងចក្រភ្នែកខាងស្ដាំរបស់លោក ត្រូវដុំថ្មខ្ទាតចូល បណ្ដាលឲ្យខ្វាក់ទាំងស្រុងតែម្ដង។ ចំណែកលោក Jia Wenqi បានពិការដៃទាំងគូ តាំងពីអាយុ ៣ឆ្នាំ ដោយសារឆក់ខ្សែភ្លើង៕
ចុចអាន៖ នារីម្នាក់សុខចិត្តប្ដូរខ្លួនឲ្យគេឱប ដើម្បីយកប្រាក់ព្យាបាលជំងឺមិត្តប្រុស
ប្រែសម្រួល៖ គង់ វិសាល ប្រភព៖ BBC